تایبەت بە رۆژی کورد
بڕیار وایە لە حەوتی ڕەشەممەی ئەمساڵدا هەڵبژاردنەکانی مەجلیسی شووڕای ئیسلامی و مەجلیسی خوبرەگان لە ئێران بەڕێوە بچێ، بەرپرسانی کۆماری ئیسلامی لە ڕاگەیەندنەکاندا هەموو هەوڵێک دەدەن خەڵک بۆ سەر سندووقەکانی دەنگدان ڕابکێشن و سیمایەکی دیموکراتیک بە هەڵبژاردنەکانی ئەمساڵ ببەخشن، بەشی زۆری حیزب و لایەنە سیاسییەکانی خۆرهەڵاتی کوردستان بایکۆتی هەڵبژاردنەکانیان کردووە و داوایان لە خەڵک کردووە بەشداری لە هەڵبژاردنەکاندا نەکەن. رۆژی کورد بە پێویستی زانینی لە تەوەرێک دا پرسی بەشداریکردن و بەشداری نەکردن لە هەڵبژاردنەکاندا لەگەڵ نووسەر و رووناکبیران و هونەرمەندانی خۆرهەڵات بخاتە بەر باس.
لە بەشی شەشەمی ئەو تەوەرە دا عەلی بەهرامی ، چالاکی سیاسی بەم شێوەیە ڕای خۆی دەردەبڕێ:
” پێم وایە باشترین كار له ئێستادا ئه‌وه‌یه خەڵكی كوردستان بەشداری لەو بەناو هەڵبژاردنەی مانگی رەشەممەدا نەكەن و بژاردەی بایكوت بۆ ئەو هەڵبژاردنانە لە ئێستادا باشترین بژاردەیە. بژاردەی (بایكوت) چوونكە پرۆسەی هەڵبژاردن لە سیستەمی ویلایەتی فەقیەدا جیاوازە لە شێوه‌كانی هه‌ڵبژاردن له هەر هەڵبژاردنێك كه له وولاتانی دیكه ته‌نانه‌ت وولاتانی غه‌یره دیموكراتیك به‌رێوه ده‌چن. هه‌ڵبژاردن له ئێراندا پرسیارگەلی زۆری لە سەرەو لەگەڵ هەڵبژاردنە دیموكراتیكەكاندا یەكناگرنەوە. لە سیستەمی رژێمی ئێستای ئێراندا پاڵێوراو دەبێ لە فیلتەرە جیاجیاكان و له فیلتری شورای نیگه‌هبان به تایبه‌ت دەرچن،ته‌نانه‌ت زۆر كه‌س له‌وانه‌ی چه‌ندین ساڵه له خزمه‌تی رژیمدا بوون له فیلتێره‌كانی رژیم ده‌رنه‌چوون، دەبێ كەسێك رابردووی لە خزمەت بەو دەسەلاتە بووبێ و لە داهاتووشدا لە پێناو قازانجەكانی رژێمداو بە پێی یاسای بنەڕەتی هەنگاو هەڵگرێ و به تەو‌اوی له خزمه‌ت رێبه‌ریی رژێمدا بێ، رێگه‌ی پێ ده‌درێ به‌شدرای شانۆی هه‌ڵبژاردن بكه‌ن.
دیاره رژێمی ئێران مه‌به‌ستی له بەرێوەبردنی ئەو هەڵبژاردنانه و هێنانی خەڵكی ئێران بۆ سەر سندوقەكانی دەنگدان، دانی مانۆری جۆراوجۆری وەك پشتیوانی خەڵك لە سیستەمەكەیان و مەشروعیەتدانه به رژێمیه‌كه‌یان، كە هەر لەو چوارچێوەدا خامنەیی رێبەری رژێم رایگەیاند،ته‌نانه‌ت نەیارەكانی رژێمیش بەشداری لە دەنگداندا بكەن. كە وایە بەشداری خەڵك لە دەنگدان و بەتایبەتی هەڵبژاردنی مانگی رەشەممە بۆ سەرانی رژێم و بەتایبەت شەخسی خامنەیی گرینگە چونكه جیاواز له لایه‌نی ته‌بلیغاتی و هه‌روه‌ها لەبەر ئەوەی ئەو هەڵبژاردنە تەنیا هەڵبژاردنی مەجلیس نیە بەڵكوو هەڵبژاردنی مەجلیسی خیبرەكانیشە.جا بۆ ئەو هەڵبژاردنانە میكانیزمی تایبەتی گیراوەتەبەر بۆ ئەوەی پاڵێوراوەكان هەموو لە باڵی وەلی فەقیە و جێ باوەڕی ئەو بن و خەڵكیش دەنگیان بداتێ.
گه‌لی كورد كە هه‌ر له سه‌ره‌تای هاتنه سه‌ركاری ئه‌م رژیمه‌و له ریفراندۆمی فه‌رمایشی به‌ڵێ یا نا بۆ (جمهوری ئیسلامی) بایكوتیان هه‌ڵبژارد و هه‌روه‌ها لە ماوەی 37 ساڵی رابردوودا بەردەوام بژاردەی بایكوتی هەڵبژاردوە، چوونكە هەر لە سەرەتاوە ده‌ركه‌وت رژیم دژایه‌تی ماف و ئازادیەكانی نەتەوەكەمان ده‌كات و لە چوارچێوەی سیستەمی ویلایەتی فەقیەدا هیچ مافێك بەدەست نایه‌ت و ئەو رژێمە لە بەرامبەر هەر داوایەكی ئێمەدا زەبرو زەنگی بە كارهێناوە. ئێمە پێمان وایە دەبێ لە هەڵبژاردنێكدا بەشدار بین كە هەڵبژاردنێكی ئازاد و دیموكراتیك بێ و دەنگی خەڵك ئەنجامەكان یەكلایی بكاتەوە. ئەوانەی پێیان وایە دەتوانن به به‌شداری كردن له شانۆی هەڵبژاردنةكانى رژێم كەڵك وەرگرن، له هەڵەدان، لە به‌ر ئه‌وه‌ی ئه‌و ده‌سه‌لاته هیچ ئاڵووگۆرێكی به قازانجی خه‌ڵك تێدا وه‌دی نایه‌ت و ته‌نانه‌ت ئه‌گه‌ر كه‌سانێك بتوانن بچنه مه‌جلیسی رژیمه‌وه، توانای دروست كردنی هیچ ئاڵووگۆڕێكیان نیە، له راستیدا خودی مه‌جلیس له ژێر فه‌رمانی رێبه‌ری دەسەڵاتدایه‌و تواناكانی سنووردارن و هەر یاسایەك لە مەجلیسی رژێمەوە دەربچێ دەبێ لەلایەن شۆرای نیگابانەوە تەئید بكرێ دەنا كاری پێ ناكرێ. كە وایە بە بەشداری لەو مەجلیسەدا ناكرێ دڵخۆش بین بە هیچ ئاڵوگۆرێك. ئەوانەی پێیان وایە بە بایكوت هیچمان پێ نەكراوە، دەبێ بزانن كە نەمانتوانیوە ئەنجامێكی گەورە وەدەست بێنین مانای ئەوە نیە بژاردە و سیاسەتی بایكوتی هەڵبژاردنەكانی رژێم هەڵەن، بەڵكوو بۆ چەند هۆیەك دەگەرێتەوە، لەوانە هێز و لایەنەكان لە كوردستان دوور كەوتوونەوە و راستەوخۆ كاریگەریان بە سەر خەڵكەوە نیە كە بتوانن لە كاتی پرۆسةگەلێكی ئاوادا چالاكیان هەبێ. هەروەها ئەو میكانیزمانەی ئێمە بۆ بایكوتی هەڵبژاردنەكان گرتوومانەبەر لاواز بوون، تەنها پشت بەستن بە دەركردنی راگەیەندراو بەس نیە بۆ ئەوەی خەڵك بەدەم داواكەتەوە بێ بەڵكوو دەبێ لەگەڵ داواكە هەنگاوی جیددی بنێین لە نێو خەڵكداو بە چالاكی جۆراوجۆر رای خەڵك بەلای خۆماندا راكێشین كە ئێمە لەم بەشەدا وەك پێویست هەنگاومان نەناوە. لە بەرامبەردا رژێم بە هەموو شێوەیەك هەوڵ دەدا كاریگەری خۆی بە سەر خەڵكی كوردستاندا نیشان بدا، چ بە هەڕەشە و چ بە ئیمتیازدان به‌ژماره‌یه‌ك كه‌سی هه‌ڵخه‌ڵه‌تاو. بەو حاڵەش دیسان ئێمە وەك بزوتنەوەی ئازادیخوازانەی كوردستان ئەو كاتانەی هاوهەڵوێست بووین توانیومانە لە دووریش هەر كاریگەریمان هەبێ رێژەیەكی زۆری خەڵك بە دەم داواكانمانەوە هاتوون و بایكوتی هەڵبژاردنەكانیان كردوە. هاوكات ئەوانەی هانی خەڵك دەدەن بۆ بەشداری لەو هەڵبژاردنانەدا دەبێ بزارنن بەو كارەیان رەوایەت بە سیاسەتی سەركوت و ئێعدام و پێشێلكردنی مافی هاونیشتمانیانی كوردستان لەلایەن رژێمی دەسەڵاتدارەوە دەدەن.
به بۆچونی من هێزه سیاسیه‌كان وه‌ك پێشره‌وی خه‌بات ده‌بێ به مقاومه‌ت و خۆراگری و هاندانی جه‌ماوه‌ر سوور بن له سه‌ر روبه‌روبونه‌وه‌ی درنده‌ترین حاكمیه‌تی سه‌ره‌رۆی ئه‌م سه‌رده‌مه‌ی كۆمه‌ڵگه‌ی مرۆفایه‌تی و نابێت به هیچ نه‌وعه كارو هه‌ڵوێستێك هه‌وڵ بده‌ن رابردویان بخه‌نه ژێر پرسیارو هه‌روه‌ها مه‌شروعیه‌ت بده‌ن به‌و ده‌سه‌لاته دواكه‌وتوه‌و دژی ئینسانیه. نابێ لە بیرمان بچێ كە ئێمە دەبێ لە بنەما شۆرشگێڕیەكانی خۆمان لا نەدەین و پێم وایە بژاردەی بایكوتی هەڵبژاردنەكانی رژێم هەڵوێستێكی شۆرشگێڕانەیە.”
