ئیبراهیم جەهانگیری: نە تەحریم کردن کاری کوردە و نە بەشداری کردن

0
1457

تایبەت بە ڕۆژی کورد

بڕیار وایە لە حەوتی ڕەشەممەی ئەمساڵدا هەڵبژاردنەکانی مەجلیسی شووڕای ئیسلامی و مەجلیسی خوبرەگان لە ئێران بەڕێوە بچێ، بەرپرسانی کۆماری ئیسلامی لە ڕاگەیەندنەکاندا هەموو هەوڵێک دەدەن خەڵک بۆ سەر سندووقەکانی دەنگدان ڕابکێشن و سیمایەکی دیموکراتیک بە هەڵبژاردنەکانی ئەمساڵ ببەخشن، بەشی زۆری حیزب و لایەنە سیاسییەکانی خۆرهەڵاتی کوردستان بایکۆتی هەڵبژاردنەکانیان کردووە و داوایان لە خەڵک کردووە بەشداری لە هەڵبژاردنەکاندا نەکەن. ڕۆژی کورد بە پێویستی زانینی لە تەوەرێک دا پرسی بەشداریکردن و بەشداری نەکردن لە هەڵبژاردنەکاندا لەگەڵ نووسەر و رووناکبیران و هونەرمەندانی خۆرهەڵات بخاتە بەر باس.

لە بەشی  پێنجەمی ئەو تەوەرە دا ئیبراهیم جەهانگیرئ ، نووسەر و چالاکی سیاسی بەم شێوەیە ڕای خۆی دەردەبڕێ:

“هەڵبژاردن لە وڵاتێکدا کە زیاتر لە سی ساڵە کورد وهیچ نەتەوەیەکی دیکەی وەک مرۆڤ حیساب نەکردووە هیچ پێوەندیەکی بەو نەتەوانەوە نییە، چ حیزب وچ هەر دەستە وگرووپێک خۆی بەو شتەوە سەرقاڵ بکات تەنیا یەک مانۆڕی سیاسیی شکستخواردووی تاقی کردۆتەوە و مێژووی خۆیدا تۆماری دەکات. ئەمەش زیاتر تاکتیکێک و چالاکیەکی سیاسییە ئەویش نە بەخوێندنەوەی دروستی مەسەلەکان.

 هەلوومەرجی ڕۆژهەلاتی ناوەڕاست وئەو شەڕو ئاشووبەی کەوتۆتە ناوچەکەمان بە ئاشکرا پێماندەلێ کە ئەوەی لە هەمو کات بێتواناترو بێهێزتر بووە ئەوە دەوڵەتە داگیرکارەکانن نەک کورد. ئەوە هێز ولایەنە کوردیەکانن کە سەرەرای هەموو پەرت پەرەوازەبونەی کە هەیانە لە هەموو کات بەهیزترن و بەتایبەتی لەدەرفەت و هەلە ڕەخساوەکان کەڵک وەردەگرن. کورد لە ڕۆژئاوا خاک و زیدی خۆی وەک گرینگترین فاکتەری بەدەستەوەگرتنی جارەنووسی خۆی خستۆتە ژێردەسەڵاتی خۆی. لە باشوور سەرەڕای گەندەڵی و یەکنەبوونی کورد وهێزەسیاسیەکان، سەرەڕای قەیرانی دارایی و بێ توانایی مادی و ئیدارەیی حکوومەتیش، حکوومەتێک هەیە کە گەورەترین ئیعترافی نێودەولەتی پێکراوە و تارادەیەک تەجرەبەی دەوڵەتێکی تازەی لە هەگبەی مێژوو ئاخنیوە.

 ئێران کە بە ڕواڵەت لە هەموو دەوڵەتانی ناوچە بەهێزترە لەهەمووان پڕقەیرانترە، پێگەی لەهەمووان لەرزۆکترە، ئەو ئەگەر زۆری مایە بۆدانێین دەبێ بڵێین لە باشترین حاڵەتدا وەک رێژیمی سووریا دەچێ.  ئیران ناتوانێ سەرپۆش لەسەر ئەو هەمووە قەیرانە دابنێ کە بەرۆکی گرتووە و لە هەموانیش گرینگتر قەیرانی مەشرووعیەت. کەوایە بە دڵنیاییەوە هەر جۆرە سەرهەڵدانێک و هەر جۆرە تەقینەوەیەک کە رووبدات ئیران ئاداری لەسەر پاداری نامێنی. کە وایە بۆچی ولە پێناوی چی حیزبی کوردی ڕۆژهەڵات هەر خۆی بە وە خەریک بکات کە دەرفەتێک بۆ خەباتی سیاسیی لە ناوخۆ بدۆزێتەوە یان هەمو هەوڵی لەوە دا کورت کردبێتەوە وخۆی سەرقاڵی هەڵبژاردن بکات کە شانۆگەرییەک بەو لاوە نییە! یان ئەویتر رۆژهەتا ئیوارێ ئەوە هێز وبازوو نیشاندەدات کە تەحریمی کردووە و پێی وایە ئیتر ئەوە بەو تەحریمە لایەکی ڕێژیمی لێکردۆتەوە!

 حیزبی کوردی ڕۆژهەڵات  بەر لەهەمووشتێک دەبێ خۆیان ساخ کەنەوە، لەو کێبەرکێیەی باشوور وڕۆژئاوا تەجرەبە وەرگرن. ڕۆژ هەتا ئێوارێ گلەیی لە کوردی ڕۆژئاواو باشوور دەکەن کە بۆچی وا پەرت وپەرەوازەن؟ بۆ یەکگرتوو نین؟ کەچی خۆیان لەهەموویان خەراپترن. خۆ کەسیش بەهانەی لێنابڕێ‌! هەق هەر بە لایەکەو تەواو. هەرچی ئەو حیزب و سەرکرادنە دەێلێن  ئەندام و لایەنگریش بۆیان لەچەپڵەدەدەن، هەڵەکانیان بۆ دادەپۆشن، پاساویان بۆ دێننەوە و ….. !

ناوچەکەمان دووگیانە بە گۆرانکاری یەکجار جیددی وگەورە. لەسەر مانگ وڕۆژی خۆیەتی.  ئەمڕۆ رێک نەکەون سبەی درەنگە، بەهەویای ڕابردوو و پێگەی سووننەتی خۆتان مەبن. بەرەیەک ئەمڕۆ چالاکە و لە مەیدان دایە هیچ کردارێکی ئێوەی لەبیر نیە، لێکدانەوەکانتان قەناعەتیان پێناهێنی. ئەگەر سیاسەت دەکەن ئاوڕ لە رابردووی پڕ لەهەڵەی خۆتان بدەنەوە و پێتان وانەبێ هەرچی تۆ دەیکەی ئەوا سەرئەنجامەکەی دەگاتە راستە ڕێی خەبات.

 حیزبی کوردی بەر لەوەی دەفکری تەحریم ویان خوێندنەوەی تازەتر و مەدەنیانەدا بێ بۆ هەڵبژاردنێک کە هیچ پێوەندی بە کوردەوە نییە واباشترە، خەڵک ولاوانی وڵات بە بەرنامەکانی بەرەوگەشەکردنی بیری نەتەوەیی وولاتپاریزی و سەربەخۆیی هانبدا. سەردەم سەردەمی ڕزگاری و سەربەستییە. داگیرکەران هەر هەموویان ئیعتیباری خۆیان لەناو کۆمەڵگای نیودەولەتی و لەناو خەڵکی خۆشیان لەدەست داوە. سیاسسەت بۆ ئایندەی نەوە و نتیجەکانمان بکەن با ئەوان سبەی وەک ئەمڕۆی ئێمەیان لێ بەسەرنەیە.”

سه‌رنج و كۆمێنت

كۆمێنت

Leave a Reply

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.