نوێكرایه‌وه‌ ، ڕوونکردنەوەیەک لەسەر گیرانی خوێندکاری کورد فەرشاد ئەمینی

0
141

سەرجەم خوێنەران و بینەرانی ڕۆژی کورد ئاگادار دەکەینەوە کە ڕوونکردنەوەی ئەوڕۆی “ڕۆژی کورد” لەمەڕ گیرانی خوێندکاری کورد، فەرشید ئەمینی و هەروەها دانانی وێنەکانی ناوبراو و بەراورد کردنیان لەگەڵ یەکتری و دانی ڕوونکردنەوە لە لایەن ڕۆژی کورد، دەگەڕێتەوە بۆ هەستی خۆ بە بەرپرسیار زانینی ڕۆژی کورد لە هەمبەر ڕۆڵەکانی نەتەوەی کورد و پێش گرتن لە گیران و تێداچوونیاندا و نەکەوتنە داوی سیاسەتە چەپەڵەکانی کۆماری ئیسلامی ئێران و هیچ ئامانجی حیزبی لە پشتەوە نیە.
ڕۆژی کورد بە بەردەوامی تێکۆشاوە، دەنگ و ڕەنگی هەر هەموو کورد بە گشتی بێ و نەخشێنەری ڕۆژی گشت کوردان بێت و یارمەتیدەری کورد بێ بۆ وەدیهێنانی داهاتوو و گەیاندنی زانیاری و ئەوە هەوڵی سەرجەم ئەندامانی ڕۆژی کوردە.
ئەو ڕوونکردنەوەی ئەوڕۆی ڕۆژی کورد و بە هەڵە چوونمان زیاتر دەکەوێتە سەر ئەستۆی هاوڕێیانی خودی بەرێز فەرشید ئەمینی کە لەگەڵ میدیا و ڕاگەیاندنەکان بەداخه‌وه‌ به‌شێوه‌یه‌كی دوور له‌ ڕاستی دواون و تێکۆشان میدیا و دونیای ڕاگەیاندن بە هەڵە دا بەرن، ئەوەش دەبێ لە خۆیان بپرسرێ، داخوا چ ئامانجێکیان لە دڵ و هزردا هەبووە.
ئێمە وەک ڕۆژی کورد، هیوای سەرکەوتن بۆ بەریز فەرشید ئەمینی و سەرجەم ڕۆڵە تێکۆشەرەکانی کورد و کوردستان لە هەر حیزب و ئایدیایەکدا کە تێیدا بۆ کورد خەبات دەکەن، دەخوازین و هیوادارین ڕێڕەوی ڕاستەقینەی ڕێگای کورد و کوردستان بن و لە سایەی ئەوانەوە ئامانجەکانی کورد دەستەبەر بێت.

ڕۆژی كورد لێره‌وه‌ داوای لێبوردن له‌ سه‌رجه‌م بینه‌ران و خوێنه‌رانی ده‌كا

لینكی ڤیدیۆیی ده‌قی قسه‌كانی  فەرشاد ئەمینی

ده‌قی ئه‌و هه‌واڵه‌ی كه‌ پێشتر له‌ ڕۆژی كورد بڵاو كرایه‌وه‌ به‌م چه‌شنه‌یه‌ : 

ماوەی هەشت ڕۆژ بەر لە ئێستا هەواڵێک لەسەر دەست بەسەر کرانی فەرشاد ئەمینی خوێندکاری کوردی زانکۆی تاران بڵاو بۆوە و چەند ئاژانسی هەواڵدەری جێی متمانەی وەک ئاژانسی هەواڵدەری موکریانیش پشت ڕاستیان کردەوە.

لەو دوو ڕۆژەی دواییدا لەسەر فەیسبووکی ناوبراو وێنەیەک بڵاو بۆتەوە کە ناوبراو بە چەک و رەخت و جلی گریلاییەوە نیشان دەدا و لەسەری نووسراوە: لەو چەند ڕۆژەدا هەوالێکی بەدرۆ لەسەر گیرانی من لە لایەن ناوەندە ئەمنیەتییەکانی ڕژێمەوە بلاو بۆتەوە بەڵام درۆیە و من ئێستا لە گشت کاتێک ئازادترم و لە ڕیزی گریلاکان دام و دەچمە خولی ڕاهێنانی چەکداری و داوا لە هەموو کوردێک دەکەم پشتگیری بەرخۆدانی باکووری کورستان بکەن. ناوبراو هەروەها دەڵێ: ناوەندە ئەمنیەتییەکان تەنیا توانیویانە موبایلەکەی من لەگەڵ خۆیان ببەن.

ڕۆژی کورد بە سەرنجدان بە هەندێ زانیاری ورد لەو بارەوە بە پێویستی دەزانێ چەند خاڵێک  ڕوون بکاتەوە:

یەکەم: وێنەی بلاوبۆوە لە فەیسبووکی ناوبراودا، هی ئێستا نیە و لانیکەم کۆتایی وەرزی هاوین نیشان دەدات، ئیستا وەرزی زستانە و شوێنی گریلا و پێشمەرگە (چیاکانی کوردستان) پڕ لە بەفر و سپی پۆشن.

دوو: وێنەی بڵاوبۆوە هەرچەند زۆر هاوشێوەی ناوبراوە بەڵام لە ڕووی ڕواڵەت و جەستەوە جیاوازیشی هەیە بۆ نمـوونە تا ڕادەیەک کورتە باڵاترە.

سێ: ئێمە تێکۆشاوین پەیوەندی بە هەندێ کەس لە نزیکانیەوە بگرین کە لە ناویاندا کەسانێک هەن بە وردی ئاگاداری دەست بە سەر بوون و کاتەکەی هەن.

چوار: ئاژانسی هەواڵدەری موکریانیش بۆ پشت ڕاست کردنەوەی هەواڵەکەی پەیوەندی بە کەسانێک لە هاوڕێکانیەوە گرتبوو کە تێیدا باس لە کات و شێوەی گیرانەکەی دەکەن.

کەواتا گریمانەی ئەوە دەکرێت کە ناوەندە ئەمنیەتییەکانی ڕژێم دوای گیران و دەست بەسەر کردنی فەرشاد ئەمینی، پاسوۆردی ناوبراویان وەرگرتبێ یان فەیسبووکەکەیان هاک کردبێ و بەو جۆرە و بە دانانی ئەو وێنەیە دەیانهەوێ هاوڕێ و هاوبیرانی ناوبراو بناسن و دەست بە سەریان بکەن، یان ئەوەتا دەیانهەوێ هاوڕێ نزیکەکانی یان کەسانی خەمخۆر کە لە ڕووی هەست و سۆزەوە نامەی بۆ دەنێرن بناسن و ئەوەش داوێک بێ بۆ گیرانی زیاتری کەسانی نیشتمانپەروەر.

سه‌رنج و كۆمێنت

كۆمێنت