هەڵوێستی چالاکوانان و سیاسییەکانی خۆرهەڵاتی کوردستان بە دژی کرانەوەی مەڵبەندی ڕەوشەنبیری خومەینی/بەشی ٢

0
375

لە ساڵیادی دامەزراندنی کۆماری سێدارەی ئیسلامی ئێران و لە درێژەی جێژنەکانی هەموو ساڵەی ساڵیادی دامەزراندنی کۆماری ئیسلامی لە لایەن یەکێتی نیشتمانییەوە، لە سەر دەستی نەجمەددین کەریم، پارێزگاری کەرکووک و ئەندامی ڕێبەریی یەکێتی نیشتمانی کوردستان، سەنتەرێکی ڕۆشنبیری وەرزشی بە ناوی خومەینی و بە ئامادەبوونی کاربەدەستانی ئێرانی و لە حاڵێکدا کە تەنیا دوو ئاڵای ئێران ق عێراق داندرابوون و ئاڵای کوردستان شوێن بزر کرابوو، کرایەوە.

کرانەوەی مەڵبەندێکی ڕۆشنبیری لە شارێکی وەک کەرکووک کە هەزاران قوربانی پێشکەش بە کوردستان کردووە و کورد بە دڵی کوردستانی دەناسن و کەرکووکێکانیش بە بەشێک لە نیشتمانپەروەرترین کوردەکان دێنە ئەژمار، هەڵگری گەلێک هێما و قسە و پەیامە کە تا ئێستش تاق و لۆق نەبێ لە لایەن ڕووناکبیرانی باشوور، دژکردەوەیەکی ئەوتۆی لێنەکەوتۆتەوە.

هەرچەند تا ئێستا هیچ کام لە حیزبەکانی خۆرهەڵاتی کوردستان لەمبارەوە هیچ ڕاگەیێندراوێکیان نەبووە و خەڵکی ناوخۆی خۆرهەڵاتیش بە هۆی زەبر و زەنگ و سێدارە و ئەشکەنجە، نەیانتوانیوە ڕای خۆیان دەرببڕن، بەڵام تۆڕە کۆمەڵایەتییەکان تەژی ىوون لە مەحکووم کردنی ئەو کارە قێزەون و نانیشتمانییە.

بەو بۆنەوە ڕۆژی کورد بەپێی دەرفەت،  ڕای بەشێکی بەرچاو لە چالاکانی خۆرهەڵاتی کوردستانی لە بوارە جیاوازەکانی سیاسی، فەرهەنگی، هونەر و مەدەنی دا وەرگرتووە کە لەو بابەتەدا دەخرێتە بەر چاوتان و هەر کام لە کەسایەتییەکان بە شێوەیەک، ڕوانگەی خۆیان خستۆتە بەر باس.

مامۆستا ئەنوەر سووڵتان پەنا، سیاسەتوان و شاعیری خۆرهەڵاتی، ئاوڕێکی مێژوویی لە پەیوەندییەکانی ڕۆژهەڵات و یەکێتی نیشتمانی دەداتەوە و لەو بارەوە بۆ ڕۆژی کورد، گوتی: لەبارەی مەڵبەندی رۆشنبیری خومەینی که له کەرکووک کراوەته وه، وەک ده زانن یه کێتی نیشتمانی و زۆربەی حیزبەکانی باشووری کوردستان، هه ریەک به شێوەی بۆچوونی خۆی له گەڵ ڕێژیمی ئاخووندی ئێرانداپه یوه ندییان هه بوه…په یوه ندیی یه کێتی نیشتمانی تاکاتێک مام جه لال هه بوو وزمانی ده گه ڕا، به شێوه یه کی مه عقوول بوو. مام جه لال ئیمتیازێکی دەداو ئیمتیازێکی دەستاند…به ڵام دوای ئه وشته که له گرێجەنه دەرچووه، کار گەیشتۆته ئەوجێگایەی به فەرمانی ڕیژیمی ئێران نەبێ لەجێی خۆیان نابزوون..ئه ومەڵبەندی ڕۆشنبیریەش یەکێکە لەو کاره نابەجێیانه که دەکرا نەکرابا…دیاره خەڵکی ڕۆژهەڵاتی کوردستان نه هێزی پشتیوانی زەمانی مام جەلال له یاد دەکه ن نه کردنەوەی سه رشۆڕانەی مەڵبەندی ڕۆشنبیری بەناوی خومەینی.

عومەر فاڕووقی سیاسیی ناسراوی خۆرهەڵاتی کوردستان، وێڕای لای وایە مەبەستێکی پاک لە پشت ئەو کارەوە نیە و کەرکووکیش شیاوی ئەو کارە نەبوو و دەڵێ: له بواری دیپۆماسیدا ئەوانه باوه که له تاران شه قامی ئایزنهاویر وبلواری ئەلیزابت هەبوو کاتی خۆی، ئێستاش پاێزگاری هەولێر بۆ خۆش خزمەتی حیزبەکەی و نەک له ڕووی بیروباوڕەوە  به منافقی و بۆ دزی و بەرتیل وەرگرتن ئەم کارەی کردووه که هێشتا هەڵوێستی سیستانی و سەدرو حەکیم،ڕوون  نیه بەڵام بە گشتی ئەمه سیاسەتی یەکیەتی نیشتمانی و کانۆنی سلێمانیه و دەبوا لەبەرانبەردا لانیکەم کۆڵانێکی ئێرانیان بەناوی مام جەلال  بکردایێت ویان مەعسومەی سەرۆک کۆمار ڕێزێکی هه بوایە لە لای ئێران… بە گشتی کەرکووک بو ئەم کاره شیاو نەبوو چاکتر وابوو له هەڵەبجه یان بیاره ئەوەیان بکردابا.

ئامانج عەزیزکەندی چالاکی خۆرهەڵاتی لەمبارەوە ڕای وایە ئەم کردەوانە نوێ نین و کوردیش هێشتا نەتەوە نیە و بەم شێوە بۆ ڕۆژی کورد دەپەیڤێ: ئه‌و هه‌ڵسوكه‌وته‌ی ئێستا له‌ باشوور ده‌كرێ، هیچ شتێكی نوێ نیه‌، مێژوویه‌كی دوور و درێژی له‌ پشته‌. ئه‌وانه‌ نه‌وه‌كانی ئه‌و گه‌له‌ خۆخۆره‌ن، كه‌ به‌ درێژایی مێژوو هه‌ر ئاوەها بووه‌ و تا ئێستاش هه‌ر له‌ سه‌ر ئه‌و پێودانگه‌ ده‌ڕوا. وه‌ك حاجی ده‌ڵێ: له‌ولاوه‌ ئه‌ویان به‌ حیلله‌ بازی، له‌ملاوه‌ ئه‌میان به‌ ته‌قڵه‌بازی، هه‌رچی نه‌شیاوه‌ ده‌كرێ و كراوه‌. له‌ هاتنه‌ ئارای ئه‌م جۆره‌ هه‌ڵسوكه‌وتانه‌، شه‌پۆلێك له‌ ناڕه‌زایه‌تی هه‌ڵده‌ستێ و بێ هیچ ده‌ره‌نجامێكی بنه‌ڕه‌تی، ئه‌م شه‌پۆلانه‌ ده‌نیشنه‌وه‌. بۆ ئێمه‌ی ڕۆژهه‌ڵاتی، با به‌و ئه‌زموونه‌ داڕزیوه‌ی باشوور هه‌ڵنه‌ڵێهین و حیزبه‌كانیشمان كڵاوی پاراستنی ئه‌و ئه‌زموونه‌ له‌ سه‌ر خۆیان و ئێمه‌ش داگرن،. چونكه‌ ئه‌و ئه‌زموونه‌، كه‌ فه‌ڕشی سوور و باوه‌شی گه‌رم بۆ تیرۆریستانی تێكۆشه‌رانی كورد ده‌كاته‌وه‌، ئه‌و ئه‌زموونه‌ی، كه‌ ئەرته‌شی تورك دێنێ و خه‌نده‌ك له‌ نێوان سنووری ده‌ستكردی كوردستان لێده‌دا و ئاڵای كوردستان ده‌كاته‌ ده‌مبه‌ستی كوشتاری كوردان. ئه‌و ئه‌زموونه‌ی یاده‌كانی داگیركه‌رانی كورد له‌ هۆڵی پێشه‌وا ده‌كاته‌وه‌ و سه‌نته‌ری ڕۆشنبیری ئیمام ده‌كاته‌وه‌ و قاسم و سلێمانی تێكه‌ڵ ده‌كا و زۆر گه‌نده‌كاری یتر….، شایانی پاراستن و دڵ پێ خۆشكردن نیه‌. (هه‌رچه‌ند به‌م وه‌زعه‌مانه‌وه‌ پێم وانیه‌ ئمه‌ له‌ وان باشتر ده‌بین). ئه‌وانه‌ ده‌ریده‌خه‌ن، كه‌ كورد هێشتا نه‌ته‌وه‌ نیه‌، كۆمه‌ڵێك خێڵ و بنه‌ماڵهی‌ن، شتێك به‌ ناوی به‌رژه‌وه‌ندی گشتی نه‌ته‌وه‌یی له‌ ناو ئه‌و خێڵ و بنه‌ماڵانه‌دا نیه‌. هه‌ر ئه‌و هۆكارانه‌شن كه‌ تا ئێستا هیچمان به‌ هیچ نه‌كردووه‌. ئه‌وه‌ حه‌قیقه‌تی مێژوویی و هه‌نووكه‌یی ئمه‌ی كورده‌.

نیعمەت مەلا چالاکی سیاسی کە کردنەوەی ئەو ناوەندە بە کردنەوەی دەرگایەکی تر بۆ ئێران لە باشوور پێناسە دەکات لەو بارەوە بۆ ڕۆژی کورد دوا و گوتی:

بە درێژای دەسەڵاتی ئایەتوڵڵاکان لە ئێران و بە هاتنە نێو گۆڕەپانی تەیفێکی شیعە لە دەسەڵاتی ئێراند، وایکرد کە کەسانێکی وەکوو “خومەینی” فتوای جیهاد بەدژی گەلی کورد بدەن و بەمەش نەوەستن و بیر و هزری ئەو کەسە دوای مردنیشی ببێتە هۆی ئەوەی ڕۆژانە لاوانی کورد لە ژێر ستەمی دەسەڵاتێکی تا سەر ئێسقان دژی ئازادی کورد و لە جوگرافیایەک بەناوی ئێراندا لەسێدارە بدرێن. یان ئەوەی کە دژ بەهەرجۆرە پێشکەوتنی لاوان لە ناوچە کوردیەکان بدرێ. ئەمە سەرەتای پرسیارەکانە، سەرەتای ئەو پرسیارانەی کە ئاخۆ بەراستی دەسەڵاتی خومەینی، بیری و هزری ئەو لەدوای مردنیشی کە هەمان ناردنی بیری شیعەگەرایی و سەدان هەوڵی دیکە بۆ روخاندنی پەیکەرەی ئاشتی لەنێو کورد و وڵاتانی دراوسێی بەتایبەت، ئێستا بە هەوڵی کێ بۆ دەرەوە سنوورەکانی ئێران پەلکێش بکرێ و بەڕێوەدەچێ؟ ئاخۆ کرانەوەی دەزگایەکی بەناو سەنتەری ڕۆشەنبیری و وەرزشی خومەینی، ئەویش لە شارێکدا کە کێشەی سەرەکی کورد لە باشوور و بەغدایە، بە چ مانایەک دێ؟ بۆ لە رۆژهەڵاتی کوردستان هێشتا پڕۆژە نیوە چڵەکانی حکومەتی زاڵ بەسەر ئەو بەشە لە کوردستان بە کۆتایی ناگەن و ئەو داهاتەی دەبێ بۆ ئەو شوێنانە تەرخان بکرێ، تەرخان ناکرێ؟ کرانەوەی ئەو جۆرە شوێنانە، زیاتر بۆ دژایەتی کورد و بۆ دەسەڵاتی ئەو حکومەتەیە کە کورد خەریکە بە شەل و کوێری بەرێوەی دەبا. لەم نێوەدا کەسانێکی باڵای حیزبێکی سیاسی وەکوو یەکیەتی نیشتمانی دەبێ بەشداری ئەو جۆرە رێورەسمانە بن؟ ئاخۆ ئووسوولی دیپلۆماسی لەلای بەرێزانی نێو یەکیەتی نیشتمانی چۆنە؟ بۆ دەبێ سەردانی کەسە باڵاکانی حکومەتی ئێران بۆ هەرێم لەپێشدا بۆ سلێمانی کە زۆرکەس بە حەوشەی پشتەوە ئێران لە هەرێمی دەزانێ، تەنانەت لەلایەن ئەندامانی رێبەری یەکیەتی نیشتمانیەوە پێشوازی لێ بکرێ؟ ئەمەجاری یەکەم و بەم شێوەیە کە دەچتە پێش، جاری دوایین نابێ کە لایەنێکی سیاسی کە لەنێو حکومەتی هەرێمدا وەزیر و وەزاڕەتی هەیە، رووی دەدا. ئەدی عورفی دیپلوماسی چی بەسەر هاتووە؟ ئاخۆ یەکیەتی نیشتمانی لە ناوچەیەک کە ناوی “ناوچەی سەوزی” لەسەر نراوە بەم شێوەیە هەڵسووکەوت بکا؟ بۆ دەبێ ئیزنی ئەوە بدرێ جارێک کتێب لە وەسفی خومەینی و ئەم جارەش سەنتەر، ئەویش سەنتەری رۆشەنبیری بەناو خومەینی بکرێتەوە؟ ئەدی دەسەڵاتی وەزاڕەتی رۆشەنبیری چی پێهاتووە؟ ئەدی حکومەتی هەرێم لەم نێوەدا چ دەکا؟ ئەمڕۆ ئەوەیە سبەی چی دەبێ؟ هێشتا فایلی ئەو کەسانەی لەلایەن حکومەتی ئێرانەوە، ئەویش لە هەرێمی کوردستان تێرۆر یان رفێندراون، نەبەستراوە و زۆربەشیان بێ وڵام ماونەوە. سبەی چ ڕووداوێکی دیکە ڕوو دەدات و قەرارە چ بکرێ، ئاخۆ تۆ بڵەی پێرێ حوسەینیەی سلێمانی، دوێنێ لەبنکەی وەزاڕەتی ئیتلاعاتی ئێران لە سلێمانی و ئەمڕۆ لە سەنتەرێک ئەویش رۆشەنبیری هەوڵ بۆ تێرۆری نەدرێ؟ ئەویش تێرۆری مێشکی کوردان لەو بەشەی کوردستان؟ سبەی قەرارە چ شوێنێکی دیکە بۆ جیاکردنەوەی بیر و هزری لاوان کە داهاتووی هەر نەتەوەیەکن یان گۆشەیەکی دیکە لە کوردستان نەدرێ؟ ئەمانە تۆقینەرە. ئەگەر ئەمڕۆ پێشی پێ نەگیرێ، سبەی دانەهاتوویەکی ناڕوون، کە ئێمە قەرارە سازی کەین، بۆ دەبێ بەهێنانە کایەی دژبەرانی خۆمان بۆنێو گۆڕەپانی سیاسەت و رۆشەنبیری ڵێڵ بکرێ. هیوادارم دۆستان و هاوخوێنانی خۆمان ئەگەر لانی کەم وەخەبەر نایەن ئسوولەکانی دیپلۆماسی لەبەرچاو بگرن و غورفی پێوەندیەکان سەرلە نوێ دابڕێژنەوە.

جەلال جەماڵی مامۆستای پێشووی قوتابخانە و چالاکی سیاسی سەرنج دەداتە هەندێ پرسیاری تایبەت لەمبارەوە و بەم شێوە ڕای خۆی بۆ ڕۆژی کورد خستە بەر باس و دەڵێ: مەبەست لە کردنەوەی سەنتەری قێزەونی ڕۆشنتێری خومەینی لە کەرکوک چییە؟ هۆرتەوبەرەی ئەو مەڵبەنده کێ داویەتی وچ ئامانجێکی لەپشتە؟ بەرامبەرەکانی ئەو کارە دەبێ چ باجێک بدەن؟ و  زۆرپرسیاری تر سەرنجمان ڕادەکێش ,! لەڕاستیدا بەدرێژایی مێژوو حیزبەکانی باشوری کوردستان هیچ خاوەنی هۆشیاری سیاسی وغەڕەی نەتەوایەتی نەبوون ویان لانیکەم لەهەمبەر کوردستانی ڕۆژهەڵاتدا هەمیشە بێ ئەمەگی وبێ ڕێزی ڕەوتی سیاسەت وخەباتیان بووە وبۆ گەییشتن بەئامانجەکانیان بێ تێبینی بەرژەوندی و وەجی حیزبەکانی ڕۆژهەلات بەسەریاندا پەڕیونەوە و ئاوڕێکیان نەداوەتەوە و بەپێچەوانە هەرکات کەوتوونە تەنگ و چەڵەمە، کوردستانی ڕۆژهەلات باوەشی برایەتی بۆکردوونەوە حیزبەکانیش هاندەربوون لە بەهاناوەچوونیان و پشتگیری بێ ئەملاولایان لێکردون وهیچیان بەسەرچاودانەداونەوە و شەریکی ناخۆشیەکانیان بوون وبەسەرکەوتن و دەستکەوتەکانیان سەرخۆش بوون، بەڵام ئایا ئەو ئەخلاقە سیاسیە هەتاسەر بۆیان دەچێتە سەر؟ بێگومان نا! ئەخلاق هەوێنی سیاسەتی پاراو و گونجاوە و بێ ئەخلاقی سیاسی مەحکوم بە نابودی وتێداچوون بوو،  دکتورقاسملوو ڕێبەری پایەبەرزمان سیاسەتی بەهونەری مومکین ناوبردوەو لەگەڵ ئەوەشدا هەمیشە ئەخلاقی سیاسی لەبەرچاو بووە. بەرژەوەندی حیزبەکەی نەبۆتە هۆی پێشێل کردنی بەرژەوندی حیزب و پارچەکانی تری کوردستان، هەرئەوەش جێگە و پێگەی تایبەتی و هەتاهەتایی لەناو دلی کۆمەلانی خەڵکدا کردەوەو یادی هەمیشە بەرزەو. بچوکترین نموونەی ئەخلاقی سیاسی دوکتوری شەهید ئەوەیە کە هیچ کات سەددام حوسێن نەیتوانی تڵیشێک بخاتە نێو هەستی کوردایەتی قاسملوو و نەیتوانی بۆ سەرکوتی حیزبەکانی باشوور زەفەری پێ ببینێ وهەستی نیشتمانپەروەرانەی شەهید تا ئاستێک بوو کەهیچ  کەس وێنەیەکی دکتوریان لەگەل سەددام نەبینی بۆ ئەوەی دڵی کوردستانی باشوور بریندار نەکات ئەوە لە کاتێکدایە کە سەرکردەکانی باشوور فەڕشی سوور بۆ بکوژەکەی ڕادەخەن و بە ترۆمبیلی تایبەتیی خۆیان بە کۆڵانەکانی هەولێردا پیاسەی پێدەکەن و لەناو زەوی بابەگوڕگوڕدا مەڵبەندی ڕۆشنبیری بەناوی خومەینی گۆڕبەگۆڕ وهەیولای دژی نەتەوەی کورد دەکەنەوە و بە مجۆرە ئەقڵیەتی سیاسیی خۆیان دەردەخەن وغیرەتی نەتەوایەتیان دەشکێنن، کردنەوەی سەنتەرێکی وەرزشی لەکەرکووک بەناوی کەسێک کە بایی توورێک شارەزایی لەسەر وەرزش نەبووە و گەورترین دوژمنی نەتەوەی کوردە، چ پەیامێک دەگەێنێ غەیری نۆکەری وسەرشۆری، خۆبەدەستەودان؟ .جێگەخۆش کردن بۆ حەشدی شەعبی وهەل ڕەخساندن بۆ ڕاهێنانی تیرۆریستە دەست پەروەردەکانی ڕژیمی کوشتار ئاکامی گەورەتری ئەو سیاسەتەیەوکۆیلەتی وژێردەستی دەرەنجامەکەیەتی.

وریا ڕەحمانی ڕاگەیێندکار و چالاکی سیاسی، کردنەوەی ئەو ناوەندە بە بێ ڕێزی بە کەرامەتی تاکی خۆرهەڵاتی دەزانی و لەمبارەوە هەوڵوێستی خۆی بەو جۆرە خستە بەر باس: گلەیی لە دۆست دەکرێ نەک لە دوژمن. بەداخەوە باڵی دەست ڕۆیشتووی ئێستای نێو یەکێتیی نیشتمانی، دەمێکە ڕێگەی خۆی لە ئێمە جیا کردۆتەوە و لە بەرەی دژبەری بزووتنەوەی ڕزگاری خوازیی کورد لە ڕۆژهەلاتی کوردستاندا جێی گرتووە. کردنەوەی ناوەندێکی فەرهەنگی وەرزشی بە ناوی خومەینی لە کەرکووک لەژێر سێبەری یەکێتیی نیشتمانیدا ئەگەرچی لەسەر ئەرکی کۆماری ئیسلامی پێکهاتووە کەچی لە هەوێنی خۆیدا هەڵگری بێ ڕێزی و نادیدە گرتنی هەست و کەرامەتی کوردی ڕۆژهەلاتە کە ماوەیەکە لەگەڵ نزیکتر بوونەوەی هەرچی زیاتری یەکێتی بە کۆماری ئیسلامی بریندارتر دەبێ. بەلام بەدڵنیاییەوە مێژوو هەمووی ئەوانە لەنێو خۆیدا دەپارێزێ، با ئێستاش تەنیا ددان بەسەر جەرگی خۆیدا بگرێ. ئەم سیاسەتە چەوتەی کە ئێستا بەشێک لە سەرکردایەتیی یەکێتی بەرانبەر خەڵک و بزووتنەوەی رۆژهەڵات لەکاری دەکەن بەدڵنیاییەوە لە داهاتوودا بەرۆکی نامەسئولانەیان دەگرێتەوە.

هەڵاڵە قازی، چالاکێکی تری خۆرهەڵاتی کوردستان لەو بارەوە هەڵویستی گرت و بۆ ڕۆژی کورد دوا و گوتی: کردنەوەی سەنتەری ڕۆشنبیری بە ناوی خومەینی لە کەرکوک لە کاتێکدا کە هێزی پشتیوانی حیزبی سەر بە هیرۆخان چەند ین ساڵ لەمەوبەر لە ڕۆژهەلات بۆ پارێزگاری لە گیان و ناموسی ژنان و منداڵانی ڕۆژهەلات بە دژی خومەینی و سیاسەتی دژە کوردی کۆماری ئیسلامی ئێران خەباتیان کرد و شەهید بوون…، جگە لە ڕشانەوە بە سەر خوێنی ئەو شەهیدانە و تەواوی شەهیدانی ڕۆژهەلات و زیندانیە سیاسیەکانی ڕۆژهەلات چی دیکە نیە.  لە باشووری کوردستان زیاتر لە ٨٠٠٠ پیشمەرگە بۆ پارێزگاری لە خەڵک و خاک شەهید بوون. ئەو حیزبانە دەبا بیریان لەوە کردباوە کە چەندین شوێنی خێرخوازی و ڕۆشەنبیری و کتێبخانە بە ناوی شەهید مامە ڕیشە و شەهید سورجی  و سەدان شەهیدی تر …..بکەنەوە  نەک لە دڵی کوردستاندا بۆ دیکتاتۆریێک کە جگە لە ماڵ وێرانی و کوژران و بڕین هیچ دیارێکی دیکەی نە بۆ بەشەریەت و نە بۆ کورد هەبۆ. هیرۆ خان دەیهەویت ریز لە دامەزرانی کۆماری پئیسلامی و خومەینی بگریت دەی توانی میوانی جەماران بیت.وەک عورف و عادەتی هەموو سیاسەتمەدارێک کە نیشتمانی خۆی خۆش دەوێ و ڕێز بۆ جیرانەکانیان دەگرن، نەک ببێتە میواندار.

عەبدووڵا ڕەسووڵی، چالاکی سیاسی مەدەنی خۆرهەڵاتیش لە هەمبەر ئەو کردەوە نانیشتمانییە هەڵوێستی خۆی بۆ ڕۆژی کورد خستە بەر باس و دەڵێ : سەبارەت بە كردنەوەی ناوەندیی رۆشنبیریی خومینی لە كەركوك پیویستە بڵیم كە ئەو بابەتە رەهەند، هۆكار و ئامانجی جۆراوجۆریی هەیە. بەڵام من نامەوێت لێرەدا هەموو ڕەهەند، هۆكار و ئامانجەكانی شی بكەمەوە. لەبەر ئەوەی زۆربەی ڕەهەند و هۆكارەكان لای هەموان ڕوونە. ئەوەی زۆرتر پێویستە گرنگی پێبدەین ئەوەیە كە ئامانجەكان ڕوون بكەینەوە. شیكردنەوەی ئامانجەكانیش پەیوەندی بە دوو لاوە هەیە یەكەم ئامانجەكانی یەكیتیی نیشتمانی كوردستان لە كردنەوەی سەنتەر و دووەم ئامانجەكانی كۆماریی ئیسلامی.

 حكوومەتی كۆماریی ئیسلامی ئیران لە كردنەوەی ئەو سەنتەرەدا ئامانجی ئەوەیە كە ناوەندیكی دیكە زیاد بكاتە سەر ناوەندەكانی بلآوكردنەوەی فكر و كولتووریی خۆی لە  باشووریی كوردستان و لەو ریگایەوە بتوانیت زیاتر لە پیشوو دزە بكاتە ناوچەكە و ئامانجە سیاسی و ئەمنیەتییەكانی خۆی بپیكیت. هەروەها لە ئاستی ئیداریش بە هۆی ئەوەی شاریی كەركوك  تەنها شاریكە كە بە تەواویی بە دەستی ئەو باڵەی یەكێتیی نیشتمانییەوە كە  زۆر نزیكن بە ئێرانەوە ئەوا لە بواریی ئیدارییەوە دەرفەتی باشتریان بۆ جێبەجێكردنی دەڕەخسا هەتا ئەو ئاستەی كە ئەنجوومەنی پاریزگاش ئاگاداریی پرۆذەیەكی وەها لە نیو شارەكەدا نەبووە و لە سەروەی ئەنجوومەن كارەكەیان بۆ كراوە.

 یەكیتیی نیشتمانیش بە هۆی دۆخی ناوخۆی  حیزبەكە و كیشەكانی هەریمی كوردستان  تووشی بارودۆخیكی نالەبار بووە  بەو بۆنەیشەوە لە ئیستادا زیاتر لە پیشوو خۆی خزاندووەتە باوشی ئیرانەوە و هەموو پرنسیپە سیاسییەكانی پشت گوی خستووە و  ئەم كارەش ئەنجامی ئەو جۆرە پەیوەندیە ناشیرینەیە كە چەندین ساڵە  لەگەڵ ئیران هەیانە و لە ئیستادا ناشیرینترین سیمای پەیدا كردووە.   كردنەوەی ئەم سەنتەرە شتیكی زۆر گرنگی بۆ كورد ڕوون كردەوە ئەویش ئەم بابەتەیە كە لە ئیستادا هەندی لایەن هیچ گرنگی بە ئاسایش و ئامانج و بەرذەوەندی نەتەوەیی نادەن و ئامادەن بۆ مانەوەی خۆیان هەموو  ریگایەك بگرنەبەر، بۆیە پیویستە كورد بە تیكرا لانیكەم لە بواریی دەڕوونییەوە تەكلیفی خۆی لەگەڵ ئەم كەسانەدا یەكلایی بكاتەوە و دەرگاكانی بە ڕووی دوذمنی ڕاستەقینەدا دابخات.

نەرمین عوسمانی، چالاکوانی سیاسی و مافی ئافرەتان ئەو شوێنە بە مۆڵگەی کۆماری ئیسلامی ناودەبات و ئاوا نرخاندنی بۆ دەکات: کردنەوەی مۆڵگەیەکی سیخوڕی بە نێوی سەنتەری ڕۆشەنبیری و وەرزشی لە ” کەرکووک” و نێودێر کردنی بە سەنتەری ڕۆشەنبیری و وەرزشی خومەینی، دیکتاتۆر و جنایەت کارێکی کە تاوانبارە بە قەتڵ و عامی  هەزاران خەڵکی بێ دیفاعی کوردستان و دەرکردنی فتوا لە دژی خەڵکی کوردستان، بەرهەمی نائاگایی سیاسی و لاوازی بیری نەتەوایەتی ئەو کەس و لایەنانە دەگەیەنێت کە ڕێگا خۆشکەرن بۆ دەستێخەرییەکانی کۆماری ئیسلامی لە باروودۆخی سیاسی هەرێمی کوردستان.

کاوە کەریمی ڕۆژنامەوان و چالاکی سیاسی ئەو دیاردەیە لە باشوور بە دیاردەیەکی نوێ و نامۆ نازانێ و لەمبارەوە نێرینی خۆی بۆ ڕۆژی کورد باس کرد و گوتی: کردنەوەی بنکەی ڕۆشنبیری بەناوی دامەزرێنەری کۆماری ئیسلامی لە کەرکوک، ناشێ دیاردەیەکی نوێ و نامۆ بێت؛ هۆکاری لۆژیکی و ئاسایی بوونی ئەو دیاردەیە بەڕای من بۆ سەرکەوتنی ڕێژەیی بلۆکی شێعە لە ناوچە جێناکۆکەکانی کۆماری ئیسلامی و تورکیە-سعودیە دەگەڕێتەوە. هاتنی داعش و بەردەوامبوونی تائێستا، خۆشحاڵیی و ڕەزایەتی بەشێک لە لایەنە کوردییەکانی بەدواوە بووە، لەبەر ئەوەی بە خەیاڵی ئەوان مەترسیی داعش دەوڵەتی ناوەندیی ئێراق بەڕادەیەک سەرقاڵ دەکات، کە نایپەرژێت لەمپەر لە سەر ڕێگەی سەربەخۆییدا دروست بکات، ئەو لێکدانەوە پشتئەستورە بە کۆنترۆڵکردنی کەرکوک و دەشتی نەینەوا لەلایەن هێزی پێشمەرگەی باشوور… ؛ لەو بەینەدا وەک بینیمان لایەنەکانی ڕۆژهەڵات نەیانتوانیوە لە مەیداندا بن و سوودو دەسکەوتی کردەوەییان ببێت، ئەوەی هەیە بەشداریکردنی جاربەجارو سنوورداریانە لە بەرەکانی شەڕی داعش، ئەویش بە دزیی کۆماری ئیسلامیەوە!  کۆمەڵەکان و دێموکراتەکان بە ڕوونی ئەو هەلەیان لەدەستچوو کە بتوانن بۆ خۆنیشاندانیش بێت، بەشێک لە بەرەی ئاشکراو جدیی شەڕ دژ بە تێرۆر بن لە سوریەو ئێراق، خودی ئەو ئامادەبوونە دەیتوانی هەلێکی دیپلۆماتیکی جدی بێت، بۆیە دامەزراندنی بنکەیەک بەناوی دامەزرێنەری کۆماری ئیسلامی لەو شارەی ناوی دڵی کوردستان ی لێنراوە، پێش ئەوەی ئاماژە بۆ بێئەخلاق بوونی پارێزگاری کەرکوک و بەرپرسانی باڵای یەکێتی و حکومەتی هەرێم بێت، ئاماژە بۆ خەوی قورسی لایەنەکانی ڕۆژهەڵات و بەتایبەت کۆمەڵەو دێموکراتەکانەو بەو ڕادەیەش نامۆبوونی چەمکی بەرپرسایەتی لای ئەوان.

 

سه‌رنج و كۆمێنت

كۆمێنت

‎وه‌ڵام بده‌وه‌