لە نەخۆشخانەکانی سنە و سەوڵاوا بەشی تایبەت بۆ بریندارانی شەڕ کرایەوە

0
93

ڕۆژی کورد: بەپێی هەواڵی هەواڵنێری ڕۆژی کورد لە سنە، ئەمڕۆ بە هۆی برینداربوونی لەڕادەبەدەری هێزەکانی رژیم لە شەڕی “بۆڕییەر”، نەخۆشخانەی “بێعسەت” ـی شاری سنە، بەشی تایبەتی بۆ ئەو برینداربووانە کردۆتەوە.

بەپێی زانیارییەکانی ڕۆژی کورد، ڕێژەیەکی زۆر و بەرچاو لە جاشەکانی ڕژیم لە شەڕی “بۆڕییەر” بریندار بوون و چەند کەسیشیان کە مەزندە دەکرێ ٨ کەس بن، لەو تێکهەڵچوونەدا کوژراون.

ڕێژەی برینداربووانی هێزەکانی سپای تیرۆریستیی پاسدارانی ڕژیم لە شەڕ لەگەڵ ٢ پێشمەرگەی حیزبی دێموکراتی کوردستانی ئێران بە ڕادەیەک زۆر و بەرچاوە کە لەگەڵ ئەوەدا کە نەخۆشخانەی سەوڵاوا بە گشتی بۆ پێڕاگەیشتن بە برینداربووەکان تەرخان کراوە، بەڵام بە هۆی نەبوونی توانایی تەواو و زۆربوونی بریندارەکان، ئەمڕۆ و بە پێی فەرمانی بەرپرسانی شاری سنە، بەشێک لە نەخۆشخانەی بێعسەتی ئەو شارە بۆ جاش و پاسدارە برینداربووەکانی ئەو شەڕە تەرخان کراوە.

هەواڵنێری ڕۆژی کورد لە سنە پشتڕاستی کردەوە کە ئەمڕۆ ئیزنی هیچ کەس نەدراوە بچێتە ناو ئەو بەشەی نەخۆشخانەی بێعسەت ـی سنە و نەخۆشخانەی سەوڵاواش هیچ نەخۆشێکی دیکەی وەرنەگرتووە.

لە شەڕی ١٥ی پووشپەڕ لە گوندی “بۆڕییەر” دوو کەس لە پێشمەرگەکانی حیزبی دێموکراتی کوردستانی ئێران بە ناوەکانی کاوە جەوانمەرد و سەرکەوت سەمەدی پاش توابوونی تەقەمەنییەکەیان، بۆ ئەوەی بە زیندوویی و دیلی نەکەونە دەست هیزەکانی ڕژیم و جاشەکان، بە نارنجەک خۆیان شەهید کردووە.

ڕۆژی کورد بەردەوامە لە کۆکردنەوەی زانیاری لەمەڕ ئاماری کوژراوان و برینداربووان و ناسنامەکانیان.

سه‌رنج و كۆمێنت

كۆمێنت