به‌رنامه‌ی كرۆنیكی ڕۆژی كورد ، به‌شی یه‌كه‌م ڕه‌وشی كوردستانی ڕۆژئاوا

0
394

به‌رنامه‌ی كرۆنیكی ڕۆژی كورد ،له‌ لایه‌ن ڕۆژنامه‌نووس ئه‌رده‌ڵان عه‌بدوڵڵاهیه‌وه‌ ئاماده‌ و پێشكه‌ش ده‌كرێ ، له‌و به‌رنامه‌یه‌ دا به‌ میوانداریی كه‌سانی شاره‌زا  هه‌ر جاره‌و باس و بابه‌تێكی گرینگ دێته‌ به‌ر باس و لێكدانه‌وه‌ .

له‌ به‌رنامه‌ی ئه‌و جاره‌ دا باس له‌ دۆخ و ڕه‌وشی سووریه‌ به‌ گشتی و كوردستانی ڕۆژئاوا به‌ تایبه‌تی ده‌كرێ

هاوكات له‌ گه‌ڵ سه‌رهه‌ڵدانی شۆڕش له‌ به‌شێك له‌ وڵاتانی عه‌ره‌بی كه‌ دواتر به‌ به‌هاری عه‌ڕه‌بی ناسرا ، له‌ وڵاتی سووریه‌ش به‌ دژی رژیمی به‌عس خۆپێشاندان و ناڕه‌زایه‌تی سه‌ریهه‌لدا یه‌كه‌م خۆپێشاندانه‌كانی ناڕه‌زایه‌تی به‌ دژی ڕژیمی به‌شار ئه‌سه‌د له‌ ڕۆژی ٢٦ی ژانویه‌ ٢٠١١ واته‌ ٦ی ڕێبه‌ندان ١٣٨٩ی هه‌تاوی به‌ شێوه‌ی هێمنانه‌ به‌ڕێوه‌ چوو به‌ڵام له‌ گه‌ڵ سه‌ركوت و هێرشی هێزه‌ نیزامیه‌كانی ڕژیمی به‌عس ڕووبه‌ڕوو بۆوه‌ و به‌شێكی به‌رچاو له‌ خه‌ڵكی مه‌ده‌نی له‌ لایه‌ن هێزه‌كانی ڕژیمی سووریه‌وه‌ ده‌ستبه‌سه‌ر كران و كۆمه‌ڵێك كه‌سیش كوژران ، به‌ پێی ئاماره‌كان تا رۆژی ١٠ی فێوریه‌ی ٢٠١٢ زیاتر له‌ ٨هه‌زار كه‌س له‌ خۆپێشانده‌ران كوژران و بریندار بوون . و تا ئه‌وڕۆش كوشت و كوشتار له‌و وڵاته‌ هه‌ر وا به‌رده‌وامه‌ و ئاماره‌كان باس له‌ كوژران و بریندار بوونی و ئاواره‌ بوونی زیاتر له‌ سه‌دان هه‌زار كه‌س ده‌كه‌ن … ڕژیمی سووریه‌ ژن و منداڵ و خه‌ڵكی بێتاوانی دایه‌ به‌ر ده‌ستڕێژی گولله‌ و خۆی له‌ بوردومانی شار و گونده‌كانی سوریه‌ نه‌پاراست و له‌ دوایین جینایه‌تی خۆیدا ده‌یان منداڵ و خه‌ڵكی بێتاوان به‌ هۆی گازی شیمایی بوونه‌ قوربانی و گیانیان له‌ ده‌ست دا .

دیاره‌ سه‌رجه‌م ئه‌و جینایه‌تانه‌ی ڕژیمی سووریه‌ به‌ شێوه‌ی ڕاسته‌وخۆ له‌ لایه‌ن كۆماری ئیسلامیی ئێران و ده‌ست و پێوه‌نیدیه‌كانیه‌وه‌ به‌رنامه‌ی بۆ داڕێژراوه‌ و به‌ڕێوه‌ چوون .

شه‌ڕی ناوخۆیی له‌ سوریه‌ تا ڕاده‌یه‌ك په‌ره‌ی سه‌ند كه‌ كۆمه‌ڵێك ڕێكخراوی تیرۆریستی سه‌ریان هه‌ڵدا و سووریه‌ به‌ره‌و وێرانی و خه‌ڵكه‌كه‌ی به‌ره‌و له‌ ناوچوون ڕۆیشتن .

به‌ڵام له‌ كوردستانی ژێر ده‌سه‌ڵاتی ڕژیمی سووریه‌ ، گه‌لی كورد كه‌ زیاتر له‌ ٤ ملیون كه‌س حیشیمه‌تیان هه‌یه‌  پێشتر نه‌ خاوه‌ن ناسنامه‌ بوون و نه‌ وه‌ك كورد دانیان پێداده‌نرا ، ئه‌و جار به‌ شێوه‌یه‌كی دیكه‌ پرسی كورد كه‌وته‌ ڕۆژه‌ڤه‌وه‌ و بوو به‌ پرسێكی ناوچه‌یی و ته‌نانه‌ت جیهانی ، كورد له‌و پارچه‌یه‌ ده‌رفه‌تێكی مێژوویی بۆ خوڵقا ، به‌ڵام تا چه‌ند ده‌توانێ بۆ گه‌یشتن به‌ خواست و مافه‌كانی ئه‌و هه‌له‌ بقۆزێته‌وه‌ ، پرسیارێكه‌ كه‌ بێ وه‌ڵام ماوه‌ته‌وه‌ .

ئایا كورد له‌و ڕه‌وشه‌ی له‌ سووریه‌ هاتۆته‌ پێش تا چه‌ند ده‌توانێ به‌ قازانجی خۆی كه‌ڵك وه‌ربگرێ و لایه‌نه‌كانی دژبه‌ به‌شار ئه‌سه‌د و به‌ تایبه‌تی كورده‌كان چۆن له‌و دۆخه‌ ئاڵۆز و قه‌یرانیاویه‌ی وڵاتی سووریه‌ی تێكه‌وتووه‌ ده‌رباز ده‌بن

ئایا هێڕشی نیزامی ئه‌مریكا و هاوپه‌یمانه‌كانی ده‌بێته‌ بناغه‌یه‌ك بۆ گه‌یشتنی گه‌لی سوریه‌ به‌ گشتی و كورد به‌ تایبه‌تی به‌ ویست و داخوازیه‌كانی

نه‌قشه‌ی جوغرافیی سووریه‌ی داهاتوو چۆن داده‌ڕێژرێته‌وه‌ و كورد له‌ كوێی ئه‌و هاوكێشه‌یه‌ دا جێگه‌ بۆ خۆی ده‌كاته‌وه‌ و به‌ گشتی سه‌نگ و قورسایی كورد له سوریه‌ چۆن ده‌بێ .

سه‌رنج و كۆمێنت

كۆمێنت