بلوچستان ءِ راجی جنزءِ دیمپان چے اَنت؟

سیمی بهر

ناتپاکی ءُ برات کشی

مئی راجدپترءِ یک بژنیگی بهرے دوارسوچیں وت ماں وتی جیڑه ءُ برات کشی یانی باروانت۰ چه  چاکرشیهک ءُ میر گوهرام نودبندگ ءِ دور بگر تاں مروچی همے اڑ راجی جهد ءِ مزنیں دیمپانے بوتگ۰ ما را منّگی انت که بلوچ راج ءِ دژمناں چه اے اڑ ءُ مئی ناتپاکی باز نپ ءُ سیت رستگ۰
بلوچانی هنوگیں لدیگی دژمن بزاں پارس ءُ پنجاپی ءُ نوک مسلمانیں هندوستانی مهاجر گوں وتی انسان دژمنیں پندلاں ءُ اے دیمپان ءِ  مزن کنگ ءَ  لوٹنت  مئے راجی وجود ءُ پجّارءَ آس ماں دارنت۰ آ لوٹنت ما  گار بئین ءُ مئے راجے پجّار گمسار به بیت۰  برات کشی ماں بلوچستانءِ رودراتکی ءُ رونشتی بهراں دیرانت چه انداز ءَ گوستگ۰
شومیں ۱۹۲۸ سال ءَ بگر تاں مروچی بے شمار بلوچ ماں وت ماں وتی جنگاں بیران ءُ بیگواه بوتگنت۰  هچ کس یا که اداره یے نزانت که چنت هزار بلوچءِ زند برات کشی ءِ سوب ءَ  سوتکگ انت۰ ایش که سرجم ءَ چنت هزارشیرزالیں مات سوگیگ بوته ءُ چنکه گوهار جنوزامی پچ گور کتگ ءُ  ملک ءِ یتیم ءُ چوره یانی هساب چنکرانت هچ کس یا هوربندے ءَ  مالوم نهنت۰ اگاں چه اے بربادی لدیگی دژمن ءِ لوٹ اَنت بلئے هما بلوچ  که برات کشی کنگا ینت هم باز میاریگ انت۰ آ گوں وتی دست ءُ دژمن ءِ تپر وتی باسکاں وت گڈِّتگ انت۰  آ دژمناں شاد کتگ ءُ بلوچان سوگیگ۰
چاکرشیهک تُرک ءُ پٹاں آورت انت ءُ لوٹت  لاشاری یاں ولگوج بکنت ءُ هستنت مرچی هنچیں  بلوچ که چنت کرن رند چه چاکرءَ گوں درآمدان هوارنت ءُ  برات کشی جنگ ءِ آس اِش روک داشتگ۰

اگاں چه انگت دژمن گوں هما کوهنیں پندلاں بلوچاں میڑینگاینت بلئے بلوچ هوربندانی جنگ دیگ ڈیه ءِ بدواهانی تاوانبار ءُ  نوکیں پندلے انت۰  گوستگیں دور ءَ اگاں وت ماں وتی جنگ چنت نپر ءُ ٹکّانی نیام ءَ بوتگ مروچی بلوچی هوربند ماں دژمن ءِ اے دام ءَ کپگاینت۰  اے چیریں گپے نهنت که لهتیں بلوچ گوں پنجاپی ءُ پارس واکداراں هورانت ءُ دوارسوچیں وت ماں وتی جنگے ءِ آس ماں ملک ءِ رودرارتکی ءُ رونشتی بهراں روک داشتگ۰
همے ناهودگیں جنگ ءُ برات کشی یاں ڈیه ءِ راجی جنزءَ باز تاوان داتگ۰ اداں نبیسگ لوٹیت که گوستگیں سئےسال ءَ چنت نپر چه ملک ءِ  رودراتکی نیمگ ءَ ایران ءِ لدیگی سپاه قدس ءِ باهوٹ بوتگنت۰ ایرانی واکداراں لوٹنت که اے باهوٹاں په یک دپارے ءُ تپنگے رونشتی بلوچانی راجی جنزءِ هلاپ ءَ  کار بگرنت تنکه یک نوکیں برات کشی ءُ جنگے ءِ آس ءَ بلوچ هوربندانی نیام ءَ روک بکننت
۰ اے همک سرپدیں بلوچ ءُ راجی رهشونانی اگده اِنت تاں ایرانی سپاهءِ پندلاں پروش بدینت ءُ سلهبندیں باهوٹاں پوه ءُ سرپدبکننت که دوست کئے اَنت ءُ راج ءِ دژمن کئے اَنت۰ آهاں چه رونشتی بلوچستان ءِ راجدپترا سرپد کنگی انت۰

آزات ءُ آباد بات گنجيــــں بلوچستـــــــــان
پروشت ءُ پروش باتنـــت ايران ءُ پاکستان
محمد کريم بلــوچ