چنت روچ انت که الاحـوازءِ مردم جَه جتگ ءُ وت تواراِش ڈنی یں پارسیانی هـلاپ ءَ چست کتگ۰ آدینگ ءُ شمبه ءِ روچاں ایرانی سپاهیگ ءُ لشکر نارازیں عـرب مهلوک ءِ سرا تیرگواری کت ءُ یکرندے دگه اے ایردستیں مهلوکءِ هون ریتک انـت۰ الاحوازی ورنا پارسیانی چگلی چنت ادارهءِ بنجاه ءُ بسیجی بُندر سوتکنت۰
اَلاَحـوازالعربی که پیش ءَ عربستــان هم گوشگ بوتگ عربی ملک ایت ءُ نود سال انت پارسیاں آوارجتگ۰ اے کوهنیں ملک ءِ گُـڈی بادشـاه « شیخ خَـزعَـل » اَت که رضا میرپنچ ءَ گوں انگریزانی هم شوری سال ۱۹۲۵ عیسایی تهـران ءَ لوٹائینت۰ آ گوں پندلےءَ تهـران لوٹائینگ بوت۰ رضا میرپنچ ءُ انگریزان هـوری ءَ کامیاب بوتنت تاں آ مزن مرد ءَ ماں « مذاکـره » ءِ دام ءَ ماں تریننت۰ هنچوش که «شیخ خَـزعَـل» تهران ءَ سربوت اوداں ماں یک لوگے په زور دارگ بوت ءُ چه دگه نیمگے پارس ءِ رستریں لشـکر الاحـواز ءِ سرا ارُش بُرت۰ بازیں مردم اش کشتنت ءُ بیشمار دسگرکتنت ءُ آ ملک اِش آوار جت۰عربانی مزن نامیں «شیخ خزعل» ماں تهران ءَ شهیــد گنگ بوت۰
الاحواز ءِ عربانی شمار یکسد ءُ بیست لکّ (دوازده میلیون ) انت۰ اے ایردستیں راج چه وتی راجی هکّاں زبهراَنت۰ گوں الاحواز ءِ گیس ءُ ٹیل ءِ پل ءُ پانچءَ پارسیاں وتی شهر ءُ میتگاں آباد کتگ ءُ په وتی پدریچاں آسراتیں زند اِش اڈ کتگ۰ بلئے عرب گوں بدیں زند جاوراں دیم په دیم انت۰
الاحــواز ءِ ٹیل ءُ گیس ءِ زر شپ ءُ روچ ماں تهران، اسپهان، یزد، کرمان، کاشان، مَشَد ءُ پارس ءِ آدگه شر ءُ میتگاں هرچ بیگ انت۰ بید چه الاحواز ءِ نپت ءُ گیس پارس ءِ مالی جاور گوں نیست ءَ برابر اِنت۰ نپت ءُ گیس وتی جاگه ءَ عربانی کئوران کارون، مارون، سیمره، کرخه، دِز، زهره ءُ اروندرودءِ آپ اشاں کم ءُ گیش هُشک کنائینتگ۰ کئورِ « کارون » ءِ آبریچ ماں زاگرُس ءِ کوهاں بندگ بوته ءُ دیم په اسپهان ءَ چَهر دیگ بوتگ ءُ دِزءُ کرخه ءُ آدگه کئورانی سرا گیش چه بیست ءُ هپـــت آپ بند اِش بستگ۰
گوں کئورانی هشینگ ءَ الاحواز ءِ کِشت ءُ کِشاراِش تباه کتگ ۰ ساپیں ورگی آپ نیست ءُ چه بازیں گوات ءُ لوڈاں هوا هنچو پر دنز ءُ پُلگ اِنت که مردماں په آسانی ءَ نپس کَش اِت هم نه کن انت۰همے سوب ءَ هیسک ءُ پُپّانی بیماری اوداں سک باز بوتگ۰
گوں کئورانی هشینگ ءَ الاحواز ءِ کِشت ءُ کِشاراِش تباه کتگ ۰ ساپیں ورگی آپ نیست ءُ چه بازیں گوات ءُ لوڈاں هوا هنچو پر دنز ءُ پُلگ اِنت که مردماں په آسانی ءَ نپس کَش اِت هم نه کن انت۰همے سوب ءَ هیسک ءُ پُپّانی بیماری اوداں سک باز بوتگ۰
هنوں الاحــواز ءِ شزادیستگیں عرب پادآتکگ انت۰ بلوچانی سرمچارءُ سیاسی جهدکار ءُ کوردانی پیشمرگانءُ سیاسی مردم ءُ آزری تورکءِ جهدکاراں عرب مهلوکءِ همراه اَنت۰ تهران ءُ یزدءُ اسپهان ءُ پارسءِ آدگه جاگهانی مردم سَیل چارگ انت یا که وتی تیر ءُ توپءُ پئوجی ءُ پاسدار ءُ بسیجی په پادآتکگیں عربانی کشت کوش ءَ دیم په عربستان ءِ عبادانءُ اهوازءِ شهر ءُ محمره ءُ آدگه شهراں راه دیگاینت۰
اگاں چه ایرانی لشـکر، بسیجی ءُ سپاهیگاں هر نیمـگ ءَ بیگناهیـں مردماں کشگ ءُ رستـری کنگاینت ءُ هما پارس که وت ءَ انکلابی ءُ دیمـروی پسند زاننت وتی چم بستـگ ءُ کَـرمَه گوشی کنگاینـت دلجم اوں که پارسیانی زورانسری ءُ برزدستیءِ تهاریں دؤر ءِ آهــری روچاں دور نهَنـــت هچ شکّے نیست که الاحوآزءِ عرب ءُ آدگه ایردستیــں گــڈســــراسوبیــن بنت ۰
هما روچ آیگ اَنت که پارسیاں دیم په وتی هنکیــن ءَ گَـلّینَگ بنت ءُ عرب، کورد، بلوچ، آزری تورک، تورکمن ءُ لُــر آزات به بنت ءُ په وتی پَداداشتگیـں ملکانی گِهبـــودی ءَ وَت پیسلــه ءُ کوشسـت بکننت۰
آزات ءُ آباد بات گنجيــــں بلوچستـــــــــان
پروشت ءُ پروش باتنـــت ايران ءُ پاکستان
محمد کريم بلــــوچ
Comments
