تکانسـریـں خامنه ای: ایران ٹُکُّــرٹُـکُّــربیـت

0
944

 

گوں رضا میرپنچ ءِ دیماآرگ ءَ رند چه اولی جهانی جنگ ءَ انگریزاں ایران ءِ اداری ءُ سیاسی سیستم ءِ بن هشت ءَ ایرکرت۰ رضا میرپنچ ءُ پرشیاےءِ  لشکر (قشون فارس) گوں انگریزانی همشوری ءُ همکاری ءَ کورد، بلوچ، آزری تورک، تورکمن ءُ ا لاحوازی عرب ءِ سرا ارش برت۰رند چه آهانی کشت ءُ کوش ءُ پروش دیگ ءَ رضا میرپنچ جارجت که آ پرشیاےءِ  بادشاه انت.
ایران گوں جنگ ءُ کشت ءُ کوش ءَ اڈ بیت ءُ اے ملکءِ وجـود ءُ شومیں زند بیگناهیـں انسانانءِ هونانی ریچگ ءُ انسان کشـی ءَ گوں همگرنچ انـت۰ اے ملک زلم ءُ بے عدالتـی ءُ تروریسـم ءِ نشان انـت۰

 

ملا خامنه ای که هنوں همے زوال بیگی ملک ءِ مذهبی ءُ سیاسی سروک انت گوں پریشانی ءَ گندگاینت که اے پرشتگیں بوجیگ ماں بیگناهیں انسانانی دریایِ هون ءَ بڈگ اِنت. هچ شک ءُ شهبه اے نیست که ایران پرُشگ انت بلئےدلگوش گور کنگی گپ ایش انت که پر چے هنوں ملا خامنه ای اے المی گپ ءَ دیما آرگ اِنت.

 

خامنه ای اے گپ ءَ هنچیں وهد ءُ دورے ءُ  کنگ اِنت که ایرانی لشکر ءُ سپاه ماں یمن ، شام ، عراق ءُ اوگانستان ءَ  پلینڈی، جنگ  ءُ جهان سوچی کنگاینت تنکه  وتی شیعی امپراتوری ءِ برجاه بکنت۰ آ ییءِ مذهبی ٹولی شپ ءُ روچ بیگناهیں انساناں  کشگایِنت ءُ اے مردم کشی ءَ په وتا جهــاد ءُ مزنیں پَهرے زانت۰

 

خامنه ای گوستگیں یکشمبه ءَ انگریزاں میاریگ کرت ءُ گشت :انگریزءِ واکدار نشتگ ءُ برنامه اڈ کنگاینت که چوںکا دگرانی ملکاں ٹکر ٹکر بکننت۰ آ گوشنت که نه سوریه یکجاه بیگی انت ءُ نئیکه عراق۰ اے دوئیں ملک بهر بهر بنت۰ اگاں چه  انگت ءَ ایران ءِ نام ءَ نگرنت بلئے آ لوٹنت اے ملک هم ٹکر ٹکر ببیت۰ خامنه ای شـر زانت که انگریزهم سرپد بوتگنت که ایران ءِ اڈ کنگ ءُ کورد، بلوچ، آزری تورک، تورکمن ءُ الاحوازی عربان ءَ تهران ءُ پارس ءِ ایردست کنگ یک تاریخی رَدی اَت۰

 

اداں کوشست کناں که ملا خامنه ای ءِ  گپانی چنت سَوَب په نبشتانک ءِ مڑاداریں وانوکاں بیاراں۰
اول ایش که خامنه ای لوٹیت ایران ءِ هونواریں سپاه ءُ واکداران تپاک ءُ یکجاه ببنت۰ گوشگی انت که ایرانی سپاه ءُ تهران ءِ واکداراں دیراِنت ٹولی ٹولی ءُ ناتپاک انت۰ ایشانی ناتپاکیءِ مستریں سَوَب سی ءُ هپت سال ءِ دزّتگیں زرّءُ سرمایه یانی بهربهر کنگ انت ءُ هریک ٹولی یے چه آدگرا گیشتر لوٹیت۰ البت آ درستاں په گئیرپارس مهلوک ءِ کشت ءُ کوش ءُ ایردست دارگ ءَ تپاک انت۰

 

دوم ایش که خامنه ای لوٹیت پارسیاں  چه ایران ءِ پروشگ ءَ به ترسینیت ءُ آهاں ڈاه بکنت۰ پارسیاں شر زاننت که ایران نامیں ملکے ءِ اڈ بیگ ءُ شومیں وجود تهنا په همایانی وتی  نپ ءُ سیت انتءُ گوں ایران ءِ چنڈ چنڈ بیگ ءَ کورد، بلوچ، تورکمن، عرب، آزری تورک ءُ تن تن لُر هم آزات بنت ۰ گڑا عربانی نپت ءُ گیس ءُ آدگه ایردستیں راجانی مال ءُ مڈی ءِ پل ءُ پانچ ءِ دیمگیری بیت۰ 

 

پارس ءَ دو راه گیش نیست انت۰ یا  په هما چیز رزا به بنت که ماں وتی ملکءَ بزاں  یزد، کرمان، مشهد ءُ اصفهان ءَ هست اِش ءُ وتی پنجگاں چه دگرانی مِلک ءُ مال ءُ راجی سرمایه دور بکننت یا ایش که په جنگ ءُ بیگناهیں انسانانی کشتارءَ تیار ببنت تاں ایران ءِ مَرکی ءُ بیماریں وجود ءَ دو روچ گیشتر زندگ بدارنت۰

 

سیمی سوب ایش انت که خامنه ای چه میاں استمانی جاوراں باز پریشان انت ءُ زانت دگنیا سرپد انت که آییءِ  سپاه ءُ مذهبی ٹولی ماں یمن، عراق، شام ءُ اوگانستان ءَ دستمانجنی ءُ پلینڈی کنگاینت ۰خامنه ای گندگنت که ایران ءِ تروریستی کارکرد پروش وارتگ ءُ ایشی ءَ یک نشانے په وتی “مُوری بادشاهی” ءِ هلاسی زانت۰  

 

چارم ایش که هنوں ایردستیں راجانی بیــداری ءِ دور انتءُ کورد، بلوچ، تورکمن، عرب، آزری تورک ءُ تن تن کومِ لُــرهم  پارس ءِ ایردستی ءَ نه مَـنّ انت۰ آ وتی راجی هکاں پد جنگاینت۰ اگاں چه رستریں سپاه ءُ اطلاعات گوں روسی ءُ چینی سلاهاں هر روچ ماں کوردستان، بلوچستــانءُ الاحواز مردم کشنت بلئے ایردستیـں راجانی توار برزتر بیتءُ آهانی جهداں په آزاتی ءَ پرزور بیان انت۰په همیش انت که خامنه ای ءُ آییءِ ٹولی بازپریشان ءُ تکانسـر اَنت۰ آشـر زاننت که اگاں چه انگریزاں رضا میرپنچ ءَ دیما آورت ءُ  ایران ءِ سیاسی، اداری ءُ فوجی اداره اِش اڈ کتنت بلئے اے ایردستیں راجان ءُ آهانی بیداری، زانت ءُ هشتـاد سالءِ جهدانـی آسرانت که ایران ءَ پروشت ءُ پروش کنـت نئیـکه انگریـز۰
آزات ءُ آبــاد بــات گنجیــــں بلوچستـــــان
پروشت ءُ پروش باتنت ایـران ءُ پاکستـان
محمد کریم بلــــوچ

 

Comments

comments

LEAVE A REPLY

Please enter your comment!
Please enter your name here