ایرانءِ بلــوچ دژمنیـں واکدارانی پنـــدل

0
897

گـوں دو بلــوچ ورناے ءِ ٹپـی ءُ شزادیستگیں لاشانی درگیجگ ءَ ماں رونشتی بلوچستــان ءِ مگس ءَ نوکیں بهرے چه بلوچستــان ءِ تاریخ بنگیـج بوت۰ آ بلوچ اوبادگانی نام باسط چُک جان محمد ءُ احمد چُک مجید اَت ءُ دوئیں گومـازی ءِ مردم اتنـت که مدتے ءً پیش مگس ءِ شهـرا آتکگ ءُ جاهمننـد بوتگ اَتنت۰

گوشیئے ماں اے دورءَ هم رستریں جنرل مشرف ءُ آییءِ زرپرستیں سروزیر شوکت عزیزیا که هونواریں  رحمان ملک ءِ  رپک ءُ پندلاں نوک بیگ اَنـت۰ آهاں بازیں بلوچ ورنایاں که بیه ءَ چه رونشتی بلوچستان اَتنـت دستگر کت ءُ ماں پاکستانی کورچات ءُ شزاجاهـاں بندی کرت ءُ لهتیں ایران ءِ سپاهءِ دستا داتنت که درستاں چنت ماه ءَ رند ماں ایران ءِ بندیجاهاں شهید کنگ بوتنت۰

اے رندا ایرانی واکدار ءُ سپاه قدس ءُ آهانی جاسوسی اداره مهاجریں مشرف ءُ انسان دژمنیں رحمان ملک ءِ  رپک ءُ پندلاں کاربندگاینت تنکه مشرقی بلوچستــان ءِ شمارے چه سرمتابیں ورنایاں  گارءُ بیگواه بکننت یا که بگرنت اِش ءُ  گوں پاکستانی واکدارءُ پنجاپی پئوجءَ آهانی سرا سودا بجن اَنت۰

البت دلگوش گوَر کنگی انت که ایرانءِ بلوچ دشمنیں واکدارءُ “سپاه قدس” په وتی منّ ءَ چه هندوستانی مهاجر ءُ پنجاپی رستراں ماں دو تل ءُ دو پوستی ءَ پهته ترانت ءُ چه آهاں گیشتــرءُ پکّاتریں ٹگـی ءُ کلپـی بلــد اَنت۰ اے وتی رستری تجربه یاں چه آوارجتگیں کوردستان، زرباری آزربایجان، تورکمنستان، عراق ءُ شام ءَ ماں بلــوچ گلزمین ءَ کاربندنـت تنکه بلــوچ راج ءُ بلوچانـی راجی جُنـز ءَ سریں پروش بکننت ءُ گلزمیـــن ءَ مدامـی وتیگی بکننــت۰

 آ گوں مشرقی بلوچستــان  ( پاکستان ءِ آوارجتگیں بلوچستان ) ءِ چیزے پهکدلیں ورنا وتا را بلوچانـی دوست ءُ دوزواه پیش دارنت ۰ایرانی لشکرءِ نپـرءُ کاســد  که چیروکایی گوں پاکستانی جنرالاں هم شوراِنت شمارے چه لاچاریں بلــوچ ورنایاں رزا کتگ تنکه چه مشرقی بلوچستــان ءَ در بکپنت ءُ ماں رونشتی بلوچستــان ءَ جاهمنند ءُ باهـوٹ ببنـت۰  

اپسوزی گپ ایش انت که اے بلــوچ اوبادگاں وتـا را ماں رونشتی بلوچستـان ءَ ایرانءِ بلــوچ کشیـں سپاه ءُ بسیج ءِ میار کنگاینـت!!!  

گوں اے بـرات ءُ آزیـزاں گوشگی اِنـت که هبــر وَ هنـوں چـه هَلــوت ءَ گوستــگ۰  شما را زانگی انت که ایرانی مذهبی واکـدار ءُ آهانی هونواریـں لشکر بلــوچ راج ءُ بلوچستــان ءِ کوهنیں دژمــن اَنت۰ اے هنچوشیں انسان دشمن ءُ بے تمدنیـں (بے تہذیبیں) دژمنے ایت که  لوٹیت هم شمئی ملـک ءَ زوربرد ءُ وتیگی بکنـت ءُ هم بلــوچ راج ءَ گار ءُ بیگواه بکنت۰ اے شمئی ماتی زبان ءِ دشمـن ءُ بدواه اَنت اے دگنیاےءِ تهارپگـرتریں مذهبی ٹولی اِنـت ءُ بزانیـت که اے شمئی هونی دشمن اًنــت۰ایشاں بے شمار بلــوچ کشتــگ ءُ لکانی لکّ بلـوچ ءِ زند جاور اِش چه جهنـدم ءَ هم گنتـر کتگ۰

رونشتـی بلوچستــان ءِ تاریـخ ءَ  بچاریت ءُ بوانیـت۰اشاں مئی ءُ شمئی هزاراں مات سوگیگ  ءُ هزاراں گوهار جنوزام کتگ۰ همی زالم ءُ زورانسراں مئی ءُ شمئی هزاراں چک  چوره ءُ یتیم کتگ اَنت۰ همے زالماں تن تن مئے گوانزگی تبل هم کشتگ اَنت۰شمارا زانگی انت که بے شماراَنت شمئی برات ءُ گوهار، پیر ءُ ورنا که وتی ساه ءُ زنداِش ندر کتگ اَنت تاں شمئے بن پیروکی ڈیه ءُ ملـک ءَ چه اے رسترانی دستا آزات بکننـت۰ آ شهیدانـی پاکیں نام ءُ آهانی کربانی گلزمین ءُ بلوچ راجدپترءِ ابدمانین ءُ کیمتــی بهرے اَنــت.

چه مشرقی بلوچستان ءَ مئے یک ورنائیں بلوچ اوبادگے ءَ گوَشتگ که “…… ما تہ شی نہ اشکته  ایران ءِ لاپ ءَ بلوچ آزاتی ءِ یا هما جد و جهدے کنگ اَں یا همودا آهانی حکے ایرانی سرکار جَنَگ اِں اودا نہ  ۰۰۰ما چیزے سرپد ںیستں! تحریکے نئے سیاسی حواله ءَ نئے مزاحمتی حواله…. اورایرانی لاپءَ اگاں چےکمیںے بازیں بلوچے مسلئے هستن تں مذهبی بنیاد ِاں۰۰۰هماییءَ مئی تعلق نیستیں ما سکیولَروں۰ ما آلریڈی گوشوں ما بلوچ آزادخیالیں مخلوکں، ما سکیولَروں، تہ ما آیی ءَ گوں تعلق نیستیں۰ اگاں کسے اے رنگی چےءَ کنت ما تہ آیی ءَ سرپد کنوں اے رنگی چےءَ مہ کن بجاے  آیی ءِ سپورٹ کنگئے۰۰۰”

دگه واننــده ءُ په وتی مـنّ ءَ زانتکاریـں بلــوچ پسگے گوشتگ که: “ایرانی بلوچستان ءُ پاکستانی بلوچستـان ءِ حالات جتا جتاینت۰۰۰ ما را گوں ایرانی بلوچستان ءً هچ وڑیں تعلق نیست۰۰۰ “

مڑاداریں بلــوچ پُسّگاں ! اے وڑیں گپ ءُ هبرپه شما زیب ندنت۰ ایشی ءَ سرپد بئیـت که پارس ءُ آهانی لشکردو تل ءُ دو پوستی ءِ استاد اَنت۰ اگاں سپاه ءُ بسیج ءِ  یک ءُ دو ٹولی  گوں چنت بلــوچ ورنا گپ کننت ءُ  رنگ په رنگیں کئول ءُ واده اِش دینـت، دلجم ببئیت که آهانی چار دگه ٹولی په همے بلوچ ورنایانی بیگواهی ءَ رپک ءُ پندل کننت۰ چو وش گوشتـه راجءِ پیرینـاں: “انسـان په سـر ءُ هـوش” 

 په جوانی ءَ سرپــد به بـیـت ءُ به زانیـت که بلــوچ راجءِ دشمنانی باهـوٹ بیگ ءُ آهانی سرا دلجم ءُ ایکیم بیگ مزنیں ردی ایـت که آســرا بلوچستــان ءُ بلوچ راج ءُ راجی جنزءَ باز تاوانبار کنـــت. ایرانی لشکر ءُ سپاه گوں پنجاپی ژنرالان ءُ اسلام آباد ءِ بلوچ دژمنیں واکــدار هم شور اَنت ءُ بلــوچ راج ءُ بلوچستانءِ زِدّ ءَ  آهاں سیاسـی، تجارتـی، پئوجـی ءُ جاسوسـی “قــرارداد” ءُ بازیں “معاهــده همکاری” هست اَنت۰  

آزات ءُ آبــاد بــات گنجیــــں بلوچستـــــان
پروشت ءُ پروش باتنت ایـران ءُ پاکستـان
محمد کریم بلــــوچ

Comments

comments

LEAVE A REPLY

Please enter your comment!
Please enter your name here