شکار و ژینگە وه‌ قه‌ڵه‌م : کورش رزایی

0
1213

لە نقویری دەروەنەیل خێال
کەوکێگ گاتەگات کەێد
ئڕا نمەزاو بویچگێ
ک هەر ئێواران
کۆڵێ!
لە بانێ هەڵدانە!
فەرزانە ئەردەشیری

کورش رزایی

سروشت وە دار و بەردەو رەنگینە، وە کەو و کانیەو رەنگینە، هەناێ شاقەێ کەو و سوسێ لە نقویڕی دەروەنەو تێد ، دەنگ ژیانە ، هەناێ دەنگ پیڕەێ کەڵ و بزن لە ڕوی تاشەو تێد سەمفوونی ژیان ژەنێد،وەلام هەمیشە وەێجوور نەمەنێە، ئڕا یەگ بەشەر لە ژیان خوەێ دەس دریژی وە ئێ پروسەێ تەبیئییە داشتێە ئڕا دەوام خوەێ.
.
فەرهەنگ شکار لە ڕوژگارانا هەر لە ناو مەردم وە تایبەت مەردم کورد چێشت باوێگ بویە، وە مەردم ئڕا گوزەران زنەی دەس وە دامان سروشت وە دنیاێ واشیات بوینە .

یەکێگ لە لێان شکار کەو و سوسێ بویە، ک وە درس کردن چێشتێ وە ناو دویجامە ک لە پارچەیل ڕەنگامە درسێ کریەێد ، لە وادەێ وەهار خەنەێ نک نەێێگ لە بریجەێ خوەر بەهار لە کەش و کویە و لە وادەێ جفت گیری کەوەگان خڕێ دەن ، کەو ک لە ژیانێ نەماد ئشق و ئەوینە لە بریجەێ ئێ دام ڕەنگینە دایم گوڵ خوەێد ، وە دام شکارچی گرفتار بوود.

یەک ترەک لە شێوەیل شکار ک بایس بویە نەسڵ پەلەوەر لە وڵاتمان بوڕیەێد کۆڵ
گرتن لە سەر نمەزاوەیل دەروەنەیلە ئڕا وە دام خسن پەلەوەر. لە ئەسڵ بەشەر وە ئێ تەرفەندەیلەو ئعتماد و باوەر لە سروشت سەنێیە.

لە تویل زەمان بەشەر ئڕا دەوامێ داێم لە جەنگ وەل سروشتا بویە، وە چێشتێ ک دەوام داسە ژیانێ ، کومەکێ بویە ک تەبیئەت وە پێ کردێە ، وە هەمیشە ڕەنگینترین گیاندارەیلێ لە ئختێار بەشەر ناێە.

ئەڵبەت نەبایەس فەرامووش بکەیم ک بەشەر هەمیشە وە ئێ کاریەو گەوراترین ئاسیب وە چەرخەێ ژیان لە تەبیئەت وارد کردێە. ئەوجوورە ک دوینیم ئێرنگە فرە لە پەلەوەرەیل و گیانەوەرەیل نەسڵێان لە بەێن چیێە ، وە سروشت لە مەلەوەر و پەلەوەر خالی بویە.

مەبەستم لە ئێ باسە یەسە ، ئیمە ئلان لە شەراێتێ لە زەمان قەرار دیریم ک پاراستن ژینگە ، وە نیشتمان یەکێ لە موشکلات دنیاێ ئمڕووە ، وە بەشەر ئڕا یە گ بتویەنێد دەوام بارێد .

باێەس ئەوەڵ سروشتێ نجات بەێد ، وە ئەوەیش فەرهەنگ ئهترام وە زار و زەوی و پەلەوەرو مەلەوەرە . زەمانێ ئیمە تویەنیم مووەفەق بویمن ک پەلەوەر و مەلەوەر لە ژیان وەل بەشەرا نەترسییەن ، ڕەم نەکەن ، لە ناو ژیان خوەمان جییگ ئڕا ئەوانیش داشتویمن .

وەلێانا ڕەفیق بویمن وە فورسەت بەیم باوەڕمان بکەن ، لە دنیاێ ئمڕوو ک جەنگ و بێگانەگی سەراێسەر وڵات داپووشاس، وە ژیان ئنسانەیل کەفتییەسە دەس ئەفراد سودجووێگ ئڕا وە قودرەت ڕەسینێان .

بایمن وەل تەبیئەتا ئاشتی بکەیم ، بایمن باوەڕەیل ئنساندوسی وە ژینگە پاریزی بکەیمنە جزێگ لە زندەگیمان . وە دار ودارسان ئهترام بنەیم ، بزانیم هەناێ ئاگرێ ڕووشن کەیم ئەوەل داوان خوەمان گرێد ، لەزەت ڕووشن کردن ئاگر وەل سزیان دارسانەیلمانا ئەوەز نەکەیم ، ئەوە خوەشی ساتێگەو سزیان سروشت لە کیس دان ژیانێ هزارساڵەس.

بایمن هەناێ گولەێ ئەو کەوێ خەیمن بزانیم چەرخەێگ لە تەبیئەت لە بەێن دایمنە ک هزار ساڵ توواێد ئڕا یە گ جبران بوود، ئێ جارە بایم لە خوەمان شروو بکەیم .

وە لە زەوی نان تفەنگەیل شکاری ئەوەڵین گام ئڕا پاراستن ژینگە ئەڵگریم ، دوومین کارمان ئاگرەو کردن لە داوان سرووشت تەرک بکەیم . لە سالان گوزەیشتە وە بێ فکری خوەمان هزاران هکتار لە سروشت ڕەنگین کویەیل زاگرس وە ئاگر کیشایمە ،وە هاوردن جەڕەسقاڵەیل قووڵ پەێکەرئڕا پێا کردن کانییەیل زخاڵ سروشت وە وێرانەێ دراوردیمنەسەێ ، کەندڕەیلێ لە ناوێ کەنیمنە ک وە هزارساڵ پڕەو نیەود.

بایمن لە ئمڕووا تەسمیم بگریم ئێ تەبیئەت قەشەنگمانە ئڕا نەسڵەیل بانان هفزێ بکەیم وە دی نەیلیم نیشتمانمان ک وە خوین دڵ وە دەسێ هاوردیمنە ئاگر بچودە لێ . هەر ئاگرێ کوتێ لە نیشتمانمان لە بەێن دەێد .

بایمن ئێ گرپەێ ئاگرە لە نیشتمان کوردستان دویرەو بخەیم .وە ئمێد ڕوژی ک سروشتمان پڕ بوود لە قیقەێ کچان و کوڕانمان وە هەڵپەڕگەو شادی ، وە شاقەێ کەو و پیڕەێ کەڵ و بزن ، نمەزاوەیلمان بتوقیەید و کانییەیل پڕ بوود .لە ئاو و دەیشت و سارا سەونزو گوڵ و گوڵاڕا بوود.

سه‌رنج و كۆمێنت

كۆمێنت