ڕاسان و دەور و نەخشی کەسایەتییەکانی

0
916
بابەشێخ ناسری
 بابەشێخ ناسری

ئاوڕدانەوەیەکی کورت، لە ڕوانگە و نووسینەکانی شەهید ( کاوە جەوانمەرد).

نەورۆزی ئەمساڵ لە بناری چیای بەرزی هەڵگورد و لە پەنای زەنجیرە چیای قەندیل و لە سنوری دەسکردی باشوور و خۆرهەلاتی کوردستاندا، لە پەیامێکی نەورۆزیدا، دەسپێکردنەوەی خەباتی چەکدارانە و گەڕانەوەی هێزی پێشمەرگەی کوردستان بۆ ناوخۆی وڵات کرد. لەلایەن سکرتری حێزبی دیمۆکراتی کوردستانی ئێران بەڕێز (مستەفاهێجری) یەوە، ئاراستەی خەڵکی کوردستان بەگشتی و خۆرهەڵاتی کوردستان بە تایبەتی، کرا .

حێزبی دیمۆکراتی کوردستانی ئێران، وەک حێزبێکی نەتەوەی وهێزی سەرەکی لە خۆرهەڵاتی کوردستاندا، خاونی ئەزموونێکی دوورو درێژی خەباتە و پتر لە حەفتاد ساڵ کاری رێخستن و هەروها خەباتی چەکداریە و کاروانی سەبەرزی شەهیدانی، باشترین بەڵگیە بۆ ئەم ڕاستییە .

پاشی ڕووخانی ڕژیمی پاشایەتی و هاتنە سەرکاری کۆماری ئیسلامی و هەڵسوکەوتی ئاخوندەکان، حێزبی دیمۆکرات و حێزبەکانی تری خۆرهەڵاتی کوردستان، لە بەرانبەر هێرش و پەلاماری دەسەڵاتی تازەی کۆماری ئیسلامی، بەناچاری دەستیان دایە بەرنگاریی چەکدارانە و پیشمەرگەی کوردستان، سەدان و بگرە هەزاران حەماسەی لە قارەمانەتی و فیداکاری خولقاند . دەیان جار پیشمەرگەو کادری حێزبی دیمۆکرات، لە درێژەی خەباتیاندا لە گەماروی هێزە بەکرێگیراوەکانی ڕژیم کەوتن و بۆ پاراستنی نهێنییەکانی حیزب و رێخستنەکان، تادوایین فیشەک، بەرنگاری پەلامارەکانیان بوونەوە و دواین فیشەک یان قۆمبەلەیان، بە خۆیاندا تەقاندوەتەوە و نەیانهێشتوە بە زیندوویی دیلی دوژمن بن .

ریکەوتی ٢٢/٠٤/١٩٨٢زاینی (١٣٦١کۆچی هەتاوی)، لە ئاوایی (کەرەسی)، سەر بە ژاوەرۆ، شەهید (عەلی ئەسلانی) کادرو ئەندام و بەرپرسی ماڵیی کومەیتەی شارستانی سنە، کەوتە گەمارووەی هێزەکانی ڕژیم و پاش بەرنگارییەکی زۆر، بە نارنجۆک خوی تەقاندەوە .

داستانی مقاومەت و بەرنگاری فەرماندەکانی هێزی شەهید شەریفزادە لە ئاوایی (کێلە چەرمگ)ی ناوچەی (وسینئاوا)، شەهیدان (عوسمان ئیفتخار و سەی ئەمیر عەبدی و سەی خالد و وەساساڵح و مەحمو ژیر)لە ریکەوتی٠٩/١١/١٩٨٣زاینی (١٣٦٢ هەتاوی)و داستانی خۆڕاگری (سەی جەمیل حوسەینی) بەر پرسی کومەیتەی (هەوشار)، لە ئاوایی (وزباش کەند)ی  ناوچەی هەوشار لە ریکەوتی ١١/٠٧/١٩٨٦ زاینی (١٣٦٥ هەتاوی)، کە بە تەنیایی و پاش چەندین سەعات مقاومەتی قارەمانانە، بە نەعرەتەی شێرانەی، خەلکی ئاگادار کردوە کە خۆی، ئەتەقینیتەوە و نارنجۆکەکەی بە خۆیدا تەقاندەوە. ئەمانە و دەیان حەماسەی لەو چەشنە فیدا کاریانە، دەفتەرێکی زێڕینن لە عەزم و ئیرادەی پێشمەرگەی کوردستان .

لە پاس ڕزگاریی باشووری کوردستان، وەک بەردەوام بەرپرسانی حێزب لە ڕاگەیاندنەکاندا باسیان کردوە، ساڵانێک بە هۆی پاراستنی بەرژەوەندییەکانی هەرێمی کوردستان، ئەو حێزبە خەباتی چەکداری و جمو جوڵی پیشمەرگەی ڕاگرت .

پاراستنی بەرژەوەندی بەشەکانی تری کوردستان و شۆڕشەکەی لە بەرنامەی حێزبە  کوردیە رەسەنەکانی کوردستاندا هەبوە و لانی کەم بۆ حێزبی دیمۆکرات وەک یاسا و نەریتێکی نەگۆڕە.

ساڵەکانی شەستی هەتاوی و سەرتای حەفتاکان، ئەو کاتەی کە ڕژیمی شوینیستی پالەوەیش، کە دەسەلاتێکی فارسی شیعە بو(رژیمی پاشایەتی دەسەلاتێکی شوینیستی فارسی شیعە بو و رژیمی کۆماری ئیسلامی دەسەلاتیکی شیعەی فارسە و جیاوازیەکەیان لەوەدایە کە ئەویان باوەڕی بە هەژمونی و باڵادەستیی فارس بوو،بە شێوەی سیستامتیک هەنگاوی عەمەلی بۆ سڕینەوەی کولتوور و زبانی نەتەوەکانی بندەستی وەک کورد، هەڵئەگرت و باوەڕی قووڵی بە یەک دەوڵەت و یەک نەتەوە هەبوو، کۆماری ئیسلامیش، باوەڕی بە باڵادەست بوونی شیعە هەیە وهەموو موسڵامانان بە ئۆمەتی خۆی ئەزانێت .(

ڕژیمی پاشایەتی  خۆی بە کۆیخا و ژانداری ناوچە دەزانی ولە دەستێوەردانی ناوچە و پەل هاویشتن بۆ کارو باری وڵاتانی دەورو بەردا، دەستی باڵای هەبوو.ناردنی ئەرتەشی ئیران بۆ (زۆفار) بە بیانووی یارمەتی دان بە ئیسرائیل وەک هاوپەیمان و ناردنی چەک و راوێژکاری نیزامی بە شورشی حەقخوازانەی باشوری کوردستان و دوائیش یارمەتی دانی ڕژیمی بەغدا، لە جێ بەجێ کردنی پەیمانی ئەلجەزایر بۆ هەرەس پێهێنانی ئەو شورشە درێژە دانای ئەو بیرۆکە و سیاسەتە بوو .  دیارە حێزبی دیمۆکرات، سەرەڕای ئەوەی  کە بوو بە قوربانی ئەو هاوکارییە، هەر لەو زەمانەیشدا چ بە کردەوە  و چ بە هاندانی لایەنگرانی لە ناوخوی ولات بۆ هاریکاری بە شورشی هاوخوێن و هاو نیشتمانانی، بە بەهای قوربانی کردنی کۆمەڵێ لە تیکۆشەرانی، ئەرکی نیشتمانیی خۆی بە جێ گەیاند .

بەلام حێزبی دیمۆکرات، سەرەڕای دڵنیا بوون لە هەرچەشنە هێرشی کۆماری ئیسلامی بو سەر هەرێمی کوردستان و بە سەرنجدان بە سەقامگیر بوونی هەرێم، لە باری نەتەوەییەوە و جێگیر بوونی چەندین نوێنەرایەتی وکۆنسولاتی وڵاتان و هیزی هاوپەیمانان لە هەولێری پایتەخت،  وەک ئاماژەم پێکرد، لە دەستەوەستانی و مولاحزاتی ساڵانی پێشووتر، هاتە دەر و نەوروزی ئەمساڵ دیسانەوە شاهێدی ڕاگەیاندنی( ڕاسان) و هەستانەوەی پێشمەرگەی خۆرهەڵات بوین لە قولایی ولاتەکەماندا و ئەو راستییەمان بۆ دەرکەوت کە لەماوەی بێدەنگیدا، پێشمەرگە وەک سکڵی بن ببوڵە مڕ، چاوەڕوانی هەڵکردنی شنەبایەک بوون .

ڕاستە کە ڕاسان بە بڕیاری سەرکردایەتی حێزبی دیمۆکراتی کوردستانی ئێران و بە تێبینی ئەوڕاستیە کە پتانسیێل و توانای ئەو ڕاسانەی لە خۆیدا بەدی دەکرد و بڕیاری فراوانتر کردنی بەرنامەی هەنادردنەوەی تیمەکانی پێشمەرگەی بۆ قووڵائی خۆرهەلات دا، بەڵام چەرخەو کارئاکتری ئەو بڕیارو جێ بە جێ کردنی وها جەسارەتیک، پێویستی بە هەڵمەت و عەزمی کۆمەڵێ کادر و پێشمەرگەی لە خۆ بردو و گیان فیدا بوو کە وەک بینیمان لە شنووە هەتا مەهاباد و سەقز و سنە پێشمەرگەکانی حێزبی دیمۆکرات، بە فیداکردنی گیانیان، تۆمی هیوا و هۆمیدیان لە دڵی خەڵکی خۆرهەڵاتی کوردستاندا چاند . دیسان ڕاستە کە چەرخەی خەباتی چەکدارانە پێشمەرگە قارەمانەکانن، بەلام دەوری ڕێبەر و فەرماندە زۆر گرنگە .

 دیارە حێزبی دیمۆکرات هەموو ساڵێک، لە وەرزی بەهار ولە کەش و هەوای لە باردا، تیمەکانی پێشمەرگەی بۆ هەمو ناوچەکانی کوردستان ناردوەتەوە، بەلام ئەمساڵ حزوری ڕێبەرو تیئورسیەنی ڕاسان (کاوە جەوانمەرد:  “کاکۆ”) ئەندامی کومەیتەی ناوەندەی و ئەندامی شورای نیزامی حێزب و، فەرماندە (سەرکەوت سەمەدی)، بەرپرسی فێرگەی پێشمەرگە و کۆمەڵێ لە کادرو ئەندامانی ڕێبەرایەتی و فەرماندەکانی نیزامی، نیشانەی عەزم و ئیرادەی حێزب بو، بۆ ئەوەی چی دی دەستەوەستان نەبن لە بەرانبەر تورکتازیەکانی کۆماری ئیسلامیدا.

لە حێزبی دیمۆکراتدا بریاردان بە کۆمەلە، ئەوە قانون و نەریتێکی نەگۆڕە بەلام، دەورو نەخشی تاک و کەسایەتی و کاریزما، کاریگەریی خۆی هەیە و دەتوانی لە جێ بە جێ کردنی بڕیارەکاندا دەوری پۆزیتیڤ یان بە پیچەوانەوە نگاتیڤی هەبێ .

شەهید کاوە جەوانمەرد، وەک کادرێکی کارئامە و لێهاتوو، باوەڕمەند و زانا، یەک لە و کاریزما و ریبەرانە جەوان و پێگەیشتووانە بوو کە جگە لەوەی دەکرێ بە تیئوریسیەن و پلان دانەری ڕاسان بناسرێ، ویرای شارەزایی بە ئاکامی هەنگاوەکانی عەمەلی ومەترسی لە ریسکی تێداچون و نەگەرانەوەی لەو ئەرکە مێژوویەدا، بۆ جێ بە جێ کردنی بریاری جەسورانەی ڕێبەرایەتی حێزب، کە خویشی یەکێ لە ئەوانە، دەس پێشخەری کرد و بوو بە پیشەنگی کاروانی ڕاسانەوە.

کاوە کێ بوو، چ ئەنگیزەیەک وای لێکرد ببێتە پێشەنگ و پێشرەو ؟  وەک کەوە سوارێک، ئەرکی میژویی خۆی جێ بەجێ بکات و وێرای عشق و ئەوینی بە ژیان و ویرای عشق و عەلاقەیکی بێ سنووری بە دایکی و هاوسەرەکەی،  هەنگاو بنێتە رێگای نەگەڕانەوە !

ئەساسەن، پیشمەرگە وێرای عاشق بوونی بە ژیانی باشتر بۆ خۆی و خەلک، هەنگاو ئەنێتە ریگای زۆر جار نە گەرانەوەی پیشمەرگایەتی و ئەوە خۆی لە باوڕی قوولی بە ژیان و هەوڵدانی بۆ ژیانی باشترەوە سەر چاوە ئەگرێ و کاوە یەک لە باوەڕمەندانە بوو.

میژوو نیشنانی داوە کە ئەوانەی وا پتر ژیانیان خؤش ئەوی و شیاوی تەمەن درێژین، زووتر ئەمرن و ئەو دیاردەیە بوگەسە یاسایەکی نەگۆڕ.

چاوخشاندنێکی کورت بە نووسراوەکانی شەهید (کاوە جەوانمەرد)، هەم خۆشەویستی ئەم  ئینسانە گەورەیە بۆ نزیکترین کەسەکانی دەردەکەوێ، هەم فکر و بەرنامە و پلانی کاری بۆ دەسپێکردنی ” ڕاسان” .

کاتێ کە باسی دایکی دەکات، وکوو دەریایەک،  وەفا، و ئەوینی بۆ دایکی شەپۆل ئەدات :

٠٥/١٠/٢٠١٣ بۆ دایکی :

 ئەی خودای عاشقان ئیزنم بدە بتپەرەستم !

مامۆستای من هۆنەر و هەنگاۆم دایکی قارەمانم ،پادشای عاشقانی دنیا ئیزنم بدە بت پەرەستم.کاتی تەمەنم بەقەد تەمەنی ئەو کاتەی تۆ بوو کە باوکی ئارەزووەکانی منیان لە سێدارە دا.  هیچکات وەک بیر کردنەوەیش نەم دەتوانی بە قەدەر چرکە ساتێکی تۆ بیر لە بەڵێن و عشق و وەفا بکەمەوە………….

 ٠٨/٠٧/٢٠١٣دیسانەوە  بۆ دایکی :

مەبەستم بازاڕ گەرمی بە بەهاکان نیە .بەس پێم دابنەوە. ئەوە هەستێکی دەروونی منە کە ناهێڵێ قەت لە ئاستی دایکمدا هەست بە گەورە بوون بکەمو هەروەک منداڵێک خۆم لە دایکمدا  دە بینمەوە . لە کاتێکدا کە باوکم لە “دیزڵ ئاباد” ی کرماشان لە سیدارە درا .تەنیا کەسێ پاڵپشتم بوو و لە گەڵم مایەوە ،دەرسی ژیانی پێ فێر کردم ، دایکم بوو کە ئەو کات ٢٣ سال تەمەنی بوو و هەتا ئێستا لە سەر بەلێنی خۆی لە گەل باوکی شەهیدم مایەوە.

ماموستای ژیانم، من بە قوربانی چرکەی بوونت بم وا بەقەت هەموو ژیانم بایخی هەیە، خۆ راگریت لە بەر دەرگای زیندانە کان و چاوە ڕوانیت بۆ بینینی باوکم و ئەو فرمێسکانە بۆ منت ڕشتون لەبیر ناکەم . ئەتپەرەستم هاوڕێم، ئەتپەرەستم.

دیارە پێویست بەوە ناکات من ژیان و بەسەر هاتی کاکۆ باس بکەم چونکە لە نووسینەکانیدا بە باشی دەر ئەکەوی کە ژیانی بێ باوکیی، بنەماڵەی سیاسی و حیزبی بوون و چاوە ڕوانی دایکی لە بەردەرگای زیندای” دیزڵ ئاباد” ی کرماشان بودیتنی میردەکەی و دیسان چاوەڕوانی بەرەگای ئیطلاعات و داداگای بەناو شۆڕش و زیندانی سنە، بو دیتنی کوڕەکەی، چ کەسایەتییەکی خۆڕاگر و باوەڕمەندیان لەم دایکە و  کوڕەر گەنجە درووست  کردوە .

کاکۆ جگە لە دایکی و جگە لە حێزب و ڕێبازی فکریەکەی،هاوژین و  هاوسەرێکی خوشەویست و عاشقی هەبوو، کە ئاشقانە خۆشی دەویست و بە زبان بە دڵ و بە گەشی چاوەکانی و بە سووری گۆنایەوە باسی ئەوپەیوەندیە دەکرد و بە ئاشکرا هەست بە ئەوینی بە ژیانی هاوسەری دەکرا و بەراسی عاشق بوو.

بەلام سەرەرای ئەو هەمو عشق ئەوینە بە ژیان بە ریباز و بە ئیش و کاری رۆژنامە گەری و ڕاگەیاندن، کە بەراستی لەو مەیدانەدا شورەسوار بوو، ژیانی کەمپ نشینی و دەستەوەستانی، ئازاری ئەدا و بەردەوام لە هەوڵی دۆزینەوەی رێگا چارەیەک بۆ دەرچوون لەو بن بست و قەیرانە دەدا،وەک بڵێی تەنیا ئەوە خەم خۆری حێزب و شۆڕش و کوردایەتیە.

خەمی بێ دەسەڵاتی .خەمی هاوسەرکەمی خۆرهەلات .خەمی کەمپ نشینی و دەستەو وستانی، ئارامیی لەو گەنجە ئارامە بڕیبوو .

هەر لەو پێوەندییەدا، لە رێکەوتی ١٧/١٠/٢٠١٥ ، دەنووسێ :

ڕەواڵی حەماسەت!

کاتێ هەناسە سوار بوو،حاکمیەتی جەستە،شکۆی لە دەست ئەچێت و مەینەت سەیتەرە بەسەرهەموحەماسەتیکدا….

هەر وەها لە ١٧/١١/٢٠١٥ :

لەم ئاسمانە،سەربەست بوونیش عەیاری هەیە،

کە لە عەیاری دیاری کراولابدەی،”سنور داشتت” دەکەنەوە!

لەڕێکەوتی١١ /١١/٢٠١٥بەجوانی ئاماژەبەوڕاستییە دەکات :

ئیوە کۆتری ئەم هێلانەیەن!

هەمو شاخ و رووباری ئەم وڵاتە چاوەڕوانتان دەبن بۆئیستاو داهاتوو، چونکە دڵنیایە رۆژێ ، دەگەڕینەوە هێلانەکەی خۆتان….

بیزانن کە چەکەکانتان دەپارێزرێ هەتا هاتنەوە بۆ هیلانە، ئێرە هێلانەیە بە کاتی هاو دەنگی!

لە ٠٨ /١١/٢٠١٥ دا :

ئەز و بێ ئۆقرەیی…

نۆژەنکردنەوەی رۆخساری داچرچاو و داڕماوی پڕ لە ئێش و ئازار،تەنیا بە بزەیک مەحاڵە مەحاڵ..

لە  ٢٨/١٠/٢٠١٥ دا :

ساریژ کەری راستە قینەی برین، تێگەیشتن لە برینەکەی و بەس!

کاوە جەوانمەرد، لە گەڵ ئەوەیکە رۆژنامە نووس و خاوەن قەڵەم و لایەنگری پەرە پێدانی خەباتی مەدەنی بوو، باوەڕی قوڵیشی بە خەباتی چەکدارانە بوو و چالاکی و جمو جوڵی پێشمەرگەکانی حێزب بە ئاشکرا لە نوسراوەکانی دا ڕەنگی ئەدایەوە و ورەی پێدەبەخشی لەو ماوەیەدا کە مەبەستی من لە هەڵبژاردنی دەقی نووسراوەکانی، زۆربەی نووسینەکانی بە نازناوی (ئەز) دەنووسی ، :

بۆنی بارووتی ڕابوون دێ!

لێرەوە،بزە باڵ دەگرێتەوە و دەنیشیتەوە سەر لێوی نیشتمان ..

ئێرە بنکەی ئەوینی وڵاتە لە رۆژهەڵات ،

ناونیشان: سەقز . هیزی وەنەوشەی حێزبی دیمۆ کراتی کوردستانی ئیران.

١٤/٠٢/٢٠١٦

قەندیل . ئەمجارە ، کات دەگەڕیتەوە!

سەرنج بدەن! بە هەناسەی خاکی پۆشەکان، ژیان چرۆ دەکات بۆ هەموو وەرزەکان.

ئەمجارەیان کات دەگەڕیتەوە…

٢٦/٠٢/٢٠١٦

هەنگاو بەرەو ئاسۆ،بەم چەشنە بزە دەگرێ

ئەمجارەیان هەبونی تۆ، زەمین و ئاسمان گرێ ئەدات!

ئیرە سەنگەری خەباتە بەکاتی بەرگری…

٢١/٠٣/٢٠١٦ نەورۆز

شاخ بە دەم زرینگەی دەراغ و چەکی پیشمەرگەوە بزە دەگەریتەوە…

کاکۆ باوەڕی بە هێز و توانا و ئیرادەی خەلکەکەی هەبوو و لەو پەیوەندیەدا لە٢٥/٠٣/٢٠١٦

دەنووسێ :

لە کەناری بێ هیوایی!

هێندێک گۆند ئیستایش هەر ئازادن،باوڕ بفرمون!

هیندیک گۆند ئێستایش لە بنکەکانی حیزبی، شۆڕشگیرترن!

هێندی بیرۆکە ئیستایش لە رۆژهەڵات بونیان هەیە کە لە بیرۆکەی لیدرەکان ئازاد ترن!

بە گشتی شۆێن لە کۆردستان بوونیان هەیە کە خۆدی حکومەت دەستی لێ شۆردوە و چۆن دەزانێ کە بۆی ڕاگیر نابن!

باوەڕ بفەرمون ئەو ئاگرانەی ئەمسال بە ئەسپایی هەڵ نە گیرساون و بە زۆرە ملی و بە بەر بەرەکانی بەرپا بوون!

تۆ بڵێی ” نێ”  زۆر ئاستەم بیت، خۆ هەر ئیستاش ڕژیم ئامادیە بیخاتە سەر خاکی وڵاتیکی تر. ئەوەتەی هەیە، بووە تابووە بەهاری کوردستان وەرزی جمو جولی پیشمەرگە، مەرگانی داگیر کەر بووە .

٢٧/٠٣/٢٠١٦

پێویستمان بە یاخی بوونە، بەس بۆ یەکتر نە!

هەر لەو بوارەدا بۆ خوشەویستەکەی دەنوسی :

سۆز و بزە

بزەیک بە سرووشتی یاخی بوون

یاخی بوونێک لە ڕەگەزی خاکێک بە بونی بەرگی پیشمەرگە…..

لەم  نووسراوە کورتانەی کاک کاوەدا، بە ئاسانی دەتوانین تێبگەین کە چۆن خۆی بۆ گەڕانەوە و رەنگە گەڕانەوەی بێ گەرانەوە، ئامادە دەکات :

٠٤/٠٥/٢٠١٦

مەگەر دەنگی هەناسەکانتانیان نە بیست؟

ئەمە دەنگی هەناسەی پیشمەرگە یە

لە پێدەشتەوە بۆ لووتکە و چیا

لە سەنگەری چیاوە

هەنگاو بۆ تەقە دەروازەی کۆلانەتامەزرۆە کانی وڵات…

٠٧/٠٥/٢٠١٦ قەندیل

ئەمە ناسینی زایڵەی دیموکراتە!

ستراتیژی درێژ خایەن و بەرنامە بۆ دارێژدراو، ناکرێتە قوربانی تەنانەت پیرۆزترین گرێدراوی سۆزداری!

بۆیە ئەوکارەکتەرەی کە خۆی لە ستراکچیرێکی ئامانجداردا دە بینێتەوە،دەبێت هەموو کات زەینیەتی ئەوەی هە بێت کە بەرەو رووی کۆمەڵێک فرێم ببێتەوە کە رەنگ و دیمەنەکەی بە پێچەوانەی هەست و ڕوانینی ئەو بن.

هەرلە و پەیوەندیەدا ، حیزبی دیموکراتی کوردستانی ئیران ،هەمو کات لە بۆارەدا سەڕای ئەوەی دڵی ئوگرانی خۆی ڕەنجاندوە، دەتوانی سەرکەوتو بیت و لە بەرانبەردا دەسکەوتی زیڕین و هەرمان بنە خشینێ .”کاوە جەوانمەرد”.

٠٨/٠٥/٢٠١٦

حێزبی دیمۆکرات بەردەوام لە سەردەمدایە!

دەلاقەی ئەم زانکۆیە تەنیا و تەنیا بە ڕووی هیوا دە کریتەوە لێرە ،دەفتەری پاشەکشە و داڕۆخان بە یەکجاری دادخرێ و مانیفستی بەر گری، رەج بە رەج و هیلمە بە هیلمە سەر لە نۆی گرێ دە دریتەوە.

ئەم ئورکسترایە، هەمو سەمفۆنییایەکی پێیە،سەمفۆنیای بەرگری ،زەبر،تۆڵە، سەرکەوتن و سۆز، ئیرە مەکۆی ئاوانگاردی کوردی رۆژهەلاتە.

پرۆگرامیی ئەم مەکۆیە لە سەر بناغەی قازانجی گشتی و بۆ داهاتوویەکی گشتی داڕێژراوە، بۆیە قەت لە وزەی گشتی بێبەش نابیێت.  “کاوە جەوانمەرد”

کە ئەم نووسینانە بەوردی دەخوێنینەوە، تێدەگەین کە بیرۆکەی ڕاسان، لە لای کاک کاوەوە بە شێوازێک تیۆریزە و شەرح و بەیان دەکرێت و بەرە بەرە بەرەو راسان هەنگاو هەڵدەگرێ .  کاوە باوەڕی قوڵی بە ڕاسان بوو، بۆ بەریزسدیق کەبودوەند لە کاتی مانگرتنی لە خواردندا دەنوسێ

٢٩/٠٥/٢٠١٦

چرکە سۆزیکم بۆ کاک سدیق!

کەش و هەوای ئەم رۆژانە زیاتر پێویستیی بە هەبوونت هەیە!

ئەم لاواز بوونەت پڕە لە بەر گری و تەژیییە لە ئازادی…..

 بەڵام هەستەوە با چیدیکە هیچ تاک و گرووپێک لە سەر کەرامەتی تۆ ،سەودای باوەڕو بەرگری نە کەن،

ئێستاکە بەس بە هەستانەوەت و بزەکانت ، دەتوانی ئاو بەسەر ئاوردا بکەی،

لەو چەن ڕۆژەدا کە گۆڕەپانی سەلماندنی مرۆڤایەتی،بۆ دوورە پەرێزی لە درووشم ،نەمپرژایە سەر هیچ ڕستە بەندیک!

ڕاسانی تۆ گرنکی نۆیی کۆڵنەدانی وە رێخستوە! هەستەوە کاک سدیق..

لە ڕۆانگەی کاوەوە، ڕاسان هەموو شتێکە و هەمو شتێک ڕاسان . بۆیە لە نووسینەکانی دا بەتەواویی رەنگ ئەداتەوە.

٣١/٠٥/٢٠١٦

گڕی خەباتمان لە ڕاساندایە.

هەنووکە ،زرینگەی دەراغ و چەکی پێشمەرگەو پشکۆی بزەی ڕۆح بەخشەکانی کاک سدیق،

رۆژەفی بیرۆکەی ئێمەیە و هیچی دیکە!

مهاباد سەربەرزترە لە جاران، بەرامەی پێشمەرگە،دەشت و دۆڵی تەنیوە.

پێشمەرگەو کاک سدیق، هاوکات لە ڕساندان و پێشمەرگە و تەنیا بزەیکی شەنگەسوار،

مەتەریزەکانمان پشت ئەستوورتر دەکات.

هەر بۆیە!

یەکەم: خۆتان سەرقاڵی بابەتی پڕلە شوورەیی بووکەشوشەیک وەک ڕۆحانی و کۆیلە خۆیڕیەکانی پەرلمانی سەخیف مەکەن و لێگەڕین بۆ ئەوانەی شاگەشەیان بوون و دەبن .

دوهەم : پشتگیری هەنگاوی پێشمەرگە بکەن بەر هەر چەشنیک کە بۆتان دەڵۆی، دەتوانی

بریسکەیەکی نێو چاوانێکی تەڕی سەر ریگایک بێت.

سێهەم: فۆکووس لە سەر  بارودۆخی کاک سدیق و هەوڵدان بۆ پشتگیری ئەو تیکۆشەرە راستەقینە، بە هەرشێوەیک و دەرفەتێک.

چوارم: سەرنجدان بە تراژدیای ئاورتیبەردانی سروشتی کوردستانمان بە دەستی بە کرێگیراوانی رژیمی ئیران و هەر چەشنە کاردانەوەیەکی نارەزایی کە بۆتان دەڕەخسێت.

پەراویز، پلانی هەمیشەیی دوژمنی ئێمەیە و باوەڕ بە خۆبوون و سەربەستی، تەنیا چەکی دوژمن بەزێنمان دەبێت.

هەلشێواوی کۆنە جاش و هیستریکی سۆپای ریژیم و پەلەقاژەشیان،خۆشترە لەخۆشیەکانی ئەمرۆژانەمان.

کاوە جەوانمەرد .

بڕیاری دەس پێکردنەوەی خەباتی چەکدارانە گوڕ و تینێکی تازەی بە سەرجەم پێشمەرگەکانی حێزب دابوو، یەک لەوان “کاکۆ” بوو کە ویرای کۆمەلێ لە پێشمەرگەکان، بریاری گەڕانەوەی بۆ قووڵایی خاکی نیشتمان دابوو .

 دیارە سەرەتا سەرکردایەتی حێزب موخالفی چونەوەی کاوە بوون، بەڵام کاتێ لە گەڵ پێداگری خۆی بەرەو روو بوونەوە، چارەیەکیان بۆ نەما، جگە لە موافقەت.

کاکۆ لێوانلێو بوو لە خوشەویستی خەلک و نیشتمان، کاتێک چاو لە نوسینەکانی ئەکەیت بە باشی ئەوەت بۆ روون ئەبیتەوە. ئەو هەستی بە تامەزرۆیی خەڵک بۆ گەڕانەوەی پێشمەرگە بۆ ناوخوی ولات کردبوو،  خۆشی تامەزرۆی خاک  و وڵاتی بوو، هەر بۆیە ئۆقرەی نەمابوو.

٠٤/٠٦/٢٠١٦

مووچڕکەیەکی لێوانلێو لە سۆز .

پاش دووشەو و رۆژ میواندارییەکی دایکانە و تەژی لە سۆز وخۆشەویستی، کاتی مالئاوایی، نایلۆنێکی هێنا، کاتێک سەیرمان کرد بینیمان چای وشکی تیدایە، پرسیارم کرد دایە گیان ئەمە چیە؟ وتی ٣سال پێش ئێستا ،پۆلیک پیشمەرگە وەکو ئێوە بە ئێرەدا گوزەریان کرد و هاتنە ماڵی من.  کاتێک رۆیشتن ئەم نایلۆنە چای یەیان بە جێ هێشتووە،لەو ٣ سالەدا ڕام گرتبووهەتا دوبارە دێنەوە، بەڵام بیزانن کە بە خوشەویستی پێشمەرگەوە، یەکجارم لێ دەم کردوە هەتا تۆزقالێک لە تامەزرۆیی من بۆ پیشمەرگە تەسکین بدات و هەتا ئیستا ئەو ئەمانەتەم وەکوو چاوم پاراستووە.

دیمەنێکی هەژینەربوو، چاوم و ناخم لە پڕ بوو بە گۆمێکی پڕ لە ڕاز و ڕەمزی ئەهورایی!

دایەگیان شتێک وەکو تەبەڕوکە لای تۆ و ئاوەها تەسکینیک ئەدات،هیچ کات وەری ناگرینەوە ، چون ڕەنگە ئێمەبە قەدەر تۆ نەزانین کە ئەوە بەهاکەی چەندە،

دەستیمان ماچ کردو بە دڵیکی پڕ لە هەست و هیوا و تامەزرۆییەوە مالئاواییمان لێکرد و ڕێگای کەژمان گرتە بەر…

ئەمە قامووسی پڕ لە رازی پیشمەرگە و گەلە ،موڵک و بیرەوەری پیشمەرگەی دیموکرات .

٠٥/ ٠٦/٢٠١٦

نیشتمان باوەشی ئاوەڵاکردوە شەپۆلی بۆ بدە شەنگە سۆار .

٠٧/٠٦/٢٠١٦

هەنووکە خاکی نیشتمان ،هەناسە ئەدات! ئەوە ڕەمزی پێشمەرگەیە…..

نوسراوەکانی ئەو دوایانەی شەهید کاوە جەوانمەرد، ڕەنگی ماڕئاویی لێ نیشتبوو، وەک بڵێی بە ڕێگایەکدا هەنگاو دەنێ کە بێ گەڕانەوەیە. دیارە هەمو پێشمەرگە، لە سەرەتاوە خۆیان بۆ ئاکامی ژیانی پێشمەرگایەتی ئامادە دەکەن.بەڵام ئەوە وەکوو ئەسڵێک و یاسایەکی نەنوسراوە، مەرجیش نییە کە هەموو پیشمەرگەیەک شەهید بێت.راستیەکەیشی ئەوەی کە پیشمەرگە خولیا و ئەوینداری ژیانی باشترە بۆ خۆی و خەلکەکەی و شەهید بوون، نە ئامانجە ونە ویست.

٠٨/٠٦ ٢٠١٦

ئازاری ماڵئاواییەک کە تۆزقاڵێک گەرەنتی گەڕانەویشی لە سەر نییە،لە ئازاد کردنی گوند و شاریش پێ گرینگتر و لۆژیکی ترو قووڵترو سیاسی تر و دەیان دەستەواژەی پڕ لە بەتاڵیی دیکە، بە بایەخترە.

ئەو “سطحی نگری”یەم لە دەیان وتاری دوورو دریژ”خوش چەواشە”پێ پڕ بەهاترە!

تەزی مالئاواییە، رەمزو هەناسەی گەلێک ،ئازار و ناسۆری دایکێک و هەناسە ساردی خوشەویستێکە کە هەموو کەس ناتوانێت هەستی پێ بکات،

ئەمە شیعر نیە، ئامانجێکە کە ئەوانەی ناتوانن بەدەستی بێنن ،پێی دەڵێن : شۆعار و شێعر..

لیباس خاکیەکان، ئێوە هەر براوەی ئەو چەواشە بازاڕەن،

کاوە جەوانمەرد.

٠٩/٠٦/٢٠١٦

بزوێنەر!

بایەخی خاک بە پیرۆزبونیەتی

خوێنی نێو شادەماری خاکی نیشتمان بە خشپەی بن لاقی پێشمەرگە،دەکەوێتە جمان.

دارستانەکان هەناسەیان سواردەبێت و کانییەکان، فرمێسکی کامەرانی شاخ و هەرد،هەڵدەورینن.

ئەمە راسانێکە بۆ گەل

گەلێک و دیمۆ کراتی

دموکراتی بزوینەر

کاوە جەوانمەرد

ساڵەکانی ٤٦ و٤٧ ی هەتاوی کە کە شۆڕش لە باشووری کوردستانر گەرم بوو، حێزبی دیمۆکراتی کوردستانی ئێران لەلایکەوە لە بەرانبەر ئەو شۆڕشەدا وەک ئەم بیست ساڵەی رابردوو،هەستی بە بەرپرسیارەتی دەکرد و لەلایکی تریشەوە بێدەنگییەکی کوشێنەر باڵی بەسەر وڵاتدا کێشابوو، شای گۆڕ کراویش، بەوەکە جەزیرەیەکی ئەمنی پێک هاوردبوو لە خۆ باێی بووبو،باڵام کۆمەڵێک لە ئەندامانی حێزبی دیمۆکرات لەوانە:  شەهیدان (سمایلی شەریفزادە ومەلائاوارە و….)، قۆلی خەباتیان هەڵماڵی  و بۆ ماوەی ١٨ مانگ، ناوچەی سەردەشت و بانە و سەقزیان کردە گۆڕستانی بەکرێگیراوانی ژەندەرمەو ساواک و، بە بەهای گیانیان، ئەو بێدەنگیە  قورسەیان  شکاند و حێزبی دیمۆکراتیان لە وقەیرانە ڕزگار کرد .

راسانیش دووپات بوونەوەی میژووە .

یادی شەهیدانی ڕاسان و هەموو شەهیدانی ڕێگای ڕزگاری بەرزو به‌ڕێز بێت .

راسان ، كارێكی هونه‌ریی شۆڕش ئاهی
             ڕاسان ، كارێكی هونه‌ریی شۆڕش ئاهی

سه‌رنج و كۆمێنت

كۆمێنت