کۆبوونەوەی نرەزایەتیی خەڵکی ناوچەی سەرشیو دژ بە بڕیارە دژە ژینگەیەکانی شارەوانیی مەریوان

0
1077

ڕۆژی کورد: ڕۆژی هەینی ٢٧ی ڕەشەمەی٢٧١٦ی کوردی، خەڵکی ناوچەی سەرشیوی سەر بە شاری مەریوان پێکهاتوو لە گۆندەکانی “بەردەڕەشە، دووپلورە، گوماڕەلەنگ و گلە”… لە دۆڵی سماقان بە مەبەستی  ناڕەزایەتی دەربڕین بە بڕیاری شارەوانیی شاری مەریوان کە هەوڵێکی چاوەڕواننەکراودا دۆڵی سماقانیان وەک شۆێنێک بۆ ڕشتنی زبڵ و پاشماوەکانی شاری مەریوان و سەوڵاوا هەروەها ناوچەی کانی دینار دیاری کردووە، کۆبوونەوەیەکی ناڕەزایەتییان پێکهێنا.

بەپێی هەواڵی ماڵپەڕی ژینگەوان، ئەم کۆبوونەوە ناڕەزایەتییە لە کاتێک دایە کە حەوتووی پێشوو خەڵکی ئەم ناوچەیە لەبەردەم شارەوانیی شاری مەریوان ناڕەزایەتیی خۆیان لە هەمبەر ئەم بڕیارەی شارەوانی، بە بەرپرسان ڕاگەیاندووەو دوو جاریش لەبەر فرمانداری و شارەوانی کۆبوونەوە و چوونەتە پارێزگاش، بەڵام هەوڵەکانیان تا ئێست ابێ‌ئاکام بووە.

بەپێی ئەو هەواڵە، ئەمڕۆش خەڵک لەو شوێنە دانیشتوون و پاسەوانی دەدەن تا پێش بەو کارە بگرن.

زانیارییەکان باس لەوە دەکەن کە ئەمڕۆ هێزی تایبەت بە دوو ماشین هێزەوە هاتوون تا بڵاوە بە خەڵک بکەن و ئیزن نەدەن چیتر  لەو شوێنە کۆ ببنەوە.

یەکێک لە بەشدارابوونی ئەم کۆبوونەوەیە بە ماڵپەڕیژینگەوانی ڕاگەیاندووە: “بەرپرسان سەرەتا بە سازکردنی بەنداو بە هەزاران هێکتار لە زەوی و زاری خەڵکی ئەم ناوچەیانە خنکاند کە تا ئێستاش خەساری ئەم بەنداوە بە جەستەی ئەو ناوچەوە دیارە، ئێستاش دەیانهەوێت بە گواستنەوەی زبڵ و پاشماوەکانی شاری مەریوان و سەوڵاوا ئەم ناوچە گەشتیارییە بکەن بە شۆێنی پاشماوەکان کە بۆخۆی سەرەتایەکە بۆ بڵاوبوونەوەی دەیان جۆر نەخۆشی.”

ئەم هاووڵاتیە لە درێژەدا وتی: “تەنیا لە شاری مەریوان ڕۆژانە ٦٨٠٠٠جۆری زبڵ و پاشماوە کە ٥٠٠ جۆری ئەم پاشماوانە نەخۆشیی شێرپەنجەی لێدەکەوێتەوە لەو شۆێنە فڕێ دەدرێت، یەکێک لە سەرەکیترین هۆکاری بڵاو بوونەوەی نەخۆشیی شێرپەنجە لە ناوچەکە دەبێت، وەک بۆمبێکی کیمیایی بۆ ناوچەی سەرشیوی مەریوان دەبێت.”

یەکێک لە چالاکانی ژینگەپارێزی شاری مەریوان کە نەیویستووە ناوی ئاشکرا بکرێت لەو بارەوە بە ماڵپەڕی ژینگەوانی ڕاگەیاندووە: “به‌داخه‌وه‌ له‌ ئێستادا به‌هۆی که‌مته‌رخه‌میی به‌رپرسانی ژینگه‌ و لایه‌نه‌ په‌یوه‌ندیداره‌کان و هه‌روه‌ها ڕه‌چاونه‌کردنی ئه‌م تایبه‌تمه‌ندییه ژینگه‌ییانه‌ له‌ مه‌ترسیی له‌نێوچووندایە به‌هۆی هێنانی زبڵ و پاشماوه‌ی شاره‌کانی مه‌ریوان، سه‌وڵاوا، کانی دینار و به‌رده‌ڕه‌شه‌وه‌، چه‌ندین جار خه‌ڵکی ئه‌م ناوچه‌یه‌ ڕوویان کردووه‌ته‌ لایه‌نه‌ په‌یوه‌ندیداره‌کان، به‌ڵام هیچ وڵامێکی ئه‌رێنییان وه‌رنه‌گرتوه‌. “

ئەو چالاک ژینگەپارێزیە لە درێژەدا وتی: “ئێمه‌ وەک  تاقمێک له‌ ژینگه‌پارێزانی شاری مه‌ریوان و خه‌ڵکی ناوچه‌ی سه‌رشیو ناڕه‌زایه‌تیی خۆمان به‌م کاره‌ ده‌ربڕیوە، ئێمه‌ داواکارین له‌ ته‌واوی لایه‌نگرانی ژینگه‌ و شوێنه‌واره‌  مێژووییه‌کان و خه‌ڵکی به ئه‌مه‌کی شاری مه‌ریوان و سه‌رشیو، ده‌نگیان بخه‌نه‌ پاڵ ده‌نگی ئێمه‌وه‌؛ چونکه‌ کێشه‌ی زبڵ و پاشماوه‌کانی مه‌ریوان به‌ گوێزانه‌وه‌ له‌م لا بۆ ئه‌ولا چاره‌سه‌ر ناکرێت، ته‌نیا ئه‌م کاره‌ ده‌بێته‌هۆی له‌نێوچوونی به‌شێکی تر له‌م سروشته‌ جوانه‌.

چیای سماقان ‌ له‌ ته‌نیشت به‌ردی گاڕان له‌ ١٠ کیلومتریی خۆرهه‌ڵاتی شاری مه‌ریوان هه‌ڵکه‌تووه  که‌ پێکهاتووه‌ له‌ دارستانێکی چڕوپڕ و هه‌روه‌ها ڕوه‌که‌ تایبه‌ته‌کانی وه‌کوو: که‌ما، زه‌نگ، هه‌ڵز، به‌ڕه‌زا، ڕێواس و هه‌زاران ڕوه‌ک. گەلیی سماقان هه‌روه‌ها شوێنێکی گه‌شتیارییه‌ بۆ گه‌شتیاران به‌هۆی هه‌ڵکه‌وتنی پردی مێژویی گاڕان و به‌نداوی گاڕان له‌نزیک ئه‌م شوێنه‌ و هه‌بوونی چه‌ن کانیاوێکی ده‌گمه‌ن که‌ ئاوی ئه‌م کانیاوانه‌ ده‌ڕژێته‌ ناو ڕووباری گاڕان؛ له‌ ته‌واو وه‌ره‌زه‌کانی ساڵدا به‌تایبه‌ت وه‌رزی به‌هار جوانییه‌کی بێ‌وێنه‌ی به‌م شیوه‌ به‌خشیوه‌.

سه‌رنج و كۆمێنت

كۆمێنت