هاوار بازیان: بەبێ هاوكاریی خۆماڵی، ئەو كردەوە تیرۆریستییە سەركەوتوو نەدەبوو

0
1786

بە مەبەستی تاووتوێ کردنی، بەشێک لە ڕەهەندەکانی کردەوەی تیرۆریستیی شەوی سێ شەممە ٣٠ی سەرماوەزی ١٣٩٥٥ی هەتاویی بەر دەرگای قەڵای دێموکرات کە تێیدا ٧ کەس شەهید بوون، وتووێژێکمان لەگەڵ بەڕێز هاوار بازیان، ڕۆژنامەوان و چالاکی سیاسیی کورد ئەنجام داوە کە لێرەدا دەیخوێننەوە.

ڕۆژی کورد: یەکێک لە ئەندامانی پلە بەرزی یەکێتی لە ماڵپەڕی فەرمیی یەکێتی نیشتمانی ـدا نووسیویە، تیرۆری کۆیە، کاری تورکیایە؟ بەڕای ئێوە کوردکوتەنی “تورکیە و تیرۆری کۆیە، کوجا مەرحەبا”؟

هاوار بازیان
هاوار بازیان

بازیان: بە تۆزێك لێكدانەوەی سەرپێیی دەبینین توركیا ئێستە لە بەرەی سعوودی و دژبەری ئێراندایە، بەرەیەك كە هێزەكانی كوردیی نەیاری ئێرانیش خۆیانی تێدا دەبیننەوە، بۆیە هیچ پاساوێك هەڵناگرێ لە ئێستەدا ئەو كارە لەسەر دەست و ڕاسپاردەی توركیا بێ. ئەو جۆرە لێكدانەوانە لە دوو ئەگەر بەدەر نین:

یەک: بەلارێدا بردنی ڕاستییەكان و لادانی چاوەكانی تیرۆر لەسەر کۆماری ئیسلامی.

 دوو: ئەوەی بەڕاستی كە خاوەن ئەو بۆچوونە بە نەزانی و كاڵفامی دەستی بۆ پرسێكی وا گرینگ و مێژوودار بردووە كە من ئەگەری یەكەم بەهێزتر دەزانم.

ڕۆژی کورد: یەکێتی نیشتمانی هەم لە لێدوان و هەڵویست و ناردنی ڕۆژنامەوانانی بۆ ئێران و هەمیش لە کۆبوونەوەی ئەنترناسیۆنال سوسیالیست، بە هەموو جۆر بەرگری لە ئێران دەکا و هیرش دەکاتە سەر تورکیە، ئەو سیاسەتە لە چیەوە سەرچاوە دەگرێ؟

بازیان: یەكێتی، سیاسەتەكانی ناوخۆیی و دەرەكی لەسەر دوو بنەما داڕشتووە. نەیاربوونی پارتی دیموكرات و نیشاندانی خۆی وەك هاوپەیمانێكی جێ متمانەی ئێران.

هەر لە سەرەتای دەستپێكی جووڵەی چەكداریی نوێی ڕۆژهەڵاتییەكان، یەكێتی هاوشانی ئێران پێیوابوو پارتی دیموكرات لەپشت ئەو هەڵسانەوەیە. واتە ڕوون و ئاشكرایە لەو پرسەدا هەردوو لایەن دەگەن بە خاڵێكی هاوبەش كە دەبێ بەربەرەكانی لەگەڵ بكەن. یەكێتی نیشتمانی بەداخەوە ئەوەندەی مەیلی تارانی هەیە، خەمی موكریانی نەبووە و نییە. كێشەی گەورەتر لەوەی دووبەرەکیی سیاسیی ئەو هێزەیە كە زیاتر لە 20 ساڵە بەناوی “دۆستی دیموكرات”، وەك سەرچاوەیەكی سیاسی بەرامبەر ئێران، سوودی لە بوونی كوردی ڕۆژهەڵات لە ناوچەكانی خۆی بردووە. هەربۆیە نەك دەرفەت بە دیموكرات نادەن، بگرە دەرفەتەكانی دیموكراتیش لەبار دەبەن كە بەرهەمی خوێن و ڕەنجی دیموكرات خۆیانە.

ڕۆژی کورد: نامەیەک لە تۆڕە کۆمەڵایەتییەکان بڵاو بۆتەوە لە نازم دەباغ، نوێنەری هەرێم لە تاران کە دەڵی چاوەدێریی دێموکرات لە ساڵڕۆژی تیرۆری دوکتوردا بکەن، ئەو نامەیە ئی ساڵی ٢٠١٠ ـیە، ئەو نیشان دەدا، یەکێتیی نیشتمانی لەمێژە لە سیاسەتەکانی ئێرانەوە گلاوە، بەڕای ئێوە بۆی هەیە دەستی یەکێتی لەو کردەوە تیرۆریستیەدا هەبێ، یان هەکێتی ئاسانکاری بۆ کردبێ؟

بازیان: ئەو بەڵگەیە و دەیان بەڵگەی ڕاست و دیاری دیكە، هەموویان ئەو ڕاستییە دەردەخەن كە یەكێتی ناتوانێ خەمی ئێران نەخوات! هاوكات كەس ناتوانێ بڵێ سەرجەم یەكێتی تێوەگلاوە لەوەی دژایەتیی دیموكرات و بزووتنەوەی نوێی كوردی ڕۆژهەڵات بكا، بەڵام بێگومان بەشێكی “ئێرانی پەرەست”ـی ناو یەكێتی كە زیاتر لە نیوەی ئەو حیزبە لەخۆ دەگرێ و سەر بە باڵی “زۆرینەن”، بۆ ئەوەی شوێنی لەقی ناوەخۆیی خۆیان و بەهای سیاسیان لە مەیدانەكەدا زیاتر لە دەست نەدەن، ئاسانكاری دەكەن بۆ ئەوەی ئێران بتوانێ ئەو پەیامە بە دیموكراتان بدات كە دەستمان دەگاتە بەردەم مەكتەبی سیاسیتان! بەڵێ ئەو كارە و شێوازی كردەوەكە و ئەگەر بەراوردی ڕووداوەكانی پێشتریش دەكەی بە یەك ئەنجام دەگەی: بەبێ هاوكاریی خۆماڵی، ئەو كردەوە تیرۆریستییە سەركەوتوو نەدەبوو.

ڕۆژی کورد: بەڕای ئێوە لە هەمبەر ئەو لاگیریە ئاشکرایەی ئێران لەلایەن یەکێتیەوە و هەروەها پەراوێزخستنی کوردی خۆرهەڵات و ڕێگری لە چونەوەی پێشمەرگە بۆ زێدی خۆی، حیزبەکانی خۆرهەڵات زۆر شلگیر نین و زۆریان لەبەر یەکێتی دانەنەواندووە؟ ئەگەر بەڵێ، بۆ؟ ئایا دەتوانین بڵێین حیزبەکانی خۆرهەڵات، سەربەخۆییان لاواز بووە؟

بازیان: ڕۆژهەڵاتییەكان لە ماوەی 20 ساڵی مانەوەیان لە باوەشی باشوور، فێری زۆر شت بوون، یەكێك لەوانە “نەرمبوون”ی لەڕادەبەدەر بەرامبەر ئەوانەی بەناوی دۆست، دوژمنن. كاتی ئەوە هاتووە گلەیی لە یەكێتی و هیچ هێزێكی تر نەكەین و هەرچی گلەیی هەیە لە خۆمانی بكەین بەوەی: یەكێتی لەبەر بەرژەوەندییەكانی ئێمە ئامادە نەبووە و نابی دەست لە ملی ئێرانی هاوەڵی بكاتەوە و بەدیدێكی سیاسی ئەوە “رەنگە مەنتق” بی، بەڵام ئایا ئێمە تا كەی لەو هاوكێشەیەدا ژمارە “سیفر” بین؟ ئەگەر ئەو گلەیییە لە خۆمان بكەین، یەكێتی و سەرجەم هێزەكانی تری كوردی و ناكوردی لە جیاتی ئەوەی بە چاوی بەزەیی سەیرمان بكەن، وەك هێزێك حسێبمان بۆ دەكەن.

دیموكرات دەتوانێ وەك هەموو ئەو هێزە شۆڕشگێڕانەی دیكەی كوردی، شاخ لە دوژمن بگرێ و بانگەواز بۆ ناوەخۆ و دەرەوە بدا لەوەی تێكەڵی بن، جا ئەوكات ئەگەر وەڵامی پێویستی وەرنەگرتەوە دەتوانێ گلەیی لەوانە بكات كە ئێستە ئەو ڕەخنانەی وەك ئێمەی لێدەگرن.

 

سه‌رنج و كۆمێنت

كۆمێنت