دوو ڕێکخراوی جیهانیی مافی مرۆڤ، داوای ڕاگیرانی سزای لەسێدارەدانی ١٢ کەس لە بەندیخانەی کەرەج دەکەن

0
820

ڕۆژی کورد: ڕێکخراوی چاوەدیری مافی مرۆڤ و لێبردووەی ناودەوڵەتی، لە ڕاگەیێندراوێکدا کە ئەمڕۆ هەینی ٢٤ی بەفرانباری ١٣٩٥ی هەتاوی بڵاویان کردەوە، داوای ڕاگیرانی بەرێوەچونی سزای سێدارەی ١٢ کەس لە تاوانبارانی مادە هۆشبەرەکان لە ئێران دەکەن کە بڕیارە ڕۆژی شەممە ٢٥ی بەفرانباری ١٣٩٥ی هەتاوی لە بەندیخانەی ناوەندیی کەرەج لە سێدارە بدرێن.

لەو ڕاگەیێندراوەدا وێڕای ڕەخنە لە دەزگای دادوەریی کۆماری ئیسلامی کە سەرەڕای بەڵێنییەکانی، هەروا لەسەر لەسێدارەدان بەردەوامە دەڵێن: “بەرپرسانی بەندیخانەی ناوەندیی کەرەخ، ڕۆژی ١٩ی بەفرانبار، لانیکەم ١٢ کەسیان کە بە تاوانی مادە هۆشبەرەکانەوە، سزای سێدارەیان بەسەردا سەپاوە، بۆ ژوورە تاکەکەسییەکان ڕاگواستووە و پێیان ڕاگەیاندوون کە لەسێدارەدانیان سەداسەدە بەڵام بە هۆی مەرگی هاشمی ڕەفسەنجانی، بۆ ماوەی چەند ڕۆژ، وەدوایان داوە”.

ئەو دوو ڕێکخراوە مافی مرۆڤییە، شوناسی ٤ کەسیان ڕاگەیاندووە کە بریتین لە: عەلی محەمەد لوڕستانی، عەلی عبادی، محەمەد سلێمانی و مەجید بەدرلو، کە هیچ کام لەو کەسانە لە کاتی دادگایی کرانیان، پارێزەریان نەبووە.

لە کۆتاییدا وێڕای داواکردن لە ڕژیمی ئێران بۆ راگرتنی ئەو لەسێدارەدانانە، داوا دەکەن کۆماری ئیسلامی چاو بە یاساکانی لەمبارەوەدا بخشێنێتەوە و چیتر کەس بە تاوانی مادە هۆشبەرەکانەوە لە سێدارە نەدرێت.

 

سه‌رنج و كۆمێنت

كۆمێنت