خەڵكێكی هەژار لە سەر خاكێكی دەوڵەمەند

0
1070

رەسووڵ سوڵتانی

ئێران یەكێكە لە وڵاتە هەرە دەوڵەمەندەكان. دەوڵەمەندیی ئێران هەر لە سایەی ئەو نەوتەوە نییە كە دەیفرۆشێ، بەڵكو بن عەرز و سەر عەرزی ئێران هەمووی نیعمەتێكە، كە زۆرینەی خەڵكی ئێران لێی بێبەشن و تەنیا كەمینەی دەسەڵاتدار و دەستوپێوەندەكانیان لێی دەخۆن، جگە لەوەی كۆمەڵێك ناوەندی پاوانكراوی ئایینی و حكوومەتیش هەن، كە داهاتەكانیان ئەگەر بخرێتە خزمەتی خەڵكی ئێرانەوە بەشێكی زۆر لە باری قورسی هەژاری لەسەر شانی خەڵكەكەی لادەچێ.

جگە لەوەی سوپای پاسداران بازاڕ و بازرگانی و پشكی كۆمپانیا گەورەگەورەكانی بەرههەمهێنەرەكانی قۆڕخ كردووە، بنەماڵەی خامنەیی و رەفسەنجانی و بەشێكی زۆر لە ئەندامانی خوبرەگانی رەهبەری هەر كامە و بە شێوەیەك شادەمارێكی ئابووریی ئەو وڵاتەیان گرتووەتە دەست، لە حاڵێكدا خەڵكێكی زۆری ئەو وڵاتە دەوڵەمەندە بەدەست هەژارییەوە دەناڵێنن. هەموو ساڵێك لەگەڵ بەسەرداهاتنی وەرزی سەرمادا، پرسی كارتۆن خەوەكان، واتە ئەوانەی شوێنی حەوانەوە و ژیانیان ئەو لەتە كارتۆنەیە وا لەسەری دەنوون و بەخۆیاندا دەدەن، دەبێتە هەواڵی گەرمی راگەیاندنەكان، بەڵام ئەوەی بای خەیاڵیشی نییە، بەرپرسانی پایەبەرزی رژیمی ئێرانن و، كورد واتەنی مێشێكیشیان لێ میوان نییە.
شاعیرێكی تورك دەڵێ:

ئەی ئەو كەسەی بۆ سەڵەواتێك هەزار كۆشكی زێڕین دەكەیە شاباش، ئەو كۆشكە زێڕانە بفرۆشە و لە گیرفانی هەژارانی بكە…

رۆژانی هەینی لە خوتبەكاندا مەلاكانی خەتی خامنەیی كە دێنە سەر پرسە كۆمەڵایەتییەكان، یان ئەوەتا گوێیان لە حاست ژیانی خەڵك كەڕ دەكەن و بە خشكەیەك بە تەنیشتیدا تێدەپەڕن و هیچ ئاوڕێكیشی لێ نادەنەوە، یان ئەگەر پەرژانە سەر باری قورسی ژیان، دەسبەجێ تەوەری قسەكانیان دێننە سەر مەسەلەی قەناعەت و دەستپێوەگرتن، لە حاڵێكدا خەڵكێكی زۆر لەو ئێرانە پانوبەرینەدا هەن، كە هیچیان نییە تا قەناعەتی پێ بكەن و دەستی پێوە بگرن.

لەگەڵ ئەو هەژارییەدا هەموو رۆژێك باس و هەواڵی كڕینی جۆرەكانی مووشەك و چەك و تەقەمەنیی پێشكەوتووانە و سەردەمیانە دەبیستین كە گرێبەستەكانی لە نێوان ئێران و رووسیادا ئیمزا دەكرێت، یان باسی ئەوە دەكەن كە كاتی ئەوە هاتووە ئەو چەكانە بە رادەستی ئێران بكرێن.

ئەگەر رژیمی ئێران قەیرانی ئابووریی و توانای دابینكردنی ژیانی خەڵكی وڵاتەكەی خۆی نییە و، رۆژ بە رۆژ خەڵك بە دەست تەنگوچەڵەمەكانی ژیانەوە پتر دەناڵێنن و رێژەی هەژاری هەر دێ و پتر دەبێ، ئەی ئەو بوودجە زەبەلاحە لە كوێ دێنێ بۆ كڕینی چەكی جۆراوجۆر؟
ئەی بوودجەی ناردنی هێزی سوپای پاسداران بە چەكوچۆل و تفاقی خۆیانەوە بۆ سووریا و عێراق و پشتیوانیی ماددی لە گرووپە تیرۆریستییەكان لەكوێوە دابین دەكرێ؟ لەوانەشە بڕیاردەرانی رژیمی ئێران هەر دڵیان نەیە دەست بۆ بەیتولماڵ و بەشەماڵی خەڵكە هەژارەكە بەرن و هەموو ئەو بووجەیەیان لە لای ئیمامی زەمانەوە بۆ بێ، بەشكم بتوانن ئینقلابەكەیانی پێ بگەیەننە ئەوپەڕی دنیا.

ئەوەتا بەو دواییانە گەڵاڵەیەك درایە مەجلیسەكەی ئێران بۆ ئەوەی پشتیوانی لە شەش ملیۆن هەژاری ئەو وڵاتە بكرێ، كە بە دڵنیاییەوە هەژاران لە ئێراندا ژمارە و رێژەیان زۆر زۆر لەوە زیاترە، بەڵام ئەو گەڵاڵەیە بەلاوە نرا و پەسند نەكرا. چونكە بە قسەی
ئەنوەشیراوان موحسێنی، سەرۆكی ڕێكخراوی بێهزیستیی ئێران ئەم گەڵاڵەیە سه‌ری نه‌گرت، چونكە لە بواری حقووقی‌و قانوونی ئەم گەڵاڵانەی كە لە بواری ماڵی‌یەوە قورسایی دەخەنەسەر شانی دەوڵەت، لە مەجلیس باس ناکرێن.

ناوبراو ده‌ڵێ به‌شێکی که‌م زۆر که‌م له‌ خه‌ڵکی هه‌ژاری کۆمه‌ڵگا له‌ ژێر چه‌تری رێکخراوه‌ کۆمه‌ک‌به‌خشه‌ ده‌وڵه‌تی‌یه‌کان‌ دان ‌و تازه‌ بڕی 53 هەزار تمەن بۆ بنەماڵەی یەك كەسی‌و 72 هەزار تمەن بۆ بنەماڵەیەكی دوو كەسیش که‌ ده‌یاندرێتێ زۆر كەمەو به‌هیچ کوێ‌یان ڕاناگا.
جێی بیرهێنانه‌وه‌یه‌ كە ماوەیەك لەوەپێش گەڵاڵەیەك لە مەجلیسی شورای ئیسلامی سەبارەت بە پشتیوانی‌كردن لە 6 میلیۆن که‌سی هه‌ژاری کۆمه‌ڵگا هاتەبەر باس و لە دەستووری كاری تاوتوێ‌كردنی كۆمیسیۆنی کۆمه‌ڵایه‌تیی مەجلیس خرا، بەڵام ئێستا دەگوترێ كە ئەم گەڵاڵەیە بەهۆكاری ئه‌وه‌ی ده‌وڵه‌ت توانای نییه‌و بۆ جێبه‌جێ نابێ، وه‌لانراوه‌.

 

رۆژهەڵاتی ئازاد

سه‌رنج و كۆمێنت

كۆمێنت