نەیار و دارا

0
38
ئەسرین شەفیعی

لە ڕووژگارەیل زۊنێ دوگلە برا بۊن یەکێ دەوڵەمەن،یەکێ ڕۊتەڵ،برای ڕۊتەڵ هەر ڕووژ چێ بارێ چیلگ لە کۊە هاورد و فرەتەی ئڕا خەرجی مناڵێ،برای دوڵەمەنێ داشت ک هاوسایشێ بۊ،چەنێگۊ کاوڕێ گرتۊدە بەن، کاوڕە لە وەر دۊ ڕێ نەکرد. برای ڕۊتەڵ وەتە ژنە : دۊەتەگە ئەگەر ماڵ برام سەر کاوڕە بڕین و من لە ماڵ نەۊم بەشم ئەڵگرین وە بێ من نەخوەینەی. ژن وەت : ئەرێ پیاگە ئەی چ قسیەیگە بوود وە بێ تو لە گووشتە بخوەیم ، یا بڕشنیمەی یا کەیمەی ئاو گووشت وە یەکەو خوەیمەی. یەک دو ڕووژ گوزەیشت برای دەوڵەمەن سەر کاوڕە بڕی .
برای ڕۊتەڵ هەرچێ ملەقوتی کرد چەوێ لە قنجگێ گووشت نەکەفت. برا وەت هاتێ ئیمە لە هۊرێەو چۊم سوو ئڕامان تیەرن .
ئەی ڕووژ ئڕا چیلگ نەچێ ، لە ماڵ لە موودەی گووشت وسا.
ئەی ڕووژی گووشت ئڕایان کل نەکردن. ڕووژ سێم هەم چەوەڕێ گوووشت لە ماڵ وسا ئەمان کل نەکردن. دی ئاشازێ نەگرت چێیەو بان خانگەی ئەوانوو تەقەهڕ کرد وەت تا بانەو دەیشت بۊننەم خوڵکم بکەن ، تەقەهڕ خس لە بان ماڵ برا ، برارزاگەی هاتە ناو هسارە وەت : یە کییە لە بان ماڵە
مەموو وەت منم ڕووڵە، برارزا دەنگ نەکرد و چێ وە ماڵەو.
ئەویش چێ لە بان کولاوەنجەو نووڕسە ناو ماڵ برا ، لەیرە دی شوون سەرپای کاوڕەیش نییە .
ئاخێ لە ناخێ دەرچێ…
ئێوارە وەتە ژن : دۊەتەگە دا دوانزە فەتیرە ئڕام درس بکە ، گوڵ سوو ئڕا منەی خودا چم ، توام لێ بپرسم ئڕا ڕزق ڕووزییم نیەید.
ژن وەت پیاگە یە چ قسیەگە ئۊشی
ئڕا خودا دیارە تو بۊنیدەی ، خودا خەیوییە ، پیاگ وەت : نە تا نەچم نەۊنمەوەی لە بان زەۊ نیەنیشم.
پیاگ پڕ هەوانەی نان کرد و کڵاشەیل کردە پا و لە ماڵ داوەو
دەیشت ، ڕێ کرد و ڕێ کرد لە منەی خودا ، چۊنەگ کڵاشەیلێ دڕیا . شەو لە ماڵ دەوڵەمەنێ خس ئڕا خەفتن . پیاگ دەوڵەمەن لێ پرسی : کوڕەگە ئڕا کوو چی وەی کڵاشەی دڕیاگەو ؟
پیایگ ڕۊتەڵ وەت : ئڕا منەی خودا چم ، توام ڕزقم لێ بسێنم .
پیاگ دەوڵەمەن وەت : کوڕەگە یە چوە ئۊشی ، هۊچ کەس تا ئێرنگە خودا نەیە. پیاگ ڕۊتەڵ وەت : نە بایەد بۊنمەوەی بزانم ئڕا ڕووزییم نیەی.
پیاگ دەوڵەمەن لەیرە دی قسیەی وە گووش پیاگ ڕۊتەڵ نیەچوود دی هۊچ نەوەت . د کوت شەوار جفتی کڵاش نوو و جەڕەی پۊل نا ژۊەر سەر پیاگ تا شەوەکی ئەڵسێ بچوودەو ئڕا ماڵ و واز بارێ لەی کارە.پیاگ دەوڵەمەن شەوەکی ئەڵسا لەیرە دی پیاگ هێمان ها ناو جییە ، دەس نا پێیەو ئەڵسانەی .
وەت : کوڕەگە یە چۊ نەچیدە
ڕۊتەڵ وەت : وەتم تیکەی نان و چایگ بخوەم و بچم لە شوون خودا بگردم .
پیای دەوڵەمەن وەت : کوڕەگە کڵاشەیلە بکە پادوو پۊلە بنە گیرفاند و بچوەو سەر ژن مناڵەد.
پیاگ وەت : نە من ڕووزییم لە خودا توام ، پیاگ دەوڵەمەن هەرچێ وەلێیا وەت وە گووش پیاگ ڕۊتەڵ نەچێ.پیاگ ڕۊتەڵ وەت: پەنج شەش گلە نان بەنە پیم تا بچم ، ئەوانیش نان دانە پێ و ئەۊیش نایەی ناو هەوانەو داوەو دەیشت.
ڕێ کرد و چێ تا ڕەسێ وە کۊەی وێنەی مانشت ، شەو لەورە مەنەی.
د کوت شەوار بۊە دەنگ لۊلەی گورگ و قیژەی چەقەڵ .
وەتە خوەی یە ئڕا چوە هاتم ، گیاندارەیل خوەنەم ، ئەی جار وەت نە کورە نیەخوەنم من ئڕا شوون خودا هاتمە . خودا لەیرە دی پیاگ ول کەر نییە وەتە جبرەئیل : پیاگێ ها لەو کۊە بچوو بزان چوەییە هەرچێ توای بەی پێ و هەر مرادێ دێرێ ئاسڵ بکە .پیاگ لەیرە نووڕس دی شەوقێ لە وێنەی مانگ درەوشێ ، دەنگ ئڵاورد و خوڕیا وەت : کییە ؟؟؟ دەنگ بکە ونە وەی گوڕزە شان کوڵد هەڕم .
جبرئیل وەت : ڕخد نەچوو من ئڕا لای تو هاتمە ،بەو وەر بۊش بزانم وە شەوە لەی کۊەی پڕلە گیاندارە چوە کەی؟؟
پیاگ وەت : لە منەی خودا گەردم ، توام لێ بپرسم ئڕا ئێقرە بەدبەختم ، ئڕا ڕزقم نیەی
جبرئیل ک دی پیاگە ساف کافە وەت من خودام بۊش بزانم چوە لیم توای
پیاگ وەت : پۊل توام ئڕا خەرجی ژن مناڵم
جبرئیل وەت : لەی سانە هۊردە بکە هەوانەگەد گشتێ بوودە تڵا
پیاگ ئڵاجەۊێ هات ئەمان لە ناو دڵەو وەت بیلا بکەمە ناو هەوانە بزانم ڕاس ئۊشێ ،
لەی سان و کوچگە ئەڵگرت و کردە ناو هەوانە
لەیرە نووڕسە ناو هەوانە دی ماڵگدە ڕاس ئۊشێ هەوانە پڕە لە تڵا ، دەس برد هێز هەوانە بەید و بخەیدە شانا لەیرە دی فرە قورسە،
سەر ئەڵگرت و نووڕسە خودا و وەت: من یە پانزە ڕووژە ڕێ کەم تا دیمەسەدەو ئمجا چۊ تۊەنم پانزە ڕووژ یە بخەمە چەک شانا و وەرەو ماڵ بچم؟؟؟
ئە ڕاس ئۊشی لە در ماڵ ئەی تڵایلە بەی پیم.
جبرئیل ک لای پیاگ خوەی وە خودا نیشان داۊد وەت : بچوەو ئڕا ماڵ
سڕووکانێ ها دەر ماڵد هەفت کۊزە تڵا ها ژێرێ، بچوو هەناێ کەسێ نەۊ بدراران و بوەران ئڕا ماڵ …
گوزەیشت و گوزەیشت تا پانزە ڕووژ ، پیاگ ڕەسی وە ماڵ ، لەی ئانە دو گلە ناخاڵە لەی دەیشتە نیشتۊن ،یەکلان وەت : پیاگە ک چۊد لە منەی خودا هاتەو ، چمان خودا دییەو؟؟ئەوەکە وەت: بەو بچیم کوڵ بگریم بزانیم چوە ئۊشێ ئڕا ژن مناڵەی ،پیاگ چێیەو ناو ، ژن هاتە پیرێیەو وە ڕشقەن وەت : چوە کردی پیاگە ؟ خودا دیدەو ؟؟
پیاگ وەت : ئا دیمەوەی
ژن لەنوو وە ڕشقەنەو پرسی : چوە دا پید؟؟؟
پیاگ وەت : وەت بچوو ژێر سڕووکانەی دەر ماڵدان بێرەو هەفت کۊزەی تڵا ها ژێرێ
ژن خەنس و وەت : کووڕەگە یە شێویایدە
یە چ گەپێگە، کی خودا دییە ک تو بۊنیدەی
پیاگ وەت : ئمشەو چم سڕووکانە دەمەو نیشاند دەم شێت بۊمە یا نە. پیالەی چای ئڕام بار.
پیاگ چای خوارد و خەوێ بردەو…

ناخاڵەیل ک ئەی گەپە ئەژنەوین ئڕا خاتر ڕاس درووی د کوت شەوار ژێر سڕووکان دانەو لەیرە دین دا کۊزە ها تێ . دەر یەکلان دانەو دین پڕ وە پڕێ زەرداڵەس
لە ئەمر خودا تڵا لە وەر چەو ناخاڵەیل بۊە زەرداڵە . یانیش لە قینا چێن هەر هەفت کۊزە ڕشاننە ناو کلاوەنجەی ماڵ پیاگ ڕۊتەڵ و واین ، پیاگ ڕۊتەڵ و ژن و مناڵەی لە دەنگ خشە هەڵپەرین ، لەیرە دین دەور کوانگ و ناو ماڵ پڕە لە تڵا
پیاگ وەتە ژن : ژنەگە نەوەتم ودا دیمەسەو ، ئەوەسە خوەی تڵایلە هاوردەو ناو ، ژن و مناڵ و پیاگ لە ناو ئەی هەمگە تڵا خنجگە کردن ،
لە خوەشی نەزانسن چوە بکەن….
ناخاڵەیگ ک شەو کۊزەی زەرداڵەیلە ڕشانە ناو ماڵ پیاگ ڕۊتەڵ شەوکی وەتە داڵگ : داڵگە وە بوونەی ئاگر هاوردنەو سەرێ بەی لە ماڵ هاوساگەمان بزان چوە کن. داڵگیش وەت : هەمرە چم.
ژن هاوسا هات ئڕا ماڵ پیاگ ڕۊتەڵ و وەت: ئڕا ئاگر هاتمە . ژن پیاگە چوود ئاگر بارێ ، ژن هاوسا وە دزییەو نووڕسە ناو ماڵ پیاگ لەیرە دی ناو ماڵ پیاگ ڕۊتەڵ پڕاوەپڕێ تڵاس هات و ئڕا کوڕ وەتەو ، کوڕ وە نک ناهمێد دا لە بان دەس…
ماڵ پیاگ ڕۊتەڵ چۊنە دەوڵەمەنەو بۊن هزار جار فرەتر لە برای دەوڵەمەن…..

ئەسرین شەفیعی:
وە ناو خودای بێ وێنە
من زەینەب شەفیعی لە مانگ کیسەتەکن زمسان ساڵ 61 لە شار ئەیوان وە دی هاتمە. تەنیا تا دیپلم خوەنسمە.
نزیکەی شەش مانگە وە شێعر و نۊسەری ڕۊ هاوردمە و مەیل فرەی وە شێعر و ئەدبێیات کوردی دێرم.

سه‌رنج و كۆمێنت

كۆمێنت

‎وه‌ڵام بده‌وه‌