لە کۆبوونەوەی گشتی ناره‌زایه‌تی مامۆستایان لە شارەکانی ئێران لانیکەم ٣ كه‌س دەسبەسەر کراون

0
14

رۆژی كورد :
مامۆستایانی شارە جیاوازەکانی ئێران بە پێی بانگهێشتی ئەنجۆمەنی هاوئاهەنگی ڕێکخراوە هاوپیشەییه‌کانی مامۆستایانی ئێران هەستان بە سازدانی کۆبوونەوەی ناڕەزایەتی لە بەر دەم ئیدارەی پەروەردە و فێرکردنی شارەکانی ئێران.

بە پێی ڕاپۆرتەکان لە ناوخۆی ئێران مامۆستایان ئەمڕۆ پێنجشەممە ڕێکەوتی ٢ ئەیار هاوکات لە گەڵ ڕۆژی مامۆستایان لە ئێران کۆبوونەوە و ناڕەزایەتی خۆیان دەربڕی، ئەم کۆبوونەوانە بە پێی بانگهێشتی ئەنجۆمەنی هاوئاهەنگی ڕێکخراوە هاوپیشەییه‌کانی مامۆستایانی ئێران بەڕێوە چوون. ئەنجۆمەنی هاوئاهەنگی ڕێکخراوە هاوپیشەکانی مامۆستایان لە هەواڵی گیران و دەسبەسەر کردنی ٣ مامۆستایان ڕاگەیاندووە.
 بە پێی ئاگاداریەکانی ئەم ئەنجۆمەنە مامۆستایان لە پارێزگاکانی ئازەربایجانی رۆژهەڵات و ڕۆژئاوا، هەردەبێڵ، ئەلبۆرز، ئیسفەهان، تاران، خۆراسانی باشوور، خۆراسانی ڕەزەوی، کۆردستان، کرماشان، گیلان، هەمەدان و یەزد کۆبوونەوەیان کردووە و نارەزایەتی خۆیان دەربڕیووە. ئەنجۆمەنی هاوئاهەنگی ڕێکخراوە هاوپیشەییه‌کانی مامۆستایان لە بانگهێشتەکەی خۆیدا بە تۆندی ڕەخنەی لە نزمبوونی ئاستی تێڕوانین بۆ قۆتابخانەکان، گەڵاڵەی چەوسانەوەی مامۆستایانی تەواو کات، کەمبوونی مەعاش و حەقدەستەکان، دواکەوتنی پارەی مانگانەی حەقدەست لە لایەن دەوڵەتەوە و گیران و دەسبەسەرکرانی چالاکانی بەرگری لە مافی مامۆستایان گرت و داواکاری کۆبوونەوە و دەربڕینی نارەزایەتی کردبوو لە لایەن مامۆستایانی هەموو شارەکانی ئێرانەوە.
ئه‌نجۆمه‌نی هاوئاهه‌نگی ڕێكخراوه‌ هاوپیشه‌ییه‌كانی مامۆستایان له‌ سه‌ر كاناڵی تێلێگرامی خۆیان هه‌واڵی‌ ده‌سبه‌سه‌ركرانی ره‌سووڵ بۆداقی لێكۆڵه‌ری ئه‌نجۆمه‌نی هاوپیشه‌یی مامۆستایانی تاران و مۆحه‌ممه‌د فه‌لاحی كارگێری گشتی ئه‌م ڕێكخراوه‌یان ڕاگه‌یاندووه‌ و باسیان له‌وه‌ كردووه‌ كه‌ ده‌سبه‌سه‌ركراوه‌كان بۆ شوێنێكی نادیار گواستراونه‌ته‌وه‌ و چه‌ن ماڵپه‌ڕێكی دیكه هاوكات باس له‌ گیران و ده‌سبه‌سه‌ركرانی مۆجته‌با قۆڕه‌یشیان ئه‌ندامی ئه‌نجۆمه‌نی مامۆستایان ده‌كه‌ن و هاوكات باس له‌ سه‌ر گیرانی كه‌سانێكی زیاتریش له‌ ئارادایه‌ و به‌ وته‌ی چه‌ن شایه‌د حاڵێك سێ كه‌س له‌ ژنانی خانه‌نشین كراوی په‌روه‌رده‌ ئازاد كراون و له‌ چاره‌نووسی ئه‌وانی دیكه‌ هیچ هه‌واڵێك به‌رده‌ست نیه‌. ئه‌نجۆمه‌نی هاوئاهه‌نگی مامۆستایان ڕایگه‌یاندووه‌ له‌ شاری تاران هێزه‌كانی ئه‌منییه‌تی به‌ جل و به‌رگی شه‌خسی له‌ ناو كۆبوونه‌وه‌كان دا به‌ ته‌واوی هه‌ست پێده‌كرا و ئه‌و هێزانه‌ له‌ گه‌ڵ وێنه‌گرتن له‌ كۆبوونه‌وه‌كان رێگریان له‌ جه‌ماوه‌ری ئاسایی ئه‌كرد بۆ وێنه‌ و ڤیدیۆ گرتن له‌ كۆبوونه‌وه‌كان.
ئه‌نجۆمه‌نی هاوئاهه‌نگی مامۆستایان پیش له‌ دوو حه‌وتوو به بانگھیشتی خۆی داوای له‌ مامۆستایانی له‌ سه‌ر ئیش و خانه‌نشین كردبوو كه‌ هاوكات و هاوده‌نگ له‌ هه‌موو شاره‌كان له‌ رۆژی فه‌رمیی مامۆستایان له‌ به‌رانبه‌ر ئیداره‌ی په‌روه‌رده‌ و فێربوونی شاره‌كانیان كۆبوونه‌وه‌ بكه‌ن و ناڕه‌زایه‌تی خۆیان به‌رانبه‌ر مافه‌ پێشێلكراوه‌كانیان ده‌ربڕن و مامۆستایانی سه‌رانسه‌ری ئێران ئه‌مڕۆ یه‌كده‌نگ كۆبوونه‌وه‌یان كرد و به‌ رێپێوان و درۆشمه‌كانیان ناره‌زایه‌تی خۆیان به‌رانبه‌ر هێزی ده‌سه‌ڵات ده‌ربڕی كه‌ له‌ ئاكام دا چه‌ن كه‌سێك ده‌سبه‌ر و به‌ندكراون و راپێچی شوێنێكی نادیار كراون. جێگای ئاماژه‌یه‌ كه‌ له‌ كۆبوونه‌وه‌كانی دوێنێ رۆژی كرێكار له‌ به‌رانبه‌ر ئه‌نجۆمه‌نی پارڵه‌مانی ئێران له‌ شاری تاران چه‌ن كه‌سی چالاكی مافی كرێكاران ده‌سبه‌سه‌ر و ره‌وانه‌ی به‌ندیخانه‌ كراون و تا ئێستاش چاره‌نووسیان نادیاره‌.
له‌ كۆتایی ساڵی ڕابردوو سێهه‌مین خولی مانگرتنی مامۆستایانی سه‌رانسه‌ری ئێران بۆ ده‌ربڕینی ناره‌زایه‌تی له‌ هه‌مبه‌ر كیشه‌كانی هاوپیشه‌یی و گوزه‌رانی باری ئابووری له‌ پارێزگاكانی ئێران هه‌نووكه‌ش چه‌ن كه‌سایه‌تی به‌رچاو و دیاری چالاكی فه‌رهه‌نگی و چه‌ن مامۆستای به‌ناوبانگ له‌ به‌ندیخانه‌كانی ئێران دان و چاره‌نووسیان نادیاره‌ كه‌سانێك وه‌كوو : مۆحه‌ممه‌د حه‌بیبی، مه‌حموود به‌هه‌شتی له‌نگروودی و ئیسماعیل عه‌بدی به‌ هۆی چالاكیه پیشه‌ییه‌كانی خۆیان به‌ سزای به‌ندكران حۆكم دراون و هه‌تا ئێستاش له‌ به‌ندیخانه‌كانی ئێران دان، هه‌روه‌ها ڕه‌سووڵ بۆداقی، عه‌بدولره‌زا قه‌نبه‌ری، مه‌حموود باقری، نه‌بی باستان و عه‌لی ئه‌كبه‌ر باغانی له‌ ڕیزی ئه‌و مامۆستایانه‌ن كه‌ ساڵانی رابردوو حۆكمی به‌ندكرانیان پێدراوه‌ یا له‌ زێد و شاریان دوورخراونه‌ته‌وه‌ و سه‌ركۆنه‌ كراون.

سه‌رنج و كۆمێنت

كۆمێنت

‎وه‌ڵام بده‌وه‌