لە هەرێمی کوردستان، هاووڵاتیان بۆ بەشداری لە ڕێوڕەسمی ٢٢ی بەهمەن بانگهێشت دەکرێن

0
466

ڕۆژی كورد: بەپێی هەواڵی هەواڵنێری ناوەندی ڕۆژی کورد لە هەرێمی کوردستانی باشوور، ماوەی چەند ڕۆژێکە بەردەوام نامەیەکی بانگهێشتن بۆ بەشداری لە ڕێوڕەسمی ٢٢ی بەهمەن، لە ڕێگای ئاسیاسێڵ ـەوە بۆ هاووڵاتیان دەنێردرێ.

ئەو بانگهێشتە بە دوو زمانی فارسی و عەڕەبی نووسراوە و داوا لە هاووڵاتیان دەکات تا بە گوتەی ئەو، لە جەژنی ڕۆژی نەتەوەیی ئێران دا بەشداری بکەن.

هاووڵاتییەک لەمبارەوە بە هەواڵنێری ڕۆژی کوردی ڕاگەیاند، “تا ئێستا لانیکەم ٥ جار ئەو نامەیەم لە ڕێگای سیم کارتی ئاسیاسێڵەوە بۆ نێردراوە و ناشزاندرێ یایا ئاسیاسێڵ لەسەر داوای چ کەس ولایەنێک ئەو کارە دەکات”.

کۆماری ئیسلامیی ئێران لە ماوەی چەند ساڵی ڕابردوودا و بەتایبەتی لە زۆنی سەوز، دەسەڵاتێکی بەربڵاوتر لە پێشووی بۆخۆی مسۆگەر کردووە و بێ گوێ دان بە یاساکانی هەرێم یان رێژەی دەسەڵاتی کۆنسوولگەری یان ڕێزگرتن لە سەرەوەریی یاسا و دەسەڵات و خاکی هەرێم، کارەکانی خۆی ڕادەپەڕێنێ.

کردنەوەی سەنتەری بەناو ڕۆشنبیریی خومەینی لە کەرکووک، نووسیونەوەی دروشمی سپای پاسداران لە هەڵەبجە، کردنەوەی پێشانگا و دانانی وێنەی خومەینی لە هەولێر، سەردانی تیرۆریست قاسم سلێمانی بۆ هەولێر و سلێمانی و تەراتێنی ئاشکرای قاسم سلێمانی بەتایبەتی بۆ شاری سلێمانی، هەندێک نموونە لە پێشێل کردنی سیستماتیکی سەرەوەریی هەرێمن کە بە ئاگاداریی دەسەڵاتدارانی حیزبی و حکومیی هەرێمەوە بەڕێوە دەچن.

لە دوای کوژرانی ڕەفسەنجانی لەلایەن خودی دەسەڵاتی ئاخوندییەوە، حکومەتی هەرێم و حیزبەکانی بە شێوەیەکی یەکجار سەرسووڕهێنەر ڕاگەیێندراویان دا و لە هەولێریش ڕێوڕەسمیکی دوو ڕۆژە بۆ سەرەخۆشی لە ڕەفسەنجانی، جەلادی کورد و دارێژەری پرۆژەی تیرۆری ڕێبەرانی کورد بەڕێوەبرا.

سه‌رنج و كۆمێنت

كۆمێنت