شەهلا یارحوسێنی: هاودەنگی حیزبەکان لە بایکۆت کردن، ئاسۆی خەڵکی کوردستان ڕوناکتر

0
147

بڕیار وایە لە حەوتی ڕەشەممەی ئەمساڵدا هەڵبژاردنەکانی مەجلیسی شووڕای ئیسلامی و مەجلیسی خوبرەگان لە ئێران بەڕێوە بچێ، بەرپرسانی کۆماری ئیسلامی لە ڕاگەیەندنەکاندا هەموو هەوڵێک دەدەن خەڵک بۆ سەر سندووقەکانی دەنگدان ڕابکێشن و سیمایەکی دیموکراتیک بە هەڵبژاردنەکانی ئەمساڵ ببەخشن، بەشی زۆری حیزب و لایەنە سیاسییەکانی خۆرهەڵاتی کوردستان بایکۆتی هەڵبژاردنەکانیان کردووە و داوایان لە خەڵک کردووە بەشداری لە هەڵبژاردنەکاندا نەکەن. رۆژی کورد بە پێویستی زانینی لە تەوەرێک دا پرسی بەشداریکردن و بەشداری نەکردن لە هەڵبژاردنەکاندا لەگەڵ نووسەر و رووناکبیران و هونەرمەندانی خۆرهەڵات بخاتە بەر باس.

بابەتی بەر دەستتان ڕای بەڕێز شەهلا یارحوسێنی، نووسەرو چالاکی سیاسییە لەمەڕ هەڵبژاردنەکان.

سەبارەت بە دۆخی هەڵبژاردنەکان قسەو باس زۆرن و لە وەها کورتە بابەتێک ناتوانرێت هەموو وردەکاریەکان و کەم و کۆڕیەکان باس بکرێت، بەڵام ئەوەی کە ڕوونوو ئاشکرایەو جێگای باس و خواستی خەڵکی ئێرانە، بە تایبەت گەلی کوردی ماف خوراو لەو ناوچەیەدا جێگای باسو لێکۆڵینەوەیەو دەبێت خەڵک وشیار بکرێتەوە بۆ بایکۆت کردنی هەڵبژاردن.

 لە هەر وڵاتێک  هەڵبژاردن بکرێت، ئەوە خەڵکە بڕیار دەدەن کێ شایەنی ئەوەیە بپاڵێورێت و پڕوپاگاندەی بۆ بکەن و خەڵک هان بدەن بەرەو هەڵبژاردن بچێت یان نا؟،  بەڵام ئەوە لە کاتێکدایە کە ئازادی و دیموکراسی بە تەوای بەرقەرار بێت و  بەهاکانی مرۆڤایەتی لە بەر چاو گیرا بێت و داخوازی و بەرژەوندیەکانی خەڵک لە پێش بەرژەوەندیەکانی دەسەڵات بێت.

کاتێک بەهاکانی مرۆڤایەتی و دیموکراسی لە ژێرپێ نرا، لە لایەن تاقمە یەک لە دوای یەکەکانی دیکتاۆرو سێدارە ترس دەکەنە زنجیرێک و لە ملی خەڵکی دەئاڵێنن و، عەقڵ و بیرو هزری خەڵک قۆرخ دەکەن و خەڵک توشی نائومێدی و دڵەراوکێ دەکەن و گرێ دەروونیەکان وەک مۆتەکەیەک وا بە دوایاندا.

 لە هەر کۆمەڵگایەک ژنان هەڵسوڕو توندوتۆڵی بنوێنن لە بەرامبەر هەر ناداتپەروەرییەک کە بەرامبەریان دەکرێت، بێ سێ و دوو دژی ئەو سیستمە دیکتاتۆرو ژن کوژە بووەستنەوە. بەڵام بە هۆی سیستەمی چەقبەستووی کۆنەپەرستی و دەسەڵاتی سەروێن ڕەش و  نەریتی پەت و سێدارە، هیچ دەرەتانێکیان نەهێشتۆتەوە بۆ چاو کردنەوە.

بەڵام بە خۆشحاڵیەوە ئێستا تەکنەلۆژیا وا پێشکەوتووە کە ڕژێم ناتوانێ پێش بەو هەموو پێشکەوتنە دیجیتاڵی و ئەلکترۆنیانە بگرێت ئێستا بە هۆی تٶڕەکۆمەڵایەتیەکانەوە خەڵک شت دەبینێت و هاواری خۆی دەگەیەنێتە ئاخرین نوقتەی دونیاو لە هەموو ئاڵوگۆڕەکانی ڕۆژگار ئاگادارن.

کۆمەڵگای ئێران لە ماوەی ٣٧ ساڵی تەمەنی کۆماری ئیسلامیەوە تەنیا لاقەی شعورو هەست و داخوازیەکانیان دەکرێت، کە ژنانیش بەشێک لەو حەشیمەتە کە توشی ئەو ناهامەتیانە دەبێتەوە، دوور ناچین ژنانی ماف ویست لە ئێراندا لاقە دەکرێت و دەستدرێژی جنسیان لێدەکرێت بە هۆی کەمێک دەبڕینی ویستی خۆیان. هەڵبژاردنەکان دوور لە خواستی خەڵکی بەشخواراوی نەتەوەیەکی تا سەر ئێسقان خەفەکراو دەچێت بە ڕێوەو خەڵک بە چاو بەستی دەبەنە سەر سندوقی دەنگدان و هیچ مەرجێکی تێدا نیە سەبارەت بە ویستی خەڵک، تەنها لە چوار چێوەی بەرژەوەندیەکانی ڕژێمدا دەبێت.

ئەوەی بۆ من جێگای پرسیارە، ڕژێم هەر چوار ساڵ جارێک دێت هەندێک پرس و قسەو باس دەئاڵێنێت لە دەوری خەڵک و دەیکات بە باسی ڕۆژ، بۆ ئەوەی خەڵکی پێوە سەرقاڵ بکات و بەم شێوە خەڵک وا لێبکەن بێ ئەوەی بیر بکەنەوە دەیانبەنە سەر سندووقی دەنگدان و گرێ دەرونیەکانیان زیاترو زیاتر دەکەن.

بایکۆت کردنی هەڵبژاردنەکان من بە ڕەوای دەزانم و خەڵک دەبێت زیاتر وشیار ببنەوە بە تایبەت حیزبە سیاسیەکانی ڕۆژهەڵات دەبیت زۆر وشیارانە خەڵک بە ئاگا بێننەوەو یەک دەنگی و یەک ڕیزی بخەنە ماڵی کورد، بەیاننامەیەکی هاودەنگ بدەن بە خەڵکی کورد لەو ناوچەیەدا . هاودەنگی حیزبەکان ئاسۆی خەڵکی کوردستان ڕوناکتر دەکات و خەڵک زیاتر دڵخۆشدەکات.

 من وەک ژنێکی کورد، داوا لە هەموو دایکان و خوشکان و ژنانی مافخواز دەکەم بە توندی هەڵبژاردنەکان مەحکوم بکەن و نەفرەت لە هەڵبژاردنی دژە مرۆڤ بکەن.

 داوا لە خەڵکی تینوی ئازادی دەکەم کە هەڵبژارنەکان بایکۆت بکەن و لە هەموو شەقامەکان ڕژێم بەرد باران بکەن و نەهێڵن تاقە  پێنوسێک لە سەر فایلی ڕەشی پەت و سێدارە گڵاو بکرێت.

سه‌رنج و كۆمێنت

كۆمێنت