زوانما،لایە لایەو ئەدٚایاما پارێزنا

0
335
ماریا عەزیزی (هانە)

«بنویسمێ بە زوانی هەورامی،بوانمێوە بە زوانی هەورامی کە ئاڵاو قەڵەمی نەبڕیان باڵاو هیچ مێللەتێویەرە»(موحەممەد موستەفازادە)

«هەرکەس نەزانۆ بە زوانی ئادٚایی وێش بوانۆوە و بنویسۆ بێ سەوادٚ حەساب بۆ!»(نوام چامسکی)ئەگەر،بە ئێنساف بدٚیەیمێ پەی ئی واتەیە،چن دەرسەدٚێما سەوادێنمێ؟جار و بارهیچ نەواتەی خاسا،تا واتەی. جار و باریچ،ئەژنەویەی، ئادٚیچ گۆش پەنەدایش گەرەکا.گۆشوو دڵیت کە دا بە ورکەو وەڵاتی،کۆڵێو ڕازێ جە دەموو تۆشەبەرەو ژیوای ژەنا و پیایاو وەڵاتی گێڵیاوە و هەر یۆشا، یاگێوما بەرۆ. یۆشا شاخ و کۆساروو وەڵاتی مرمانۆ، یۆشا دەشت و ساراو ڕۆخانێما مارۆوە یادٚ. پەردەو پەنجەرەو سۆزوو ژیوای، پەیما مدریۆوە لا.ئێتر ئێمەنمێ و وەرچەمێوی زەریف و پەڕ جە ڕاز و نیاز کە چەنی دەنگوو هۆرە و سیاچەمانەی تێکەڵا. شادٚی و خەم پێوەڕە ئامێتێنێ.

زەریفیەکێ،ئامیانەشا خەمێوی کۆنەن، بەڵام پەڕ جە ژیوای. ئەژنەویەی دەردی دڵوو وەڵاتی،هامدڵی موازۆ.ئەر زوانوو دڵیش بژناسی،کۆڵێو قسێش پەی کەردەی هەنێ. زوانی وێمانە موازۆ.زوان مشیۆ یۆ بۆ تا بتاوی دەردی دڵ بژنەوی و هامدڵی کەری.بەڵێ، زوانی ئەدٚایی،گاهەز تەنیا خەڵاتیێو بۆ کە کۆمەڵگاو پیاسالاروو ئەوسایەنە، جە گرد یاگێوەنە، بەخشیا بە باڵاو ئەدٚای! یاگێ شانازیا کە زوانما،بە نامێ ئەدٚایاماوە ڕازیاوە: «زوانی ئەدٚایی».

یا گاهەز پیای کەم کەم یاواینە کە ئەدٚاشا، گەورەتەرین پاڵپەشتەو ئەشقوو ژیوایشابێ. نۆ مانگێ ڕەنج کێشتەی، نۆ مانگێ شەو نەوتەی،نۆ مانگێ دوەگیانی، نۆ مانگێ تەمەدٚاری، چننە سەعاتێ برینێ.پەیدٚا بیەی ڕۆڵەو ئاواتی و گرەوای ئادٚی و مانیای ئەوەسیای ئەدٚای،نەخشوو زەردەخوێوی شەرمنانەی سەروو لچاو ژیوایشەو. ئینە گرد مێژۆ لانی کەمەو زوان، زوانی ئەدٚایی بۆ. ئێتر ئا هەقشا نیا سەروو ئا یاگێ کە ئەشیا بیەی.

بەڵێ،بەڕاسی هەرچی چەنی تۆ بۆ ڕەنگەو ژیوای گێرۆ، ڕەنگەو وەشەویسی. هەرچی چەنی تۆ بۆ، ڕەنگەو گۆراڵە سووورەکاو هەورامانی گێرۆ.کوڵمێ زارۆڵەکات، ئانەیە ماچا: بێ دەنگ و ئەهوەن زوانیچ، چەنی تۆ پارێزیا ئەدٚا و ڕازناتەو کەردت بە ملوانێوەی زەڕێنە و وستت ئەو ملوو ڕۆڵەکاو ئەشقوو وەڵاتی. هەرجە بێشکێنە، بەلایە لایەت،

هەورامانت،ڕەنگ و بۆیەتەر بەخشا. تفڵوو دڵوو ڕۆحیچما چەنی ئا دەنگە ئەهووراییتە ئاماوە سەما. ئەشقوو زوانی بێ ئامیانەو مەنەیما، دەسی بێ هێزوو ڕۆڵەیت گێرتت و تا باخە سەرسەوزوو سەربەرزەکاو ژیوایت بەرد.مووسیقا بەسۆزەکەو لایه لایەت، گۆشێ هەستیمانە کە مژنیۆ و بەهشتما مارۆوە یادٚ.بەهەشت بێ تۆ بێ مانانو زوانیچ هەر هێنوو تۆن کە بەخشایمێت پەنە.

ئێمەیچ مشیۆ پارێزنمێش،نەک شێعرێش پۆرە چنمێ.مشیۆ ئامێتە بۆ چەنی هەستوو بیەیما،چەنی ژیوایما،دەس پەنە کەردەی ڕۆیما و ژیوایما ئەدٚایانەتەر کەرمێ، دڵسۆزانەتەر،بەشکەم وانای و نویسەیچما بۆ بە ئەدٚایی.ئینە کەمتەرین،مانیا نەوی ڕۆڵاو ئارۆیا و ئەدٚا و تاتەو سەوای جە ئەدٚا گەورێ زوانیشا.

فێرگاو زوانی ئەدٚایی ماتڵا،فێرگاو زوانی هەورامی ماتڵا. من و تۆ، ئەدٚا و تاتەو ئارۆی،دەسوو ڕۆڵەکاما گێرمێ بەشکەم زوانی وێمانەی «هەورامی» پارێزنمێ. من و تۆ، ئێمە وێما مشیۆ هەنگامە هۆر گێرمێ پەی وێما، پەی زوانیما،پەی پارێزنای زوانیما و مەنەیش. نازمێ ڕۆڵەو زوانی ئەدٚایی بێ ناز گنۆ. باوەڕم ئینەنە، کە زوانما لایە لایەو ئەدٚایاما پارێزنا.بە ڕاسی:
«ئاڵاو قەڵەمی نەبڕیان باڵاو هیچ مێللەتێویەرە»
پارێزنات زوان بە لایە لایە
ڕۆجیاروو ئەشقیت، کەردەن دەسمایە
زوانم لەنگا، بێ تۆ مەژیوۆ
وێت بەهەشتەنی، کەلامت ئایە

 

سه‌رنج و كۆمێنت

كۆمێنت