ئەگەر خۆخۆریی ناوخۆیی نەبوایە، یەکێك لە دەوڵەتە بە‌هێزەکانی ناوچە، دەوڵەتی کوردی دەبوو!!

0
30
محەمەد سلێمانی

بزووتنەوەی ڕزگاریخوازیی گەلی کورد، بە درێژایی مێژوو. بە دوو ڕێڕەوی ناتەبا و بەتەواوی دژبەیەكدا هەنگاوی خۆی هاویشتووە و هەر بەو هۆیەشەوە مەترسیی سیاسی لە سەر بەرخۆدان و دەسکەوتە بەدیهاتووەکانی شۆڕشەکانی کوردستان لە ڕەوتی مێژوودا دروست بووە و نەبۆتە خاوەنی کیانی سیاسی.

هۆکاری بنەڕەتیی ئەو بابەتەش، ڕاستەوخۆ پەیوەندی بە ژینگەی سیاسی و سروشتی پشتی جەبهەکەی جووڵانەوەی سیاسیی کوردەوە هەیە و هەروەك ئاشکرایە، زۆربەی هێزە کوردیەکان بە جۆرێك لە جۆرەکان، پەیوەندیان ە گەڵ حکوومەتە داگیرکارەکانی کوردستاندا هەیە و ئەو هاوکاری و یارمەتیدانەش  زر بەی کات، بەگژیەكداکردنی ڕۆڵەکانی گەلی کوردی لە بەشەکانی تر  لێکەوتۆتەوە. کاتێك سەیری ڕووداو و کۆمەڵکۆژیەکانی گەلی عەفرین بەهۆی حکوومەتی تورکیەوە دەکەین، ڕەنگە باشتر نێوەرۆکی ئەو دێڕانەمان بۆ ڕوون بێتەوە و چاکتر لەو بابەتە تێبگەین.

بۆ نموونە هەیە کورد و خۆی بەکورد دەزانێت، بەڵام بەهۆی نەگونجانیان لە گەڵ سیاسەتی پەکەکەدا، کەوتنی ئەو شارە وەك شکست و تك شکانی پارتی کرێکارانی کوردستان وەسف دەکا و زۆی داخ بۆ ناخۆن!!. ئێمەی کورد هەر بەوجۆرە سیاسەتمان کردوە و ئەو ڕێڕەوە هەڵە و نادروستە هەتا ئەمڕۆش درێژەی هەیە و بۆتە سەرەتان لەژیر پێی جووڵانەوەی ڕزگاریخوازیی گەلی کورددا و وەک پێویست نەمانتوانیووە بستێکی وڵاتەکەمان کە ڕزگاریشمان کردبێت، بپارێزین و هاوکاری و پشتیووانیە ناوچەیی و جیهانیەکان لە بەرژەوەندیی دۆزی ڕەوای خۆماندا بەکار بێنین. کەچی بەردەوام ئێمە بووین بە هێڵی بەرگریکردن لە دەسکەوت و بەرژەوەندیە سیاسی و ئابووریەکانی زلهێزەکانی جیهان و لە کاتی پێویستدا، کێشە و پرسی کورد پشت گوێ خراوە و سیاسەتێکی ڕوونمان سەبارەت بە پرسی کورد نەبووە. سەرکردایەتیی سیاسیی هەموو بەشەکانی کوردستان پێویستە بە سیاسەت و تێڕوانینی خۆیاندا بچنەوە و چیتر وەدوای هەست و سۆزی مرڤ دۆستی و پاراستنی مافی مرۆڤ و شەڕی ئاشتیی جیهانی نەکەون، چوونکی  وەك گەمەیەکی دۆڕاو وایە بۆ گەلی کورد.

 دکتۆر قاسملوو دەڵێت”: ئێمەی کورد لەبەر ئەوەی تیرۆرناکەین و بیانیەکان بەبارمتە ناگرین وڕفرۆکە نافڕینین، کەس گوێمان بۆناگرێ و ئاوڕ لە خەبات و تێکۆشانی نەتەوەییمان نادەنەوە.” مێژوویەك بەسەر ئەو دێڕەدا تێپەڕ دەبێت و ئێستا زیاتر لە هەموو کاتێک نێوەرۆکی لێکدانەوەی ڕێبەری مێژووی هاوچەرخی نوێمان بۆ دەردەکەوێت.

عەفرین یەکانی دژی تیرۆر بوون و لەسەنگەری ڕزگاری و ئاسایشی جیهانیدا بوون، کەچی خۆیان و هەرێمەکەیان بە خەیانەتی ناوچەیی و گێتی بە تورکیە و جاشەکانی فرۆشرا.  سیاسەتی دژبەخۆی هەر بەوەشەوە کۆتایی نەهاتووە، کاتێك لە هەرێمی کوردستانی باشوور بڕیاری گشتپرسی درا، بەشێك لە هێزەکانی باشوور کەوتنە بیانوو هێنانەوە و دژایەتیی ئەو پرسەیانکرد و بەستێنی ئەوەیان ڕەخساند تا وڵاتانی دەورووبەر کەڵکی زۆر باش لە ناڕێكیی ناوماڵی کورد لە بەرژەوەندیاندیی خۆیان وەرگرن و ئاکامی ئەو سەرکەوتنە گەورەیە، بە ڕێککەوتنێکی ژێربەژێر و سازانێکی ناپیرۆز، خەریکبوو هەموو شتێك لەدەست بدەین.

 کورد سیاسەتی دژ بەخۆی زۆر بەهێز و کاریگەرە و ئەگەر تەنیا جارێك بەو ڕادەیەش کاریگەری لەسەر وڵاتانی ناوچەکەدا هەبوایە و خۆمان بە کۆیلە و پاشکۆیان نەزانیبا و لە دەرفەوت و کاتی دیاریکراودا، لە پشتەوە خەنجەرمان لە پشتی یەکدی نەدابایە، بەدڵنیایەوە، یەکێك لە دەوڵەتە بەهێزەکانی ناوچەیی، کورد دەبوو.  سیاسەتی ڕەخنەگرتن و دەست نیشانکردنی لایەنە بەهێز و نیگەتیڤەکان دەبێت وەك سروشتی سیاسی و ڕێکخراوەی لێکدانەوەی بۆ بکرێ و ئەگەر کەسێك هات و ڕەخنەی لە حیزبێك یان شەخسێك گرت، نابێت  بەجۆرێك پێناسەی بۆ بکرێت کە ئیدی ئەوە دژی کەسایەتی و بیری هێزێکە و هێرشی نەڕەوای بکرێتەسەر. جەوهەری خەباتی نەتەوەیی کە لەسەر هێلی تێکۆشانی بەرینی نیشتیمانی بیناکرابێت، دەرهاویشتەکانیشی زۆر جاران ڕەنگە بە پێچەوانەی خواست و ئامانجی تاکڕەوی و بەرژەوەندی خۆازی کەسێك یان کۆمەڵێك سیاسی پێگە لاواز بێت و، ئەو دەستەیەش کە بەڕێچکەی ڕاستەقینەی جووڵانەوەی سیاسی و نەتەوەیدا هەنگاو دەهاوێژێت، بە هۆی سروشتی ئامانج و بەرنامەی سیاسی و نەتەوەیان، لازمە ڕسکی سیاسی بکا و  دەست بۆ سەربزێوی گەورە ببات و لە دەرفەتی ڕەخساو  وەك  هەستانەوەیەکی گەورەی نەتەوەی لە پێناوی ئامانجی سیاسی، ئەنجامبدات و ڕەنگە لە کۆتایدا ئەو کردارە بەسەرکێشی نەتەوەییش  پێناسە بکرێت.

زۆر بە دەگمەن سیاسیەکانی کورد دەستیان بۆ کردەیەکی لەو جۆرە بردوە و، ڕاگەیاندنی حکوومەتی کوردستان لە ڕۆژهەڵات بە سەرۆکایەتی پێشەوای مەزن و بریاری ڕاپەرینی جەماوەری لە باشوور و ئەنجامدانی گشتپرسی لە ژێرکاریگەری مەسعوود بارزانیدا، نموونەیەکی جوانی  سەرکێشی نەتەوەین و مرۆڤ دەبێت شانازی بەو ڕووداوانەوە بکات کە مێژوویەکی گەشیان هەیە.  بکەرەکانی ڕیفراندۆم نموونەی ئەو هزرە سیاسی و نەتەوەیەبوون کە ژیرانە و چاونەترسانە، دواجار بڕیاریان لەسەر ئامانجێکی نەتەوەیدا و بەداخەوە بە هۆی ناکۆکیە نێوخۆیەکان و سیاسەتی دژبەخۆی، پرۆسەکە وەك پێویست ئامانجی خۆی نەپێکاوە، بەڵام ئەو مەسەلەیە درێژەی هەیە و بەسانای باوەرناکەم کۆتای پێ بێت. پاشان وەختێك خەڵکی شاری سنە بۆ پێشوازی لە کاربەدەستانی پلەبەرزی حکوومەتی ئاخوندی بێنە سەر شەقام و لە سەفی پێشوازیدا دەربکەون، بەمانەی سیاسەتی هەڵەی هێزە کوردیەکانی ئەو بەشە و یانیش چ خەتایەکێ حیزبی دێمۆکراتی تێدایە! کاتێك لە ئامەد بە شێوەی بەربڵاو  پێشوازی لە ئەردۆغان دەکرێت، بەجێ نیە هۆکاری ئەو پێشوازییە بۆ هیزێکی تێکۆشەری کورد بگێڕینەوە و خەتایەکەی بخرێتە گەردنی لایەنێکی دیاریکراوی کوردستانی باکوور.

ئەگەر ئەوە بکرێتە پێوەر بۆ دەست نیشانکردنی خۆشەویستی یان دژایەتی هێزێکی کوردی لە بەشەکانی کوردستاندا،  ڕۆژهەڵاتیش و باشووریش ئەو ڕووداوانەی بەسەردا تێپەڕبووە. ئەو خەڵکەی کە بەو شێوەیە لە پێشوازی داگیرکەرانی وڵاتەکەیاندا، دەوەستن، بەشێکیان بەزۆر و بەهۆی کۆمەڵێك بەرژەوەندی و بژیوی ژیان و ئاسایشی کۆمەڵایەتیان ئامادەی ئەو جۆرە بۆنە و کۆبوونەوە پڕ لە دەردی سەری و سەر ئێشیە دەبن. ئەگینا بە ئارووزویان بێ هەرگیز لەو شوێن و جێگایانەدا ناوەستن و کەس  شانازی بە خۆدەرخستنی ناکات.

سه‌رنج و كۆمێنت

كۆمێنت

‎وه‌ڵام بده‌وه‌